Read East Ambae MATIU 13 Bible Online

MATIU 13 - East Ambae bible

MATIU 13

¹Lo rani hi i Jisas mo mwalue dena vale, mo vano mo toga hivo lo mwararai wei huri vena huhui.

²A sinobu sao ram sone lobena; giniehi, i Jisas mo kalo mo toga lolo aka, ko a sinobu ram labe lolo one.

³Nge mo laqa lo gato tavalu lawera huri na gineu sao, mo veve vena: “A tangaloi gatagale mo vano mo gaburegi na toli.

⁴Ko lune nge mo gaburegi, lavasigi ram soi lo turegi, ko a manu ram vonai ram gani vohoginire.

⁵Lavasigi ram soi lo ului vetu, a tano raraga aie; ko siserigi ram tubu hage, a vevenagi a tano he bue tea.

⁶Ko lune a aho mo kalo mo hure na rivurivu, ko ram koru huri a goarigi hatie.

⁷A toli lavasigi ram soi talolo garo kau, ko a garo kau ram tubu hage, ram vivire.

⁸Nge a toli lavasigi ram soi lolo tano garea, ram wai mwasigi lure, lavasigi vudolue, lavasigi ngavulu gaiono, ko lavasigi ngavulu gaitolu.”

⁹Ko i Jisas mo veve vena, “!Tare ihine a qerona, na ronghuri vurugegi!”

¹⁰Ira rorongtagi ram vonai lobei Jisas ram huie vena, “?Huri hava gineu gom laqa lawera lo gato tavalu?”

¹¹I Jisas mo duvi vena: “U bete lawe gimiu ve nein ilo na gineu gona talo doridorigi ve i God vin voragi Ratahigi goro na nona tangaloi, nge hatie lawera tangaloi wagineu.

¹²Huri ihine mo lai vin bete lawea vage ko nge vin lei nona vin liuliu vage; ko ihine he lai tea vin lei vohogi nona lalaie denie.

¹³A vevenagi ngaha nam laqa lawera lo gato tavalu; a vevenagi ram matamatagi, ra he lehe tea, ko ram rongorongo, ra he rongo tea, ra he iloilo te hurie.

¹⁴Mwerehi mo vagahorongi lawera a leo veve rarai noi Aesaea, lune God mo veve vena: ‘Nein rongorongo, nge nein he ilo tea; nen matamatagi, nge nein he leo lai tea.

¹⁵A vevenagi a domire sinobu hi rau dalodaloga; ingere ram soso goro qerora, ko ram qeli vonvonogi na matara, vaiteu ram leo gina matara, sige ram rongo gina qerora, sige ram ilo gina lolora, ko rain tudori taligu ko nain vagamwasoire.’

¹⁶“Nein havuhevu mei gimiu, huri na matamiu ram leo ko a qeromiu ram rongo!

¹⁷A hogo, nam veve lawe gimiu vena, ira tangaloi veve rarai u sao ko ira vovohoi u sao rau tarani garagara ve rain lehi na gineu teri gimiu nem leo, ko ingere ra he lehire tea, ko ve rain rongo na gineu teri gimiu nem rongo, ko ngere ra he rongora tea.

¹⁸“Siu, gimiu nein rongo huri na gato tavalu huri na tangaloi gaburegi toli.

¹⁹Ihine mo rongo na leo huri na mwasoana garaqa God mo ratahigi lolona ko nge he ilo te vurugegi hurie, ngehi mwere na toli rau soi lo turegi. Tau i Gineu Esi mo vonai mo vile vohogi na toli lolo lolona.

²⁰A toli u soi lo ului vetu, ngehi a tangaloi ram rongo huri na leo ko siserigi ram laie gina havuhevu.

²¹Nge hatie goarigi lune, ko mo mauri qilodo. Giniehi, lune a gineu esi sige a gagarasi mo vonai huri na leo, siserigi nge mo siregi vohogi.

²²A tangaloi lavasigi ram mwere na toli ngehi mo soi lolo garo kau. Ngerehi ram rongo na leo, nge ram lado lawua huri na gineu talo ure, ko a kaliana huri na lalaie ram vivi na leo, ko ra he mwasigi tea.

²³Nge a toli u gaburegi lolo tano garea, ngehi a tangaloi u rongo na leo ko u ilo hurie: mo wai mwasigi lune, lavasigi vudolue, lavasigi ngavulu gaiono, ko lavasigi ngavulu gaitolu.”

²⁴I Jisas mo veve na gato tavalu wagineu lawera: “A mwasoana garaqa God mo ratahigi lolona u mwere na tangaloi mo gaburegi na toli garea lolo talune.

²⁵Lune ingere ram maturu, a nona tavului vuro mo vonai ko mo rivu na mwahilehile mena kon ko mo mule taligu.

²⁶Lune a kon mo tubu hage ko mo vire, mo lehi na mwahilehile vage.

²⁷Ira tangaloi tabanagi ram veve lawe na huqei talu vena, ‘?Ratahigi, niko go he gaburegi tea a toli garea lolo talumu? ?Tare mwerehi, a mwahilehile ram vonai logo?’

²⁸Mo duvi lawera mo veve vena, ‘A tavului vuro u veie.’ Ira tangaloi tabanagi ram veve lawea vena, ‘?Wa iniko gom tarani vena gan vano ko gan gahi vohoginire?’

²⁹Mo veve vena, ‘Hatie, vaiteu nem havu na kon lune nem gahi na mwahilehile.

³⁰Nen sireginire ron mauri bubugi vin dadari lo taro matue, ko lo taro matue nain veve lawera tangaloi tabanagi vena: Nen gahi vohogi na mwahilehile tomue, nem vau bubuginire, ko nem horara; siu nem vilegi na kon sulo noku qea.’ ”

³¹I Jisas mo veve na gato tavalu wagineu lawera: “A mwasoana garaqa God mo ratahigi lolona u mwere na toli baka, u biti dena toli doluegi;

³²a tangaloi mo laie mo rivue hivo lolo talune, ko lune mo mauri, u lawua dena gai doluegi, mo voragi na gai lawua ko a manu ram vonai ram tau na mwagunire lo rangagi.

³³I Jisas mo laqagi na gato tavalu wagineu lawera: “A mwasoana garaqa God mo ratahigi lolona u mwere na isi. A vavine mo laie ko mo kae bubuginie mena flaoa, vin dadari lune vin vuge doluegi.”

³⁴Vataha na gineu ngaha doluegi i Jisas mo laqa lawera sinobu lo gato tavalu; he laqa tea lawera tavala varea dena gato tavalu.

³⁵Mwerehi mo vagahorongi na leo nona tangaloi veve rarai vena: “Nain laqa lawe gimiu lo gato tavalu, nain wuwangagi na gineu teri rau toga vunigi lo taro hi a ureure u tevuigi.”

³⁶Siu i Jisas mo siregi na sinobu mo ahu lolo vale. Ira nona rorongtagi ram vonai lobena ram veve vena, “Matamwasaragi lawe gamai a gato tavalu huri na mwahilehile lolo talu.”

³⁷Nge mo duvi vena: “A tangaloi gaburegi toli garea nge i Netui Tangaloi;

³⁸a talu hi a ure; a toli garea ngerehi ira sinobu talo mwasoana garaqa God mo ratahigi lolona; a mwahilehile hi ingere ira sinobu noi Gineu Esi;

³⁹a tavului vuro u gaburegi na mwahilehile ingeie i Vui Esi. A taro matue hi a vagasigi ure; ira tangaloi tabanagi ira engsel.

⁴⁰Mwere u gehi vohogi na mwahilehile ko mo tulire sulolo avi, vin mwerehi vage lo vagasigi ure:

⁴¹i Netui Tangaloi, vin hora vonai ira nona engsel rain lei vohogi na gineu ngerehi ram vai na tangaloi ram soi lo galegaleasi, meire tangaloi ram vai na gineu esi. Ingere hi rain he toga bubugi tea meire tangaloi ngerehi nam ratahigi gorora.

⁴²Ko rain tuli vohoginire sulolo walui evi ko aiehi rain ngara ko rain gesingerengere.

⁴³Lo tarogi hi ira vovohoi rain varavara mwere na aho lolo mwasoana hi Tamara mo ratahigi lolona. Tare ihine a qerona, na ronghuri vurugegi!

⁴⁴A mwasoana garaqa God mo ratahigi lolona u mwere na homu u toga vunigi lolo talu. A tangaloi u haqea ko mo tau vuniginie taligu. Nge mo havuhevu garagara hurie, giniehi nge mo mule mo sogagi vovohogi na nona vataha gineu, siu mo voli na talu hi gi talune.

⁴⁵“Taligu, a mwasoana garaqa God mo ratahigi lolona u mwere na tangaloi sosogagi mo hike huri na matai vetu garea.

⁴⁶Ko mo haqe na matai vetu gatagale u garea liu, nge mo mule ko mo sogagi vovohogi na nona vataha gineu, siu nge mo volie.

⁴⁷“Taligu, a mwasoana garaqa God mo ratahigi lolona u mwere na gabe revereve u tulie sulolo wai, ko a lalangai ige rau hola lolona.

⁴⁸Ko lune a gabe u horo, ingere ram reveie su varea, ram toga hivo ko ram vilewahe na ige gagarea gi ram hogonire lolo gete, ko ingere ram tuli vohoginire hi rau esi.

⁴⁹Vin mwerehi lo vagasigi ure: ira engsel rain mwelue vano rain vile vohoginire hi rau galegaleasi lolo livugara hi rau vovohoi,

⁵⁰ko rain tuli vohoginire sulolo walui evi, ko aiehi rain ngara ko rain gesingerengere.”

⁵¹I Jisas mo huire vena, “?Igimiu neu ilo vurugegi na gineu ingere ngaha?” Ngere ram duvi lawea vena, “Io.”

⁵²Siu nge mo veve lawera vena, “A vevenagi ngaha, vataha na huhui talo Leo hora noi Mosis mo voragi na rorongtagi lolo mwasoana garaqa God mo ratahigi lolona u mwere na tangaloi a huqei vale, mo lai lue dena nona lalaie a gineu u garaqa ko u malea.

⁵³Lune i Jisas mo veve vagasigi na gato tavalu ingere ngaha, nge mo siregi na ute ngaha

⁵⁴ko mo mule taligu sulo vanuana. Nge mo huhuire lolo nora valei soneana. Giniehi, ingere ram awogi, ram veve vena, “?Ingeie mo lai na mataisao ko a managi ngaha logo?

⁵⁵?Wa ingeie hatie i netui tangaloi mwegu? ?Wa hatie ve i retahine Meri ko retuana Jemis, Josev, Saemon ko Judas?

⁵⁶?Ko hatie ire haqena vage mei gide? ?Siu nge mo lai na gineu ingere ngaha doluegi logo?

⁵⁷Ko ram taturegi hurie. I Jisas mo veve lawera vena, “Ram siesiegi na tangaloi veve rarai hogosie lo vanuana ko lo valena.

⁵⁸He vai na managi tea vena sao aie a vevenagi ingere rahe ladohogo tea ginie.