Read Елизаветинская Библия, 1751 1-я Царств 9 Bible Online

1-я Царств 9 - Елизаветинская Библия, 1751 bible

1-я Царств 9

¹И бе муж от сынов вениаминовых, емуже имя кис, сын авиилов, сына иаредова, сына вахирова, сына афекова, сына мужа иеминеова, муж силен крепостию.

²И сему бе сын, имя ему саул, добровеличен, муж благ: и не бе в сынех израилевых благ паче его, от рамен и выше высок паче всех людий.

³И заблудиша ослята киса отца саулова. И рече кис к саулу сыну своему: возми с собою единаго от отрок, и воставше идите и поищите ослят.

⁴И проидоша гору ефремлю, и проидоша землю селха, и не обретоша: и проидоша землю сегалимлю, и не бе: и проидоша землю иаминю, и не обретоша.

⁵И пришедшым им в землю сифову, и рече саул ко отроку своему иже с ним: гряди и возвратимся, да не како отец мой оставя ослята, печется о нас.

⁶И рече ему отрок: се, зде человек Божий во граде сем, и человек славен: все еже аще речет приходящым к нему, будет им: и ныне пойдем тамо, да возвестит нам путь наш, имже пойдем.

⁷И рече саул отроку своему иже с ним: се, пойдем, и что принесем к человеку Божию? яко хлебы оскудеша от вретищ наших, и ктому несть у нас, еже внести к человеку Божию от имения нашего.

⁸И приложи отрок отвещати саулу и рече: се, обретается в руце моей четвертая часть сикля сребра, и даси человеку Божию, и возвестит нам путь наш.

⁹Прежде бо во израили сице глаголаше кийждо, егда кто идяше вопрошати Бога: гряди, да идем к прозорливцу: яко пророка нарицаху людие прежде прозорливцем.

¹⁰И рече саул отроку своему: добр глагол твой: гряди, да идем. И идоша во град, идеже бе человек Божий.

¹¹Восходящым же им на восход града, и се, обретоша девиц изшедших почерпсти воды, и реша им: есть ли зде прозорливец?

¹²И отвещаша им девицы, глаголющя: есть, се пред лицем вашим: ныне же потщитеся, яко дне ради грядет во град, яко жертва днесь людем в ваме:

¹³и егда внидете во град, тако обрящете его во граде, прежде неже взыти ему в ваму ясти: яко не имут ясти людие, дондеже внидет сей, яко той благословит жертву, и по сих ядят страннии: и ныне взыдите, яко дне ради обрящете его.

¹⁴И взыдоша во град. Имже входящым среди града, и се, самуил изыде во сретение им, еже взыти в ваму.

¹⁵И Господь откры во ухо самуилу днем единым прежде пришествия к нему сауля, глаголя:

¹⁶якоже время сие, утро послю к тебе мужа от племене вениаминова, и да помажеши его царя над людьми моими израилем, и спасет люди моя от руки иноплеменничи: яко призрех на смирение людий моих, яко взыде вопль их ко мне.

¹⁷И виде самуил саула, и Господь рече к нему: се, человек, о немже рекох ти: сей будет в людех моих царствовати.

¹⁸И приближися саул к самуилу посреде града и рече: возвести ми, который дом прозорливца.

¹⁹И отвеща самуил саулу и рече: аз сам есмь: взыди предо мною в ваму, и яждь со мною днесь, и отпущу тя заутра, и вся яже в сердцы твоем возвещу ти:

²⁰и о ослятех твоих заблудивших днесь третий день, не помышляй в сердцы своем о них, ибо обретошася: и кому красная израилева? не тебе ли и дому отца твоего?

²¹И отвеща саул и рече: не сын ли есмь аз мужа иеминеа, меншаго скиптра племене израилева? и племене малейшаго от всего скиптра вениаминова? и отечество мое меншее паче всех отечеств вениаминовых? и вскую глаголал еси ко мне по глаголу сему?

²²И поят самуил саула и отрока его, и введе я во обиталище, и даде им тамо место в первых званых, яко в седмидесяти мужех.

²³И рече самуил повару: даждь ми часть, юже дах ти, и о нейже рех ти положити ю у себе.

²⁴И взя повар плече, и предложи е саулови. И рече самуил саулу: се, избыток, предложи пред ся и яждь, яко во свидетелство предложися тебе паче иных, прикоснися. И яде саул с самуилом в той день.

²⁵И сниде от вамы во град, и постлаша саулови на горнице, и спа.

²⁶И бысть егда приближашеся утро, и воззва самуил саула на горнице, и рече: востани, и отпущу тя. И воста саул, и изыде сам и самуил вон.

²⁷Имже исходящым в часть града, и рече самуил к саулу: рцы юноши, да предидет пред нами: а ты стани якоже днесь, и слышан сотворю тебе глагол Божий.