Read Елизаветинская Библия, 1751 1-я Царств 20 Bible Online

1-я Царств 20 - Елизаветинская Библия, 1751 bible

1-я Царств 20

¹И отбеже давид от навафа (иже) в раме и прииде ко ионафану и рече: что сотворих? и что неправда моя? и что согреших пред отцем твоим, яко ищет души моея?

²И рече ему ионафан: никакоже, ты не умреши: се, не имать сотворити отец мой глагола велика, или мала, и не открыет уха моего: и что яко скрыет отец мой глагол сей от мене? не буди сие.

³И отвеща давид ионафану и рече: ведая ведает отец твой, яко обретох благодать пред очима твоима, и глаголет: да не познает сего ионафан, негли не восхощет: но жив Господь и жива душа твоя, зане якоже рекох, исполнися между мною и между отцем твоим даже до смерти.

⁴И рече паки ионафан к давиду: чесого желает душа твоя, и что сотворю тебе?

⁵И рече давид ко ионафану: се, новомесячие заутра, и аз седя не сяду с царем ясти, и послеши мя, и скрыюся на поли до вечера дне третияго:

⁶и аще смотря усмотрит мя отец твой, и речеши: прося упросися от мене давид отити до вифлеема града своего, яко жертва дний тамо всему племени:

⁷аще тако речет: благо: мир рабу твоему: аще же жестоко отвещает тебе, разумей, яко совершися злоба от него:

⁸и да сотвориши милость с рабом твоим, яко ввел еси в завет Господень раба твоего с собою: и аще есть неправда в рабе твоем, умертви мя ты, а ко отцу твоему почто тако имаши мя вводити?

⁹И рече ионафан: никакоже (буди) тебе: егда аще разумевая уразумею, яко совершися злоба отца моего, еже приити на тебе, аще и не будеши во градех твоих, аз возвещу тебе.

¹⁰И рече давид ко ионафану: кто возвестит ми, аще отвещает отец твой жестоко?

¹¹И рече ионафан к давиду: иди, и пребуди на поли. И идоста оба на поле.

¹²И рече ионафан к давиду: Господь Бог израилев весть, яко искушу отца моего во время (сие) заутра, или третияго дне, и сие, аще благо будет о давиде, и не имам послати к тебе на поле и возвестити сия во ушы твои:

¹³сия да сотворит Бог ионафану и сия да приложит, аще не возвещу злая на тя, и открыю ухо твое, и отпущу тя, и отидеши в мире: и будет Господь с тобою, якоже бе со отцем моим:

¹⁴и аще убо еще жив буду аз, да сотвориши милость со мною:

¹⁵и аще смертию умру, да не отимеши милости твоея от дому моего до века:

¹⁶аще же ни, егда искоренит Господь враги давидовы, коегождо от лица земли, да обрящется имя ионафане в дому давидове, и изыщет Господь враги давидовы.

¹⁷И приложи ионафан еще клятися давиду, яко возлюби душу любящаго его.

¹⁸И рече ионафан к нему: заутра новомесячие, и присмотрен будеши, яко праздно усмотрено будет место твое:

¹⁹ты же премедлиши три дни и пребудеши на месте твоем, идеже скрыешися в день делания, и сядеши при ергаве онем:

²⁰и аз утрою стрелами стреляя, и стрелю вергая до амаггариа:

²¹и се, послю отрока, глаголя: иди и обрящи ми стрелу: и аще реку отроку: зде стрела от тебе, и зде, возми ю: и ты гряди ко мне, яко мир тебе, и несть о тебе слова, жив Господь:

²²аще же тако реку юноши: тамо стрела от тебе и далее: иди, яко отсла тя Господь:

²³и глагол егоже аз и ты глаголахом, се, Господь свидетель между тобою и мною до века.

²⁴И скрыся давид на поли, и прииде новомесячие, и прииде царь на трапезу ясти,

²⁵и седе царь на месте своем якоже и всегда на престоле при стене, и предвари ионафана, и седе авенир от страны сауловы, и усмотрено бысть (праздно) место давидово.

²⁶И не глагола саул ничтоже в той день, помысли бо, случай видится, нечисту быти, яко не очистися.

²⁷И бысть наутрие месяца в день вторый, и усмотрено бысть праздно место давидово, и рече саул ко ионафану сыну своему: что яко не прииде сын иессеев ни вчера, ни днесь на трапезу?

²⁸И отвеща ионафан к саулу и рече ему: упросися от мене давид до вифлеема града своего ити,

²⁹и рече: отпусти мя ныне (в вифлеем), яко жертва колена нашего во граде, и заповедаша мне братия моя: и ныне аще обретох благодать пред очима твоима, да пойду ныне и узрю братию мою: сего ради не прииде на трапезу цареву.

³⁰И разгневася гневом саул на ионафана зело и рече ему: сыне девок блудниц, не вем ли, яко сообщник еси ты сыну иессееву в срамоту твою и в срамоту откровения матере твоея?

³¹яко во вся дни, в няже сын иессеев жити имать на земли, не уготовится царство твое: ныне убо послав, поими юношу, яко сын смерти есть сей.

³²И отвеща ионафан саулу отцу своему и рече: за что умирает? что сотвори?

³³И верже саул копием на ионафана, еже умертвити его. И позна ионафан, яко совершися злоба сия от отца его, да умертвит давида:

³⁴и вскочи ионафан от трапезы во гневе ярости, и не яде хлеба в день вторый месяца, яко сокрушися о давиде, зане соверши (злобу) на него отец его.

³⁵И бысть заутра, и изыде ионафан на село, якоже совещася о свидении с давидом, и отрок мал с ним.

³⁶И рече отроку: тецы, и обрящи ми стрелы, имиже аз стреляю. И отрок тече, и он стрели стрелою за него.

³⁷И прииде отрок до места стрелы, идеже стрелил ионафан. И возопи ионафан вслед отрока и рече: тамо стрела от тебе и далее.

³⁸И паки возопи ионафан вслед отрока своего, глаголя: потщися скоро, и не стой. И собра отрок ионафану стрелы и принесе их к господину своему.

³⁹Отрок же не уведе ничесоже, токмо ионафан и давид ведеста вещь.

⁴⁰И отда ионафан оружие свое отроку своему и рече отроку своему: поиди и отнеси во град.

⁴¹И егда отиде отрок, и давид воста от ергава, и паде на лице свое, и поклонися ему трижды, и облобыза кийждо друг друга, и плакася кийждо о друг друзе до скончания велика.

⁴²И рече ионафан давиду: иди с миром, и якоже кляхомся мы оба именем Господним, глаголюще: Господь да будет свидетель между мною и тобою и между семенем моим и между семенем твоим до века.

⁴³И воста давид и отиде. Ионафан же вниде во град.