Read Елизаветинская Библия, 1751 1-я Царств 3 Bible Online

1-я Царств 3 - Елизаветинская Библия, 1751 bible

1-я Царств 3

¹И отрочищь самуил бе служа Господеви пред илием иереем, и глагол Господень бе честен в тыя дни, не бе видение посылаемо.

²И бысть в день он, и илий спаше на месте своем, и очи его начаста тяжце быти, и не можаше зрети:

³и прежде неже угасе светилник Божий, и самуил спаше в церкви Господни, идеже кивот Божий,

⁴и воззва Господь: самуиле, самуиле. И рече: се, аз.

⁵И тече ко илию и рече: се, аз, яко звал мя еси. И рече (илий): не звах тебе, возвратися и спи. И возвратися и спа.

⁶И приложи Господь и воззва еще: самуиле, самуиле. И воста самуил и иде ко илию вторицею, и рече: се, аз, яко звал мя еси. И рече: не звах тебе, чадо мое, возвратися, спи.

⁷Самуил же в то время еще не познаваше Бога, прежде откровения ему гласа Господня.

⁸И приложи Господь призвати самуила третицею: и востав, и иде ко илию и рече: се, аз, яко звал мя еси. И разуме илий, яко Господь призывает отрочища, и рече: возвратися и спи, чадо:

⁹и будет аще воззовет тя зовый, и речеши: глаголи, Господи, яко слышит раб твой. И иде самуил, и спа на месте своем.

¹⁰И прииде Господь и ста и воззва его якоже первое и второе: самуиле, самуиле. И рече самуил: глаголи (Господи), яко слышит раб твой.

¹¹И рече Господь к самуилу: се, аз творю глаголы моя во израили, яко всякому слышащему сия пошумит во обоих ушесех его:

¹²в день той воздвигну на илиа вся, елика глаголах на дом его: начну и скончаю:

¹³и возвестих ему, яко отмщу аз на доме его до века в неправдах сынов его, о нихже ведяше, яко злословиста Бога сынове его, и не наказа их:

¹⁴и сего ради кляхся дому илиину, яко не очистится неправда дому илиина в кадилах и жертвах его до века.

¹⁵И спа самуил до утра, и утренева заутра, и отверзе двери храма Господня. Самуил же убояся поведати видения илию.

¹⁶И рече илий к самуилу: самуиле чадо. И рече: се, аз.

¹⁷И рече (илий): что глагол глаголанный к тебе? не скрый убо от мене: сия да сотворит тебе Бог и сия да приложит, аще утаиши от мене слово от всех словес глаголанных к тебе во ушеса твоя.

¹⁸И поведа самуил илию вся словеса, и не утаи от него (ни единаго глагола). И рече илий: Господь сам, еже благо пред ним, да сотворит.

¹⁹И возвеличен бысть самуил, и Господь бе с ним, и не паде от всех словес его на земли (ни един глагол).

²⁰И разумеша вси израилтяне от дана даже и до вирсавии, яко верен самуил Господу во пророцех.

²¹И приложи Господь явитися в силоме, яви бо ся Господь самуилу: и уверися самуил пророк быти Господеви во всем израили, от конца до конца земли. Илий же состареся зело, и сынове его ходяще хождаху, и лукав путь их пред Господем.