Read Елизаветинская Библия, 1751 1-я Царств 5 Bible Online

1-я Царств 5 - Елизаветинская Библия, 1751 bible

1-я Царств 5

¹И взяша иноплеменницы кивот Божий и изнесоша его от авенезера во азот:

²и взяша иноплеменницы кивот Господень и внесоша его в храм дагонов, и поставиша его близ дагона.

³И обутреневаша азотяне наутрие и внидоша в храм дагонов: и увидеша, и се, дагон паде на землю на лице свое пред кивотом Божиим. И воздвигоша дагона, и поставиша его на месте своем.

⁴И бысть егда восташа заутра, и се, дагон лежаше лицем на земли пред кивотом завета Господня: глава же дагонова и обе плесне ног его отяты на празе особо каяждо, и обе длани рук его лежаще при дверех, точию труп дагонов остася.

⁵Того ради не вступают жерцы дагоновы и вси входящии в храм дагонов на праг дому дагонова во азоте даже до дне сего: яко преступающе преступают.

⁶И отяготе рука Господня на азоте, и наведе на них, и воскипе им на седалищах их, во азоте и в пределех его, и посреде страны его умножишася мышы: и бысть смущение смерти велико во граде.

⁷И видеша мужие азотстии, яко тако (бысть), и глаголаша: яко не пребудет кивот Бога израилева с нами, яко жестока рука его на ны и на дагона бога нашего.

⁸И пославше собраша воевод иноплеменничих к себе и глаголаша: что сотворим кивоту Бога израилева? И реша гефее: да прейдет кивот Бога израилева к нам в геф. И прейде кивот Бога израилева в геф.

⁹И бысть по прешествии его, и бысть рука Господня на граде, мятеж велий зело: и порази мужы града от мала до велика, и порази их на седалищах их. И сотвориша гефее себе седалища (злата),

¹⁰и отпустиша кивот Божий во аскалон. И бысть егда вниде кивот Бога израилева во аскалон, и возопиша аскалонитяне глаголюще: почто возвратисте кивот Бога израилева к нам, уморити ны и люди нашя?

¹¹И послаша и собраша вся воеводы иноплеменничи и реша: отпустите кивот Бога израилева, и да поставится на месте своем, и да не уморит нас и людий наших. Яко бысть мятеж смерти во всем граде тяжек зело, егда вниде кивот Бога израилева тамо.

¹²И живущии и не умершии уязвишася на седалищах, и взыде вопль града до небесе.