Read East Ambae MATIU 17 Bible Online

MATIU 17 - East Ambae bible

MATIU 17

¹Lo tagui rani gaiono i Jisas mo lai Bita, Jemis ko i Jon i tuana meie, ko mo tomueginire ram hage gahera lo ului vusi u eno namawe.

²Lune ram leo bibie, a tarabesine mo dori: a nagona mo varavara mwere na aho ko a luqana mo voragi mavutegi mwere na leleo.

³Ko ingere gaitolu hi ram lehi Mosis ko i Elaeja rom laqalaqa mei Jisas.

⁴I Bita mo veve lawe Jisas vena, Huqe, u garea ve da toga hano; tare ve gom tarani, nain vei na vale siusiu gaitolu tangaha, gatagale hurigo, gatagale huri Mosis ko gatagale huri Elaeja.”

⁵Lune nge mo laqa mosigei, ram leo, a dodo varavara mo vonai mo vivi gorora ko a dilogi mo vonai dena dodo, mo veve vena: “Naha i Netuku a Mweratabe. Nam leo mana ginie - nen ronghurie!

⁶Lune ira rorongtagi ram rongo na dilogi ram matagu liu, ram taqao lo tano.

⁷I Jisas mo vonai lobera mo sikelire, mo veve vena, “Nen maraga, nen mese matagu!”

⁸Lune ingere ram lalangau, rahe lehi ihine tea vage nge i Jisas hogosie.

⁹Lune ram hivo dena vusi, i Jisas mo gato gorora, mo veve vena, “Nen mese veve lawe hine tea huri na hueri neu lehe, vin dadari lune ineu i Netui Tangaloi nain maraga taligu dena mateana.

¹⁰Ko ira rorongtagi ram hui Jisas ram veve vena, “?Huri hava gineu ira huhui talo Leo hora noi Mosis ram veve vena a leo u labe ve i Elaeja vin vonai gitomue?”

¹¹Nge mo duvi lawera, mo veve vena, “A hogo, Elaeja u vonai gitomue, ve vin vei vagatai na gineu doluegi.

¹²Nge ineu nam veve lawe gimiu vena, i Elaeja u vonai beno, ko a sinobu rahe iloe tea, ko rau vei lawea a hava gineu mwere rau tarani. Mwerehi vage ingere rain vei Netui Tangaloi vin rongogagarasi.”

¹³Siu ira rorongtagi ram iloe ve nge mo laqa lawera huri Jon Garuhigogona.

¹⁴Lune ingere ram dadari lobera sinobu, a tangaloi gatagale mo vonai lobei Jisas, mo sisiqeu goroe,

¹⁵ko inge mo veve vena, “Huqe, gon hagavi netuku! Ingeie mo matemategi vule u esi liu. A vevenagi gesegi nge mo soi sulolo avi sige lolo wai.

¹⁶Nau leie lawera nomu rorongtagi, ko ingere rahe vai vagamwasoie laie tea.

¹⁷I Jisas mo duvi vena, “E gimiu ira tangaloi ladosavi ne he rongo na leo tea! ?Nain toga mei gimiu vin dadari tagaha? ?Nain gagarasi huri gimiu vin dadari tagaha? Nen lai na mwalakelo hi vonai tangaha laweau!

¹⁸I Jisas mo hora na vui esi ko mo mwalue denie, ko a mwalakelo hi mo mwaso vurugegi lo rani ngehi.

¹⁹Siu ira rorongtagi ram vonai lobei Jisas ko ram hui rorongo ginie vena, “?Huri hava gineu igamai gahe vai lei tea vena gan vuro lue na vui esi?”

²⁰Nge mo veve lawera vena, “A vevenagi nomiu ladohogo u biti. A hogo, nam veve lawe gimiu vena, tare ve a nomiu ladohogo u lawua mwere na toli baka, gimiu nein veve lai lawe na vusi ngaha vena, ‘Maraga den tangaha, gon vano tahi,’ ko nge vin vano. Hatie hava gineu huri ve igimiu nein he vai lei tea.

²¹[Nge a tataro koa gologolo hogosie vin vuro vohogi lai na gineu mwere ngaha; hatie gineu wagineu vage.]”

²²Lune ira rorongtagi ram vonai bubugi a Kalili, i Jisas mo veve lawera vena, “Rain lei i Netui Tangaloi talo limara tangaloi

²³ve rain vei vagamatea; nge lo bongi gaitoligi nge vin maraga taligu.” Ira rorongtagi ram hahagavi u liu.

²⁴Lune i Jisas meire nona rorongtagi ram dadari Kabeniam, a tangaloi vile takis huri na Sara Gogona ram vonai lobei Bita ram huie vena, “?A nomiu huhui mo voli na takis sige hatie?”

²⁵I Bita mo duvi gorora vena, “Io.” Lune i Bita mo ahu lolo vale i Jisas mo veve lawea tomue vena, “?Saemon, gom lado wuraha? ?Ihine mo voli na takis lawera ratahigi talolo ure ngaha? ?Ira tagivanuara sige ira halavano?”

²⁶I Bita mo veve vena, “Ira halavano.” Siu i Jisas mo veve lawea vena, “Tau ira tagivanuara ra he voli tea takis.

²⁷Nge da he tarani tea ve dain vei tatureginire. Tau gon hivo lo wai ko gon tuli na gau, gon reve na muei ige hi mo wali na gau, ko goin waga na wuwana goin haqe na homu u tatarise huri na noku takis ko a nomu; goin leie ko goin voli na nodaru takis ginie.”