Read East Ambae MATIU 14 Bible Online

MATIU 14 - East Ambae bible

MATIU 14

¹Lo tarogi ngehi i Herot a ratahigi ta Kalili u rongo huri na roroi Jisas,

²ko nge mo veve lawera nona tangaloi vena, “Jisas hi Jon Garuhigogona nge u maraga taligu dena mateana; ko a vevenagi hi a managi ingere ngaha ram lalakogi meie.”

³A vevenagi i Herot u lei Jon u veuhie, u teue lolo valei vauveu. I Herot mo vai mwerehi a vevenagi Herodias. I Herodias hi u legi mei Vilib, tuei Herot, nge i Herot u lei na vavine hi, i gahorai tuana, u legi meie.

⁴Huri Jon Garuhigogona u veve vena, “He vovohoi tea huri ve gom lagi meie.”

⁵I Herot u tarani ve vin vagamatea, tau nge mo matagu gena sinobu, huri ingere rau ladohogo ginie vei nge a tangaloi veve rarai.

⁶Lo rani hi a rani voraana noi Herot, a taqalugu netui Herodias mo wetu lo nagora sinobu ko i Herot mo lehe garea mo wetu.

⁷Giniehi, nge mo lai na varatau mo haharigi lawea huri ve vin bete lawea a hava gineu nge vin tarani.

⁸I retahine mo garoginie ko a taqalugu mo veve vena, “Gon bete laweau tangaha a qatui Jon Garuhigogona lolo laha.”

⁹A ratahigi nge mo hahagavi, tau, a vevenagi huri a nona haharigi lo nagora nona buluana nge mo tau na leo ve vin bete lawea.

¹⁰Nge mo hora na tangaloi vuro vena nen tai utuhi na qatui Jon Garuhigogona lolo valei vauveu.

¹¹Ko mo haloe mo vonai meie lolo laha mo betea lawe na taqalugu hi ko ingeie mo betea lawe retahine.

¹²Ira rorongtagi noi Jon ram vonai, ram lai na betune ko ram tuleginie; ko ram vonai ram laqagi hurie lawe Jisas.

¹³Lune i Jisas mo rongo huri na gineu ngaha, nge mo siregi na ute ngaha, mo vano lo aka sulo vanue vurogi. Tau a sinobu ram rongoe ram siregi na vanuara ko ram hurie lo tano.

¹⁴Lune i Jisas mo rovo hage varea, mo lehi na sinobu u sao, mo hagavire, ko mo vagamwasoire rau sege.

¹⁵Lune mo revirevi, ira nona rorongtagi ram vonai lobena ram veve vena, “Mo tauvuigi mo dodo, ko a tangaloi rahe toga tea lo mahoi ute ngaha. Gon hora mulegi na sinobu huri ve rain vano lategi lolo qatui venue, ran voli gara hinaga sibora.”

¹⁶I Jisas mo veve lawera vena, “Hatie gineu mwerehi ve rain mule. Nge nen bete tea hinaga lawera ran gani.”

¹⁷Ingere ram duvi lawea vena, “Gamai hatie gineu mei gamai hogosie a bereti gailime ko a ige gairue.”

¹⁸I Jisas mo veve vena, “Gimiu nen laire vonai laweau.”

¹⁹Ko nge mo hora lawera sinobu vena ingere ran toga hivo lolo duvu; siu nge mo lai na bereti gailime ko a ige gairue, mo dada sueulu, mo vevegareagi God hurie. Vunu mo vise vurivuri na bereti hi, mo laie lawe na nona rorongtagi, ko ira rorongtagi ram betea lawe na sinobu.

²⁰Ko ingere doluegi rau geni rau guqe. Siu a nona rorongtagi rau vile bulutegi na maututugi ram eno radu a gete hangavulu domwagi gairue rau horo.

²¹A tovoi mwera hogosie rau geni ingere teri vagalime, ko a vavine ko a maresu ra he valure tea.

²²Ko siserigi i Jisas mo hora ira nona rorongtagi huri ve ran kalo lo aka ko ran vano tomue denie lo tavului wei, lune nge mo hora mulegi na sinobu.

²³Lune nge u hora muleginire, nge mo hage lo vusi gahea vena tataro. Lolo revirevi i Jisas nge aie hi gahea.

²⁴Lo tarogi hi a aka nge lolo livugei wei beno, a navo mo wehie, a vevenagi a langi mo susunie.

²⁵Lune lolo ulu ului reni nge mo vonai lobera mo dige lo ului wei.

²⁶Lune ira rorongtagi ram lehie mo dige lo ului wei, ingere ram matagu garagara, ram veve vena, “Ingeie a tamate!” ko ingere ram ngara gena matagute.

²⁷Nge siserigi i Jisas mo laqa meire mo veve vena, “Nen toga surigi! Ineu ngaha. Nen mese matagu!”

²⁸I Bita mo duvi lawea vena, “Huqe, tare ve iniko hogo, gon veve ve nain vonatu lobemu lo ului wei.”

²⁹Ko nge mo veve vena, “vonai!” I Bita mo hivo dena aka ko mo tauvuigi mo dige lo ului wei mo vano lobei Jisas.

³⁰Nge lune nge mo lehi na langi u huire nge mo matagu, ko mo tauvuigi mo dono. Ko mo ngara ware Jisas vena, “Huqe, gon vagamwasoieu!”

³¹Siserigi i Jisas mo haga hurie ko mo wiri bibie mo veve vena, “?Iniko a nom ladohogo u biti, huri hava gineu gom ladosavi?”

³²Ngere rom kalo lolo aka, ko a langi mo mautu.

³³Ko ingere lolo aka ram sisiqeu goro Jisas, ko ram veve vena, “A hogo, iniko i Netui God!”

³⁴Rau gao utuhi na wai hi ram dadari lo vanue Kenesaret,

³⁵ko a sinobu taie ram leo hogosie vagatagale ve i Jisas. Ram hora lategi sulo vanue dalibulu ko ram laire segesege vonai lobena.

³⁶Ko ingere ram navu denie ve ira segesege rain sikeli lei na gologolo luqana; ko irahine ram sikelie ram mwaso.