Read Елизаветинская Библия, 1751 1-я Царств 31 Bible Online

1-я Царств 31 - Елизаветинская Библия, 1751 bible

1-я Царств 31

¹И иноплеменницы воеваху на израиля, и бежаша мужие израилевы от лица иноплеменнича, и падаху язвеннии на горе гелвуе.

²И снидошася иноплеменницы с саулом и с сынми его, и убиша иноплеменницы ионафана и аминадава и мелхисуа, сыны сауловы.

³И отяготе брань на саула, и обретоша его копейницы мужие стрелцы, и уязвен бысть (саул) во утробу.

⁴И рече саул к носящему оружие его: изсуни мечь твой и прободи мя им, да не приидут необрезаннии сии и избодут мя, и поругаются мне. И не хотяше носяй оружие его, яко убояся зело. И взя саул мечь свой и паде на него.

⁵И виде носяй оружие его, яко умре саул, и паде и той на мечь свой и умре с ним.

⁶И умре саул и трие сынове его, и носяй оружие его, и вси мужие его в день той купно.

⁷И видеша мужие израилстии, иже об он пол юдоли и иже об он пол иордана, яко бежаша мужие израилстии, и яко умре саул и сынове его, и оставиша грады своя и бежаша: и приидоша иноплеменницы и вселишася в них.

⁸И бысть на утрие, и приидоша иноплеменницы обнажити мертвых, и обретоша саула и три сыны его падшыя на горе гелвуе,

⁹и обратиша его, и сняша оружие его, и отсекоша главу его, и послаша в землю иноплеменничу окрест возвещающе идолом их и людем их:

¹⁰и положиша оружие его у астарта, тело же его воткнуша на стене вефсамли.

¹¹И услышаша живущии во иависе галаадитийстем, яже сотвориша иноплеменницы саулу,

¹²и восташа вси мужие сильнии, и идоша всю нощь, и взяша тело саулово и тело ионафана сына его с стены вефсамски, и принесоша я во иавис, и сожгоша я тамо:

¹³и взяша кости их, и погребоша я в дубраве яже во иависе, и постишася седмь дний.