Read Елизаветинская Библия, 1751 1-я Царств 14 Bible Online

1-я Царств 14 - Елизаветинская Библия, 1751 bible

1-я Царств 14

¹И бысть во един день, и рече ионафан сын саулов отрочищу носящему оружие его: гряди, и прейдем в мессаву иноплеменников иже на оней стране. И отцу своему не возвести сего.

²И саул седяше на верху холма под древом яблонным еже в магдоне, и бяше с ним яко шесть сот мужей.

³И ахиа сын ахитов, брата иохаведова, сына финеесова, сына илии, иерей Божий в силоме нося ефуд: и людие не ведяху, яко отиде ионафан.

⁴Посреде же прехода, идеже хотяше ионафан прейти в стан иноплеменничь, бысть камень острый отсюду и камень острый отюнуду: имя единому васес и другому сенна:

⁵камень един стояше от севера противу махмаса, и камень вторый от юга противу гаваи.

⁶И рече ионафан ко отрочищу носящему оружие его: гряди, прейдем в мессаву необрезанных сих, негли что сотворит нам Господь, яко несть Господу не удобно спасти во многих или в малых.

⁷И рече ему носяй оружие его: твори все, на неже сердце твое склоняется: се, аз с тобою есмь, якоже сердце твое сердце мое.

⁸И рече ионафан: се, мы прейдем к мужем и явимся к ним:

⁹аще сия рекут к нам: помедлите тамо, дондеже возвестим вам: то постоим сами на месте своем и не пойдем к ним:

¹⁰аще же к нам сице рекут: взыдите к нам: то взыдем, яко предаде их Господь в руки нашя: сие нам знамение (да будет).

¹¹И внидоста оба в мессаву иноплеменников. И глаголаша иноплеменницы: се, еврее исходят из разселин своих, идеже скрышася.

¹²И отвещаша мужие мессавли ко ионафану и к носящему оружие его, и реша: взыдите к нам, и явим вам глагол. И рече ионафан к носящему оружие его: гряди по мне, яко предаде их Господь в руки израилевы.

¹³И взыде ионафан (ползущь) на руках и на ногах своих, и носяй оружие его за ним. И узреша иноплеменницы лице ионафане, и порази их: и носяй оружие его идяше вслед его.

¹⁴И бысть язва первая, еюже порази ионафан и носяй оружие его, яко двадесять мужей копийцами и каменовержением и кремением полевым.

¹⁵И бысть ужас в полце и на селе: и вси людие иже в мессаве и губящии ужаснушася, и тии не хотяху братися: и вострепета земля, и бысть ужас от Господа.

¹⁶И видеша соглядатае сауловы в гаваи вениамини, и се, полк смятеся семо и онамо.

¹⁷И рече саул людем сущым с ним: разсмотрите ныне и видите, кто отиде от вас. И разсмотриша, и се, не обретеся ионафан и носяй оружие его.

¹⁸И рече саул ко ахии: принеси ефуд, яко бе кивот Божий в той день с сынми израилевыми.

¹⁹И бысть егда глаголаше саул ко иерею, и шум в полце иноплеменничи ходя идяше и множашеся. И рече саул ко иерею: пригни руки твоя.

²⁰И изыде саул и вси людие иже с ним, и изыдоша до сечи. И се, бысть оружие коегождо на ближняго своего, (и бысть) мятеж велик зело.

²¹Но и раби, иже быша со иноплеменники вчера и третияго дне, вшедшии в полк, обратишася и тии еже быти им со израилтяны сущими с саулом и со ионафаном.

²²И вси израилтяне скрывшиися в горе ефремли услышаша, яко отбегоша иноплеменницы: приложишася и тии вслед их на брань.

²³И спасе Господь в той день израиля: брань же пройде даже до вамофа: и вси людие бяху с саулом, яко десять тысящ мужей, и бе брань разсыпана во весь град на горе ефремли.

²⁴И саул сотвори безумие велие в день той, и закля люди, глаголя: проклят человек, иже ясти будет хлеб даже до вечера, дондеже отмщу врагом моим. И не вкусиша людие вси хлеба:

²⁵и вся земля обедаше: и се, бяше дубрава пчелная пред лицем села:

²⁶и внидоша людие во пчелник, и се, исхождаху глаголюще: (яко истече мед,) и не бе возвращающаго руки своея ко устом своим, яко убояшася людие клятвы Господни.

²⁷Ионафан же не слышаше, егда заклинаше отец его люди: и простре конец жезла своего, иже в руку ему, и омочи его в соте медвене, и обрати руку свою во уста своя, и прозреша очи его.

²⁸И рече един от людий, глаголя: кленый прокля отец твой люди, глаголя: проклят человек, иже ясти будет хлеб в день сей: и изнемогоша людие.

²⁹И уразуме ионафан и рече: смути отец мой землю: виждь, яко прозреша очи мои, егда вкусих мало от меда сего:

³⁰о, дабы яли ядуще днесь людие от корыстей врагов своих, ихже обретоша, множайшая бы днесь язва была во иноплеменницех.

³¹И поразиша в день той от иноплеменников множае нежели в махмасе: и утрудишася людие зело.

³²И устремишася людие на корысти, и пояша людие стада и буйволы и говяда: и закалаху на земли, и ядоша людие с кровию.

³³И возвестиша саулу, глаголюще: согрешиша людие ко Господу, ядуще с кровию. И рече саул: от гефема привалите мне семо камень велий.

³⁴И рече саул: шедше к людем рцыте им: да принесет кийждо семо телца своего и кийждо овцу свою, и да заколют на камени сем, и ядите я, и не согрешайте Господу ядуще с кровию. И приведоша нощию вси людие свое кийждо, еже имяше в руце своей, и закалаху тамо.

³⁵И созда саул тамо олтарь Господу: сей нача саул созидати олтарь Господу.

³⁶И рече саул: снидем вслед иноплеменник нощию, и расхитим их, дондеже заря будет, и не оставим от них мужа. И реша: все еже благо пред очима твоима, твори. И рече иерей: приступим семо к Богу.

³⁷И вопроси саул Бога: сниду ли вслед иноплеменников? предаси ли их в руки израилтяном? И не отвеща ему Господь в день той.

³⁸И рече саул: приведите семо вся колена израилева, и уразумейте и увеждьте, на ком бысть грех сей днесь,

³⁹яко жив Господь спасый израиля, яко аще ответ будет на ионафана сына моего, смертию да умрет. И не бе отвещающаго от всех людий.

⁴⁰И рече саул всему израилю: вы станите на едину страну, аз же и ионафан сын мой станем на другую страну. И реша людие к саулу: еже благо пред тобою, твори.

⁴¹И рече саул: Господи Боже израилев, что яко не отвещал еси рабу твоему днесь? или моя есть, или сына моего ионафана неправда? Господи Боже израилев, даждь знамение: и аще речеши сия, даждь ныне людем твоим израилю, даждь ныне преподобие. И паде жребий на ионафана и саула, и людие изыдоша.

⁴²И рече саул: верзите жребий на мя и на ионафана сына моего: егоже объявит Господь, смертию да умрет. И реша людие к саулу: несть сей глагол. И преможе саул люди, и вергоша о нем и ионафане сыне его, и паде на ионафана жребий.

⁴³И рече саул ко ионафану: возвести ми, что сотворил еси? И возвести ему ионафан и рече: вкушая вкусих мало меду омочив конец жезла, иже в руку моею, и се, аз умираю.

⁴⁴И рече ему саул: сия да сотворит ми Бог, и сия да приложит ми, яко смертию умреши днесь.

⁴⁵И реша людие к саулу: еда днесь умрет сотворивый спасение сие велие во израили? не буди то, жив Господь, аще падет влас главы его на землю, яко милость Божию сотвори в день сей. И помолишася людие о ионафане в день той, и не умре.

⁴⁶И не иде саул вслед иноплеменников: иноплеменницы же отидоша в место свое.

⁴⁷И саул укрепися царствовати во израили, и побеждаше окрест вся враги своя в моаве и в сынех аммоних и в сынех едомлих и в вефоре и в царствии сувани и во иноплеменницех: и аможе аще обращашеся, спасашеся.

⁴⁸И сотвори силу, и победи амалика, и избави израиля из руки попирающих его.

⁴⁹И беша сынове сауловы ионафан и иисуй и мелхисуе: имена же двою дщерию его, имя первородней мерова и имя вторей мелхола:

⁵⁰имя же жене его ахиноома, дщерь ахимаасова: и имя старейшине вой его авенир сын нира сына ужика саулова:

⁵¹кис же отец саулов, и нир отец авениров сын иамина сына авиилева.

⁵²И бе брань крепка на иноплеменники во вся дни сауловы: и видев саул всяка мужа сильна и всяка мужа сына силы, собираше их к себе.