Read East Ambae MATIU 11 Bible Online

MATIU 11 - East Ambae bible

MATIU 11

¹Lune i Jisas u veve na leo huhui ngaha beno lawera nona rorongtagi hangavulu domwagi gairue, nge mo siregi na ute ngehi ko mo vano tuturedu mo huhui ko mo toretore lolo togagi venue kakarani aie hi.

²Lune i Jon Garuhigogona u rongo lolo valei vauveu huri na tabanagi noi Kraes, nge mo horara lavasigi denire nona rorongtagi lawe Jisas, ram veve vena,

³“?Iniko hi i Jon u veve vena goin vonai, sige gamai gain rarai hine wagineu?”

⁴I Jisas mo duvi lawera vena, “Nen vano taligu, nen veve lawe Jon a hava gineu nem rongo ko nem leo:

⁵ira matadodo ram leo, ira lukuluku ram dige, ira vohavono ram mwasara, ira qerovono ram rongo ira mate ram mwaso, ko nam laqagi na Roro Garea lawera mahogi.

⁶Havuhevu mei hine he ladogairue tea hurieu!”

⁷Siu ira rorongtagi noi Jon ram vano taligu, i Jisas mo veve lawera sinobu huri Jon vena: “?Lune gimiu neu vano lobei Jon lolo vanue vurogi, a hava gineu gimiu nem vano ve nein leo? ?A mavuro mo mwagilugilu gena langi?

⁸Hatie! ?Tau a hava gineu nem vano ve nein leo? ?A tangaloi mo luqegi na luqe u raka? Hatie! Ingere ram saru luqe u raka ram toga lolo valera ratahigi.

⁹?Tau, huri hava gineu gimiu nem vano? ?Ve nein lehi na tangaloi veve rarai? Io, nam veve lawe gimiu vena, u liuhage dena tangaloi veve rarai.

¹⁰I Jon hi ingeie a tangaloi God u veve hurie lolo Reve reve Gogona vena: ‘Leo! Nam hora na noku gaihora tomuegi goro na nagomu ve vin vagararai na matahalamu raraigo.’

¹¹A hogo, nam veve lawe gimiu vena, i Jon Garuhigogona nge u lawua liu dena tangaloi doluegi ngerehi rau vora beno. Nge ihine mo ladomavagi God ve a nona Ratahigi, nge ingeie u biti denire wagineu ram ladomavagi God ngerehi, nge u lawua den Jon.

¹²Lo tarogi hi Jon u tevuigi na nona toretore mo dadari bagataha, nge a tangaloi ram qalo mei rahine hi God u voragi nora Ratahigi beno. Nge a tavului vuro ngerehi ram vaileo ve ran lai na tangaloi ngerehi, ve ran voragi nora tangaloi.

¹³Ira veve rarai ko a Leo hora noi Mosis rau laqagi huri na mwasoana garaqa God mo ratahigi lolona vin dadari lo taroi Jon;

¹⁴tare ve gimiu nem tarani ve nen ladohogo gina nora leo, i Jon hi ingeie i Elaeja, rau serelue beno ve vin vonai.

¹⁵Tare ve a qeromiu lumiu, nen rongoe!

¹⁶“?Tau, nain vei na gato tavalu wuraha huri na sinobu tau bagataha? Rau mwere na maresu teri ram toga lo sarai volivoli, ram ulouloginire vena,

¹⁷‘Gamai gau uvi bue lawe gimiu, nge gimiu nehe wetu tea! Gamai gam huri ahi mateana mei gimiu, nge gimiu nehe tangi tea!’

¹⁸I Jon u vonai, nge u gologolo he inu tea waen, nge ingere ram veve vena, ‘A vui esi lune!’

¹⁹I Netui Tangaloi u vonai, ko nge u gagani ko u inu, nge ingere ram veve vena, ‘Leo, ingeie a tangaloi u geni lawua ko u inu garagara waen; ko ingeie a buluana nora vilevile homu meire galegaleasi!’ U lehe ve a mataisao noi God a hogo lo mwasi nona tabanagi.” A togagi venue rahe ladohogo tea (Luk 10: 13-15)

²⁰Siu i Jisas mo tauvuigi mo garogi na vanue ngerehi, aiehi mo vai na nona managi u sao, a vevenagi a sinobu rahe ladowenigi tea.

²¹Hahagavi hurigo, Korasin! Hahagavi hurigo, Betsaeda! Huri tare ve u vei na managi lo vanue Taea ko Saedon mwere u vei lawe gimiu, tuei vohogi a sinobu aie rau seru gorora gina luqe buburesige ko rau tataviginire gina qie, a gigilegi ve ram ladowenigi dena nora galegaleasi!

²²Nen ladobibi tau, ve lo Rani Vevegi God vin hahagavi liu huri na sinobu ta Taea ko Saedon dein gimiu!

²³Ko igimiu ta Kabeniam! ?Neu tarani ve nen tabe kalo gimiu su lo eulu? Vin tuli gimiu sulo gagarasi redu! Huri tare ve u vei na managi lo vanue Sodom mwere u vei lawe gimiu, a vanue Sodom vin toga dadari lo rani bagataha!

²⁴Nen ladobibi tau, ve lo Rani Vevegi God vin hahagavi liu huri na sinobu ta Sodom den gimiu!”

²⁵Lo tarogi hi Jisas mo veve vena: “E Mama, Huqe ta eulu ko lovavagi! Nam veve gareaginigo huri gu vunigi na gineu teri denire rau iloilo ko rau mataisao, ko gu haharaginire lawera haroharo.

²⁶Io Mama, huri ve u garea mwerehi lo nagomu.

²⁷“I Tamaku u bete na gineu doluegi laweau. Ihine he ilo tea i Netui nge hogosie i Mama, ko ihine he ilo tea i Mama nge hogosie i Netui, mei rahine i Netui mo haharaginie lawera.

²⁸“Nen vonai lobeku, igimiu doluegi nem wiriwiri ko mo kui gimiu, nain vei gimiu nem manga.

²⁹Nen wali na noku gaiweli ko nen hikehike denieu, huri neu nau rorongo ko nau dom wuweu lolo taqangiku; ko igimiu nen haqe na tanoi mangaana.

³⁰Huri a noku gaiweli u makemu, ko a noku hakohako u mamarae.