Read East Ambae MATIU 10 Bible Online

MATIU 10 - East Ambae bible

MATIU 10

¹I Jisas mo ware bulutegi na nona rorongtagi hangavulu domwagi gairue, ko mo bete na managi lawera huri ve rain vuro lue na vui esi ko rain vagamwasoire ram sege gina lalangai segeana u sao.

²Ngere ngaha na henara gaihora hangavulu domwagi gairue: muegi Saemon (mo warea ve i Bita) ko tuana Andru; ko i Jemis tona tuana Jon, tamara Sebedi;

³i Vilib ko i Batolomiu, i Tomas ko i Matiu a tangaloi vilevile homu; i Jemis tamana Alvius ko i Tadius;

⁴i Saemon i Garohuri ko i Judas Iskariot ngehi u rongo na leoi gai Jisas.

⁵I Jisas mo horara ngerehi hangavulu domwagi gairue ko mo tau na leo lawera mo veve vena: “Nen mese vano lolo loloi vanuara haroharo sige lolo togagi vanuara ta Samaria.

⁶Nge nen vano lobera sibsib rau sala dena sinobu a duvi Israel.

⁷Nen vano, nen toretore vena, ‘A mwasoana garaqa i God mo ratahigi lolona mo kakarani vena vonai!’

⁸Nen vagamwasoire ram sege, nen vai ragasire rau mate, nen vagamwasara ginire vohavono, ko nen vuro lue na vui esi. Neu lai vurogi, siu nen bete vurogi.

⁹Nen mese hako homu mei gimiu, kol sige a silva sige a beni maeto;

¹⁰nen mese hako tanga lune nem dige, sige luqe leleahi, sige a butu, sige a gaitigo. Huri u tatarise huri ve a tangaloi tabanagi vin lei na nona gaitawe.

¹¹“Lune nem dadari lo qatui venue sige lo mahoi venue, nen leo huri ve ihine mo tarani ve vin lei vurugegi gimiu, ko nein toga lobena vin dadari lune hi nein mule taligu.

¹²Lune nem ahu lolo vale nen veve vena, ‘A tamwata lobemiu.’

¹³Tare ve ira tangaloi lolo vale hi ram lai vurugegi gimiu, nomiu tamwata na hivo lo ulure; nge tare ve ingere rahe lai vurugegi gimiu tea, nomiu tamwata na tudori lawe gimiu.

¹⁴Ko tare ve nein dadari lolo vale sige lo qatui venue rahe lai vurugegi gimiu tea, sige ra he rongo huri na nomiu leo tea, siu nein tudori denire, nen heheragi vohogi na qie dena karumiu.

¹⁵A hogo, nam veve lawe gimiu vena, lo Rani Vevegi God vin hahagavi huri na sinobu ta Sodom ko ta Komora vin lai sinobu talo qatui venue ngehi!

¹⁶“Leo! Nam hora gimiu mwere na sibsib lolo livugei wiriu turu. Nen mataisao mwere na mwata ko nein rorongo mwere na rangamea.

¹⁷Nen leogoro gimiu dena tangaloi teri, huri rain lei gimiu su lo kot, ko rain vivihi gimiu lolo nora valei soneana.

¹⁸Rain revei gimiu sulo nagora kavman meire ratahigi hurieu, huri na gigilegi lawera ko lawera haroharo.

¹⁹Lune rain siregi gimiu vano lo kot, nen mese lado vagatai gitomue ve nen veve wuraha; lo tarogi ngehi vin bete lawe gimiu hava gineu gimiu nein laqagi.

²⁰Huri nein he laqa tea gina leomiu sibomiu, ne gina leo mo vonai dena Vui noi Tamamiu vin laqagi lue lolo lolomiu.

²¹A tangaloi vin siregi tuana sibona huri mateana, ko tamagi, netune; ko ira neture rain maraga goro tamara mei retahire ko rain sireginire huri mateana.

²²A tangaloi doluegi rain sebugi gimiu huri na henaku. Nge ihine vin labe siaga vin dadari lo rovonagi vin mwaso.

²³Lune rain veivei gimiu lolo vanue gatagale, nein toa sulo vanue tuegi. A hogo, nam veve lawe gimiu, nein he dige dali na togagi venue hi a duvi Israel tea mosigei lune i Netui Tangaloi vin vonai.

²⁴“I rorongtagi he lawua tea dena nona huhui; ko a tangaloi tabanagi he lawua tea dena nona huqegi ratahigi.

²⁵U garea mena rorongtagi ve vin tatarise mena nona huhui, ko a tangaloi tabanagi ve vin tatarise mena nona huqegi. Tare ve ingere rau wareau, ineu mwere na huqei vale, gi Bielsibul, a henai muei vui esi, rain ware gimiu wuraha, gimiu mwere na burigi talolo vale ngaha.

²⁶“Nen mese mataguginire sinobu. A hava gineu u luqe goro tau vin vuge talahaginie, ko vataha gineu rau eno vunigi vin leire talo ute lawua.

²⁷A hava gineu nam veve lawe gimiu lolo dodogi nge gimiu nein veve lue lolo leleo. A hava gineu u ngutugi lawe gimiu nein laqagi lue lo vuhungei vale.

²⁸Nen mese mataguginire ram wehi na betugi nge rain he ue lai na tamategi tea; nge nein matagu hageliu gi God ingeie vin vei vohogi lai na betugi ko a tamategi lo gagarasi redu.

²⁹A manveve gairue rain sogagi laire huri na vatu hangavulu; nge gatagale denire vin he soi tea ta lo tano tare ve Tamamiu he ilo tea.

³⁰Ko igimiu, u velu bulutegi beno na vulumiu doluegi beno lo qatumiu.

³¹Mwerehi, gimiu nen mese matagu: huri gimiu neu liuhage dena manveve u sao!

³²“Tare ve ihine mo serelue lo nagora sinobu vei ingeie a noku tangaloi, ineu nain serelue mwerehi vage lo nagoi Tamaku eulu.

³³Tare ve ihine mo tahau lo nagora sinobu, ineu nain tahae vage lo nagoi Tamaku eulu.

³⁴“Nen mese lado ve ineu nau vonai ve nan lei na tamwata siu lo ure; hatie, na he vonai tea ve nain lei na tamwata, nge a bue.

³⁵Huri nau vonai ve nan vilewahe na maresu mwera dein tamana, ko a maresu vavine den retahine, ko i vaga buine den i tubune;

³⁶ko a tangaloi, a nona tavului vuro ngerehi a duvine sibona.

³⁷“Ihine mo tabe tamana tona retahine liu denieu nge he tatarise tea ve vin voragi noku tangaloi; ko ihine mo tabe netune mwera sige vavine liu denieu nge he tatarise tea ve vin voragi noku tangaloi.

³⁸Ihine he wali tea nona gai saroutu vena huri lo taikeruku nge he tatarise tea ve vin voragi noku tangaloi.

³⁹Ihine mo tarani vena hako bibi na mwasoana vin vei salaginie; ko ihine mo vagasalagi na mwasoana hurieu vin hako bibie.

⁴⁰“Ihine mo lai vurugegi gimiu mo lai vurugegieu; ko ihine mo lai vurugegieu mo lai vurugeginie hi u horau vonai.

⁴¹Ihine mo lai vurugegi na tangaloi veve rarai a vevenagi ingeie a tangaloi veve rarai nge vin lei na duvi gaitawe noi tangaloi veve rarai; ihine mo lai vurugegi na tangaloi vovohoi a vevenagi ingeie a tangaloi vovohoi nge vin lei na duvi gaitawe noi tangaloi vovohoi.

⁴²Tare ve ihine tea mo bete na wai inuinu lawe gatagale biti denire noku rorongtagi a vevenagi ingeie mo hurieu, a hogo, nam veve lawe gimiu ve nge vin he vagasalagi na nona gaitawe tea.”