Read Елизаветинская Библия, 1751 1-я Царств 22 Bible Online

1-я Царств 22 - Елизаветинская Библия, 1751 bible

1-я Царств 22

¹И отиде давид оттуду, и спасеся, и прииде в пещеру одолламску: и слышавше братия его и дом отца его, приидоша к нему тамо.

²И собрашася к нему всяк иже в нужде, и всяк должник, и всяк печальный душею, и бе ими обладаяй, и бяше с ним яко четыреста мужей.

³И отиде давид оттуду в массифаф моавитский и рече к царю моавитску: да будут ныне отец мой и мати моя у тебе, дондеже познаю, что сотворит мне Бог.

⁴И умоли лице царя моавитска, и пребываху у него по вся дни, сущу давиду во области той.

⁵И рече гад пророк к давиду: не седи во области сей: иди, и да внидеши в землю иудину. И иде давид и пришед седе в граде сарих.

⁶И слыша саул, яко познан бысть давид, и мужие иже с ним: и саул седяше на холме под дубравою яже в раме, и копие в руку его, и вси отроцы его предстояху ему.

⁷И рече саул ко отроком своим предстоящым ему: слышите ныне, сынове вениаминовы, аще воистинну всем вам даст сын иессеев села и винограды и поставит вас всех в сотники и тысящники:

⁸яко вси согласистеся на мя, и несть открываяй во ухо мое, егда положи завет сын мой с сыном иессеовым, и несть от вас ни един боляй о мне и возвещаяй во ушы мои, яко воздвиже сын мой раба моего на мя врага, якоже день сей?

⁹И отвеща доик сирин приставленый над мсками сауловыми и рече: видех сына иессеева пришедша в номву ко авимелеху сыну ахитову иерею:

¹⁰и вопрошаше о нем Бога, и брашно вдаде ему, и мечь голиафа иноплеменника вдаде ему.

¹¹И посла царь призвати авимелеха сына ахитова, и вся сыны отца его иереи от номвы. И приидоша вси к царю.

¹²И рече саул: слыши ныне, сыне ахитов. И рече: се, аз, глаголи, господине.

¹³И рече ему саул: почто совещался еси на мя ты и сын иессеев, яко вдал еси ему хлеб и мечь, и вопрошал еси о нем Бога положити его на мя во врага, якоже день сей?

¹⁴И отвеща авимелех царю и рече: и кто во всех рабех твоих верен якоже давид, и зять царев, и князь всем заповедем твоим, и славен в дому твоем?

¹⁵еда днесь начах вопрошати о нем Бога? никако: да не возложиши, царю, на раба твоего словесе сего, и на весь дом отца моего, яко не ведяше раб твой во всех сих словесе мала, или велика.

¹⁶И рече царь саул: смертию умреши, авимелех, ты и весь дом отца твоего.

¹⁷И рече царь скороходцем предстоящым пред ним: приведите и избийте иереи Господни, яко рука их с давидом, и понеже познаша, яко бежит той, и не возвестиша во ушию моею. И не хотяху отроцы царевы возложити рук своих на иереи Господни.

¹⁸И рече царь доику: обратися ты, и устремися на иереи. И обратися доик сирин, и уби иереев Господних в той день, триста пять мужей, всех носящих ефуд:

¹⁹и номву град иерейский погуби острием оружия от мужеска полу и до женска, от отрока и до ссущаго, и телца и осла и овчате.

²⁰И угонзе един сын авимелеха сына ахитова, имя ему авиафар, и бежа вслед давида.

²¹И возвести авиафар давиду, яко изби саул вся иереи Господни.

²²И рече давид ко авиафару: ведях в день той, яко тамо бе доик сирин, яко возвещая возвестит саулу: аз есмь виновен о душах дому отца твоего:

²³седи со мною, не бойся, яко идеже аще взыщу души моей место, взыщу и души твоей, яко сохранен будеши ты у мене.