Read Елизаветинская Библия, 1751 1-я Царств 17 Bible Online

1-я Царств 17 - Елизаветинская Библия, 1751 bible

1-я Царств 17

¹И собираша иноплеменницы полки своя на брань, и собрашася в сокхофе иудейстем, и ополчишася среде сокхофа и среди азика во афесдоммине.

²Саул же и мужие израилевы собрашася и ополчишася во удоли теревинфа и устрояхуся на брань противу иноплеменником.

³И иноплеменницы стояху на горе отсюду особь, израиль же стояше на горе отюнуду, и удоль между ими бяше.

⁴И изыде муж силен из полка иноплеменнича, имя ему голиаф от гефа, высота его шесть лакот и пядь:

⁵и шлем медян на главе его, и в броню кольчату той оболчен бяше: и вес брони его пять тысящ сикль меди и железа:

⁶и поножы медяны верху голений его, и щит медян на плещах его:

⁷и ратовище копия его аки орудие ткущих, и копие его шесть сот сикль железа: и носяй оружие его идяше пред ним.

⁸И ста и возопи пред полки израилевыми и рече им: почто изыдосте, ополчитися ли на брань противу нам? несмь ли аз иноплеменник, вы же еврее сауловы? изберите себе мужа, и да снидет ко мне:

⁹и аще возможет со мною братися и одолеет ми, будем вам раби: аще же аз возмогу одолети ему, будете вы нам раби и поработаете нам.

¹⁰И рече иноплеменник: се, аз днесь уничижих полк израилев в сей день: дадите ми мужа, иже поборется со мною един.

¹¹И слыша саул и весь израиль глаголы иноплеменничи сия и ужасошася и убояшася зело.

¹²Давид же ефрафеев, сей бе от вифлеема иудина, имя же отцу его иессей, емуже бе осмь сынов. Во дни же сауловы бе муж той состареся в мужех.

¹³И идоша три сыны иессеевы старейшии на брань с саулом: имена же сынов его пошедших на брань, елиав первородный его, и вторый аминадав, и третий самма.

¹⁴Давид же бе юнейший, и три болшии его идоша вслед саула.

¹⁵Давид же возвратився от саула, отиде пасти овцы отца своего в вифлеем.

¹⁶И прихождаше иноплеменник утро и в вечер, являяся пред израилем четыредесять дний.

¹⁷И рече иессей давиду сыну своему: возми убо братиям твоим меру ефи муки и десять хлеб сих, и иди в полк, и даждь братиям твоим:

¹⁸и десять сыров от млека сего, и даждь тысящнику: и братию свою посети в мире, и еликих аще требуют, увеси, субботствовати же будеши со мною.

¹⁹Саул же и вси людие бяху во удоли дуба ратующеся со иноплеменники.

²⁰И воста давид рано, овцы же остави со стражею, и взя, и отиде, якоже заповеда ему отец его иессей: и прииде на место, идеже исхождаху сильнии на брань и вопияху в полцех.

²¹Занеже вооружашеся израиль противу иноплеменником, и иноплеменницы вооружахуся противу израиля.

²²И положи давид бремя свое в руках стража, и тече в полк, и пришед вопроси братию свою в мире.

²³Глаголющу же ему с ними, и се, муж месейский, емуже имя голиаф, филистимлянин от гефы, изыде от полков иноплеменничих и глагола по словесем сим, и услыша давид.

²⁴И вси мужие израилевы егда увидеша мужа, и бежаша от лица его и убояшася зело.

²⁵И реша мужие израилтестии: видесте ли мужа сего восходяща, яко поносити израиля прииде? и аще будет муж, иже убиет его, обогатит его царь богатством велиим, и дщерь свою даст ему, и дом отца его сотворит свободен во израили.

²⁶И рече давид к мужем стоящым с ним, глаголя: что сотворите мужу, иже убиет иноплеменника онаго и отимет поношение от израиля? яко кто есть иноплеменник необрезанный сей, иже поносит полку Бога живаго?

²⁷И рекоша ему людие по словеси сему, глаголюще: тако сотворится мужу, иже убиет его.

²⁸И услыша елиав брат его болший, внегда глаголати ему к мужем: и разгневася яростию елиав на давида и рече: почто семо пришел еси? и кому оставил еси малыя овцы оны в пустыни? вем аз гордость твою и злобу сердца твоего, яко видения ради брани пришел еси.

²⁹И рече давид: что сотворих ныне? несть ли речь?

³⁰И отвратися от него ко иному и рече по словеси сему. И отвещаша ему людие по словеси прежнему.

³¹И слышаны быша глаголы, ихже глагола давид, и возвестиша пред саулом: и пояша его людие и приведоша его пред саула.

³²И рече давид к саулу: да не ужасается сердце господину моему о сем, раб твой пойдет и поборется со иноплеменником сим.

³³И рече саул к давиду: не возможеши пойти ко иноплеменнику сему братися с ним, яко ты детищь еси, сей же муж борец есть от юности своея.

³⁴И рече давид к саулу: егда пасяше раб твой отца своего стадо, и егда прихождаше лев или медведица и восхищаше от стада овцу едину:

³⁵и аз вслед его исхождах и поражах его, и исторгах из уст его (взятое): и аще воспротивляшеся ми, то взем за гортань его, поражах и умерщвлях его:

³⁶и льва и медведицу бияше раб твой, и будет иноплеменник необрезанный сей яко един от сих: не поиду ли, и поражу его, и отиму днесь поношение от израиля? понеже кто необрезанный сей, иже уничижи полк Бога жива?

³⁷И рече давид: Господь иже изят мя от руки львовы и от руки медведицы, той измет мя от руки иноплеменника сего необрезаннаго. И рече саул к давиду: иди, и да будет Господь с тобою.

³⁸И облече саул давида одеждею, и шлем медян возложи на главу его,

³⁹и препояса давида оружием своим верху одежды его. Давид же походив (во оружии) семо и овамо, утрудися, яко не обыче. И рече давид саулу: не могу ити в сих, яко не обыкох. И взяша от него сия.

⁴⁰И взя палицу свою в руку свою, и избра себе пять камений гладких от потока, и вложи я в тоболец пастырский егоже ношаше, и пращу свою имый в руце своей, и иде к мужу иноплеменнику.

⁴¹И идяше иноплеменник приближаяся к давиду, и носяй оружие его пред ним (идяше).

⁴²И виде голиаф иноплеменник давида и обезчествова его, зане той детищь бе, и чермен и леп очима.

⁴³И рече иноплеменник к давиду: еда пес аз есмь, яко ты идеши противу мене с палицею и камением? И рече давид: ни, но и хуждший пса. И прокля иноплеменник давида боги своими.

⁴⁴И рече иноплеменник к давиду: гряди ко мне, и дам плоть твою птицам небесным и зверем земным.

⁴⁵И рече давид иноплеменнику: ты идеши на мя с мечем и с копием и щитом, аз же иду на тя во имя Господа Бога саваофа, Бога ополчения израилева, егоже ты уничижил еси днесь:

⁴⁶и предаст тя Господь днесь в руце мои, и убию тя, и отиму главу твою от тебе, и дам тело твое и телеса полка иноплеменнича в день сей птицам небесным и зверем земным: и уразумеет вся земля, яко есть Господь Бог во израили,

⁴⁷и уразумеет весь сонм сей, яко не мечем ни копием спасает Господь, яко Господня брань, и предаст Господь вас в руки нашя.

⁴⁸И воста иноплеменник и иде во сретение давиду. И ускори давид и тече на сражение во сретение иноплеменнику.

⁴⁹И простре давид руку свою в тоболец, и изя из него камень един, (и вложи в пращу,) и верже пращею, и порази иноплеменника в чело его, и унзе камень под шлемом его в чело его, и паде (голиаф) на лицы своем на землю.

⁵⁰И укрепися давид над иноплеменником пращею и каменем, и порази иноплеменника, и умертви его: оружия же не бе в руце давидове.

⁵¹И тече скоро давид, и ста над ним, и взя мечь его, и извлече его от недр его, и умертви его, и отсече им главу его. И видеша иноплеменницы, яко умре сильный их, и бежаша.

⁵²И восташа мужие израилевы и иудины и воскликнуша, и погнаша созади их даже до входа гефова и до врат аскалонских: и падоша уязвленни (мнози) иноплеменницы по пути врат и даже до гефа и аккарона.

⁵³И возвратишася мужие израилевы гнавшии вслед иноплеменник, и потопташа полки их.

⁵⁴И взя давид главу иноплеменника и внесе ю во Иерусалим, и оружие его положи во храмине своей.

⁵⁵И егда виде саул давида исходяща во сретение иноплеменника, рече ко авениру князю силы: чий есть сын юноша сей, авенире? И рече авенир: да живет душа твоя, царю, яко не вем.

⁵⁶И рече царь: вопроси убо ты, чий есть сын юноша сей?

⁵⁷Егда же возвратися давид по убиении иноплеменника, взя его авенир и приведе его пред саула: глава же иноплеменнича бе в руце его.

⁵⁸И рече к нему саул: чий еси сын, юноше? И рече давид: сын раба твоего иессеа от вифлеема.