Read East Ambae MATIU 16 Bible Online

MATIU 16 - East Ambae bible

MATIU 16

¹Ira Varise lavasigi meire Sadusi ram vonai lobei Jisas, ram tarani ve ran sine lehe. Siu ram huie ve vin haharagi na gigilegi ta eulu.

²Tau i Jisas mo duvi vena: “Lolo revirevi nem veve vena, ‘A taro vin garea, huri a mera lo tuke.’

³Ko lolo robongi siaga nem veve vena, ‘Gaqarigi vin uhe, huri a mera lo tuke ko mo dodo.’ Gimiu neu ilo vurugegi huri ve nein tovo na taro lune nem lehi na tuke; nge gimiu ne he tovo lai na gigilegi tea huri na tarogi ngaha.

⁴A sinobu rau esi rau galegaleasi ram hike huri na gigilegi. Nge hatie gigilegi ve vin haharagi lawera nge hogosie a gigilegi lui Jona.” Ko inge mo sireginire mo vano.

⁵Lune ira rorongtagi ram vano utu lo tavului wei rau geluvegi ve rain hako tea hinaga.

⁶I Jisas mo veve lawera vena, “Nein leogoro, nein leo huri na isi nora Varise meire Sadusi.”

⁷Ram tauvuigi ram vui veve veveginire vena, “Nge mo veve mwere hinge a vevenagi gide da he hako tea bereti.

⁸I Jisas u ilo huri na hava gineu ingere ram veve, ko nge mo huire vena: “?Huri hava gineu gimiu nem vui veve vevegi gimiu a vevenagi a bereti hatie mei gimiu, gimiu ira ladohogo biti?

⁹?Gimiu nehe ilo vurugegi te tau? Gimiu nehe ladohaqe tea lune nau vise vurivuri na bereti gailime huri na sinobu teri vagalime? ?A gete gaivihe gimiu neu hogonire?

¹⁰?Sige a bereti gaibitu huri na sinobu teri vagavesi? ?A gete gaivihe gimiu neu hogonire?

¹¹?Ne he iloe tea vena ineu na he laqa tea lawe gimiu huri na bereti? Nen leo huri na isi nora Varise meire Sadusi!”

¹²Siu ira rorongtagi ram lolorani huri ve nge he veve tea lawera ve ran leo huri na isi ram vai bereti ginie, nge a leo huhui nora Varise meire Sadusi.

¹³Lune i Jisas mo vano lo vanue kakarani Sisaria Vilibae, nge mo huire nona rorongtagi vena, “?A tangaloi ram veve vena i Netui Tangaloi nge ihine?”

¹⁴Ngere ram duvi vena, “Lavasigi ram veve ve iniko i Jon Garuhigogona, ko lavasigi ram veve ve iniko i Elaeja, ko lavasigi ra ve vena iniko i Jeremaea sige gatagale denire tangaloi veve rarai.

¹⁵Ko nge mo huire vena, “?Nge igimiu, nem veve ve ineu ihine?”

¹⁶I Saemon Bita mo duvi goroe vena, “Iniko i Kraes, i Netui God u mwaso.”

¹⁷I Jisas mo duvi goroe vena: “Saemon netui Jon, havuhevu meigo! Huri a hogo nge ngaha he vonai tea lawego dena tangaloi, nge u bete lawego vovohoi den Tamaku ta eulu.

¹⁸Ko nam veve lawego vena: iniko Bita, a vatu, ko lo ului vetu ngaha nan tabe kalo na noku Warelue, ko a huireanai mateana vin he qoragi laie tea.

¹⁹Nain bete na ki huri na mwasoana garaqa hi God mo ratahigi lolona lawego: a hava gineu goin gato goro lo tano vin gato goro lo eulu, ko a hava gineu goin siregi lo tano vin siregi lo eulu.”

²⁰Siu i Jisas mo gato gorora nona rorongtagi ve rain mese veve lawe hine tea ve ingeie i Kraes.

²¹Dena tarogi hi i Jisas mo tauvuigi mo veve matamwasaragi lawera nona rorongtagi vena mo eno ve nge vin hage Jerusalem, ve vin rongogagarasi garagara meire tamaragai ko ira muei rugurugu ko ira huhui talo Leo hora noi Mosis, ko rain vei vagamatea, ko ve nge vin maraga taligu lo bongi gaitoligi.

²²Siu i Bita mo lai beraginie, mo tauvuigi mo gato goroe, mo veve vena, “Mese mwerehi, Huqe! Vin he vai te mwerehi lawego!”

²³Nge i Jisas mo tu dori mo veve lawe Bita vena, “Vano lo taguku, Setan! Gom vai taturegieu, huri a domimu hatie domi God, nge a domi tangaloi!”

²⁴I Jisas mo veve lawera nona rorongtagi vena: “Tare ve ihine mo tarani vena vonai lo taguku, nge vin lado buleginie sibona, vin weli na nona gai saroutu, vin hurieu.

²⁵Huri ihine mo tarani vena hako bibi na mwasoana vin vei salaginie; ko ihine mo vagasalagi na mwasoana hurieu vin haqea.

²⁶?Huri a tangaloi vin lei na hava gineu u garea tare ve vin qoragi na ure doluegi nge mo vagasalagi na mwasoana? ?Nge vin bete lai na hava gineu ve vin lei teligugi na mwasoana?

²⁷Huri i Netui Tangaloi vin vonai lo varavarai Tamana meire nona engsel, ko lo tarogi hi nge vin tabera vataha tangaloi vin huri na nona tabanagi.

²⁸A hogo, nam veve lawe gimiu ve lavasigi denire ram labe tahingaha rain he mate tea vin dadari rain lehi Netui Tangaloi vin vonai lo nona mwasoana garaqa.