Read Елизаветинская Библия, 1751 1-я Царств 12 Bible Online

1-я Царств 12 - Елизаветинская Библия, 1751 bible

1-я Царств 12

¹И рече самуил ко всем мужем израилевым: се, послушах гласа вашего о всех, елика ми ресте, и поставих над вами царя:

²и се, ныне царь предходит пред вами, аз же состарехся и седети буду, и сынове мои се с вами: и аз се, ходих пред вами от юности моея и даже до днешняго дне:

³се, аз, отвещайте на мя пред Господем и пред христом его, еда у кого телца взях, или осля, или кого от вас насилствовах, или кого утесних, или от руку некоего приях мзду, или обущу? извещайте на мя, и возвращу вам.

⁴И реша к самуилу: не обидел еси нас, ниже насилствовал еси нам, ниже утеснил еси нас, ниже взял еси от руки чиея что.

⁵И рече самуил к людем: свидетель есть Господь в вас, и свидетель христос его днесь в сей день, яко ничтоже обретосте в руку моею. И реша людие: свидетель.

⁶И рече самуил к людем, глаголя: свидетель Господь сотворивый моисеа и аарона и изведый от земли египетския отцы нашя:

⁷и ныне предстаните, и разсуждуся с вами пред Господем и возвещу вам вся оправдания Господня, яже сотвори вам и отцем вашым:

⁸егда вниде иаков и сынове его во египет, и смириша их египтяне: и возопиша отцы наши ко Господу, и посла Господь моисеа и аарона, и изведе отцы нашя из египта и всели их на месте сем:

⁹и забыша Господа Бога своего, и вдаде я в руце сисаре архистратигу иавина царя асорска, и в руки иноплеменничи, и в руки царя моавска, и воеваша их:

¹⁰и возопиша ко Господу и реша: согрешихом, яко оставихом Господа и поработахом ваалиму и дубравам, и ныне изми ны от рук враг наших, и поработаем тебе:

¹¹и посла Господь иероваала и варака и иеффая и самуила, и изят вы из рук враг ваших окрестных, и обитасте уповающе:

¹²и весте, яко наас царь сынов аммоних прииде на вы, и ресте: ни, но царь да царствует над нами: егда Господь Бог царствова над вами:

¹³и се, ныне царь, егоже избрасте и егоже просисте: и се, даде Господь над вами царя:

¹⁴аще убоитеся Господа и поработаете ему, и послушаете гласа его и не воспротивитеся устом Господним, и будете и вы и царь царствуяй над вами вслед Господа ходяще: то рука Господня не будет на вас:

¹⁵аще же не послушаете гласа Господня и воспротивитеся устом Господним, будет рука Господня на вас и на царя вашего:

¹⁶и ныне станите и видите глагол сей великий, егоже сотворит Господь пред очима вашима:

¹⁷несть ли жатва пшеницы днесь? призову Господа, и даст громы и дождь, и уразумеете и увидите, яко злоба ваша велика, юже сотвористе пред Господем, испросивше себе царя.

¹⁸И призва самуил Господа, и даде Господь гром и дождь в той день: и убояшася вси людие зело Господа и самуила,

¹⁹и реша вси людие к самуилу: помолися о рабех твоих ко Господу Богу твоему, да не умрем: яко приложихом ко всем грехом нашым злобу, просяще себе царя.

²⁰И рече самуил к людем: не бойтеся: вы сотвористе всю злобу сию: токмо не уклонитеся от последования Господня и поработайте Господу всем сердцем вашим,

²¹и не преступите вслед ничтоже сущих, иже не пособствуют и не изимут, яко ничтоже суть:

²²понеже не отринет Господь людий своих имене ради своего великаго, яко кротце Господь прият вас себе в люди:

²³и да никакоже ми согрешити Господу, оставити еже молитися о вас ко Господу, и поработаю Господеви и покажу вам путь благ и прав,

²⁴токмо бойтеся Господа и работайте ему во истине и всем сердцем вашим, яко видите яже великая сотвори Господь с вами:

²⁵и аще злобою зло сотворите, то вы и царь ваш погибнете.