Read Елизаветинская Библия, 1751 1-я Царств 26 Bible Online

1-я Царств 26 - Елизаветинская Библия, 1751 bible

1-я Царств 26

¹И приидоша зифее от знойныя к саулу на холм, глаголюще: се, давид скрыся у нас на холме ехелаф, прямо иессемону.

²И воста саул, и сниде в пустыню зиф, и с ним три тысящы мужей избранных от израиля, искати давида в пустыни зиф.

³И ополчися саул на холме ехелаф иже прямо иессемону при пути, давид же седяше в пустыни. И виде давид, яко идет саул вслед его в пустыню,

⁴и посла давид соглядатаи, и разуме, яко идет саул готов из кеиля:

⁵и воста давид отай, и вниде в место, идеже почиваше саул, и тамо бяше авенир сын ниров, первый воевода его, и саул спаше в колеснице царстей, и людие ополчившеся окрест его.

⁶И отвеща давид и рече ко авимелеху хеттеину и ко авессе сыну саруину брату иоавлю, глаголя: кто внидет со мною к саулу в полк? И рече авесса: аз вниду с тобою.

⁷И внидоста давид и авесса в люди нощию: и се, саул спяй сном в колеснице царстей, и копие его водружено в землю при главе его, авенир же и воини его спаху окрест его.

⁸И рече авесса к давиду: заключи Господь днесь врага твоего в руце твои, и ныне поражу его копием в землю единожды, и не повторю ему.

⁹И рече давид ко авессе: не убивай его, яко кто прострет руку свою на христа Господня, и неповинен будет?

¹⁰И рече давид: жив Господь, аще не Господь поразит его, или день его приидет, и умрет, или на брань снидет и погибнет:

¹¹да не будет ми от Господа нанести руку мою на христа Господня: и ныне возми копие от возглавия его и сосуд водный, и отидем мы о себе.

¹²И взя давид копие и сосуд водный от возглавия его, и отидоста о себе: и не бе иже бы видел или разумел, и не бяше востающаго, вси бо спаху, яко сон крепок от Господа нападе на ня.

¹³И прейде давид на он пол и ста на версе горы издалеча, и мног бе путь между ими.

¹⁴И воззва давид к людем, и авениру рече глаголя: не отвещаеши ли, авенире? И отвеща авенир и рече: кто ты еси зовый мя?

¹⁵И рече давид ко авениру: не муж ли еси ты? и кто, якоже ты, во израили? и почто не храниши господина твоего царя? яко вниде един от людий убити господина твоего царя:

¹⁶и не благо сие (зело), еже сотворил еси: жив Господь, яко сынове смерти вы, не хранящии господа своего царя христа Господня: и ныне виждь, где есть копие царево и сосуд водный, яже беша при главе его?

¹⁷И позна саул глас давидов и рече: твой ли глас сей, чадо давиде? И рече давид: аз раб твой, господи царю.

¹⁸И рече давид: почто гониши раба твоего, господи царю? яко что (ти) согреших? и кая обретеся во мне неправда?

¹⁹и ныне да послушает господь мой царь глаголов раба своего: аще Бог поощряет тя на мя, да будет благовонна жертва твоя: аще же сынове человечестии, прокляти сии пред Господем, яко изгнаша мя днесь не утвердитися в жребии Господни, глаголюще: пойди, работай богом чуждим:

²⁰и ныне да не падет кровь моя на землю пред лицем Господним, яко изыде царь израилев искати души моея, и гонит якоже нощный вран по горам.

²¹И рече саул: согреших: возвратися, чадо давиде, яко ктому не сотворю ти зла, зане честна душа моя пред очима твоима в день сей: безумно сотворих, и погреших много зело.

²²И отвеща давид и рече: се, копие царево, да приидет отрок един и возмет е:

²³и Господь да возвратит коемуждо по правде его и по вере его: якоже предаде тя Господь днесь в руце мои, и не восхотех нанести руки моея на христа Господня:

²⁴и се, якоже возвеличися душа твоя днесь во очию моею, тако да возвеличится душа моя пред Господем, и да покрыет мя и измет мя от всякия печали.

²⁵И рече саул к давиду: благословен ты, чадо, и творяй сотвориши и могий возможеши. И отиде давид в путь свой, а саул возвратися на место свое.