Read East Ambae MATIU 18 Bible Online

MATIU 18 - East Ambae bible

MATIU 18

¹Lo tarogi hi ira rorongtagi noi Jisas ram vonai lobena, ram veve lawea vena, “?Ihine hi u lawua garagara lo mwasoana garaqa God mo ratahigi lolona?”

²Ko i Jisas mo ware na maresu biti vonai lobena, mo taue lolo livugara,

³mo veve vena: “A hogo, nam veve lawe gimiu vena, tare ve igimiu nehe wali dori tea, ko ne he mwere na maresu wuwerigi tea, gimiu nein he ahu tea lo mwasoana garaqa God mo ratahigi lolona.

⁴Ihine tea mo lado wuweu ginie sibona mwere na maresu biti ngaha, ingeie hi u lawua garagara lo mwasoana garaqa God mo ratahigi lolona.

⁵Tare ve ihine mo lai vurugegi na maresu gatagale mwere ngaha lo henaku, nge mo lai vurugegieu.

⁶“Tare ve ihine tea mo vai tatureginie gatagale den rahine hi rau biti ram ladohogogieu, u garea liu meie huri ve rain duletagi na vatu lawua lo mwagorona ko ram dudunie lolo buei tehi.

⁷A hahagavi lawe na ure a vevenagi a gineu ram vai taturegi na tangaloi vena soi lo galegaleasi! A gineu ingere ngaha rain toga gesegi lolo ure - nge hahagavi lawe ihine hi mo lai na gineu hi ram vai taturegi na tangaloi!

⁸“Tare ve a limemu sige a karumu mo vai tatureginigo, gon tai vohoginie ko gon tulie denigo! U garea meigo huri ve goin ehu lolo mwasoana mena lime mautu sige a karu mautu denie huri ve rain tuligo lolo avi redu mena lime gairue sige a karu gairue.

⁹Tare ve a matamu mo vai tatureginigo, gon lai vohoginie ko gon tulie denigo! U garea meigo huri ve goin ehu lolo mwasoana mena mata gatagale denie huri ve rain tuligo lolo gagarasi ko a avi redu mena mata gairue.

¹⁰“Gimiu nei leo huri ve nei mese siesiegi hine tea gatagale den rahine hi rau biti; huri nam veve lawe gimiu ve a nora engsel lo eulu ram toga gesegi lo nagoi Tamaku eulu.

¹¹[Huri i Netui tangaloi u vanai ve vin vagamwasoire hi rau sala.]

¹²“?Igimiu nem lado mwerehilogo? Tare ve a tangaloi a bulana sibsib vudolue, ko gatagale denire mo sala, nge vin vei mwerehilogo? Nge vin sireginire ngavulu gaisiwo domwagi gaisiwo lo vusi, ko vin vano vin hikesi na sibsib ngehi u sala tau.

¹³Lune nge mo haqea, a hogo, nam veve lawe gimiu ve nge vin hevuhevu u liu huri na sibsib ngehi denire ngavulu gaisiwo domwagi gaisiwo ngerehi rahe sala tea.

¹⁴Mwerehi vage, Tamamiu eulu he tarani tea ve gatagale dein rahine hi rau biti vin sala. Vin vei na hava gineu lawe tuemiu lune nge mo galegaleasi

¹⁵“Tare ve i tuemu mo galegaleasi, gon vano ko gon veve sere na bugune lawea gahegimiru. Tare ve nge vin rongogo, mwerehi gu lei tuemu taligu.

¹⁶Nge tare ve vin he rongogo tea, goin lai na buluimu gatagale sige gairue vage. Ngehi mo huri na Reve reve Gogona, mo veve vena, ‘Vataha leo tawetawei vin labe lo singoi tangaloi gairue sige gaitolu.’

¹⁷Nge tare ve nehe tarani tea vena rongora, siu igimiu nen veve na gineu ngerehi doluegi lawe na Warelue. Nge tare ve nehe tarani tea vena rongo na Warelue, goin vai lawea mwere ingeie a haroharo sige a tangaloi vilevile homu.

¹⁸“A hogo, nam veve lawe gimiu vena, a hava gineu nein gato goro lo tano vin gato goro lo eulu, ko a hava gineu nein siregi lo tano vin siregi lo eulu.

¹⁹“Ko taligu nam veve lawe gimiu vena, tare ve gairue den gimiu lo ure nerom lado bubugi huri ve neri nevu a hava gineu tea lo tataro, Tamaku eulu vin bete lawe gimiru.

²⁰Huri a tangaloi gairue sige gaitolu ram sone bulutegi lo henaku tahi logo tea, aiehi ineu lolo livugara.”

²¹Siu i Bita mo vonai lobei Jisas, mo veve lawea vena, “?Huqe, i tueku vin galegaleasi goroau vagavihe, siu ineu nain ladovohogi na bugune? ?Vaga bitu?”

²²I Jisas mo veve lawea vena: “Hatie, ineu na he veve tea lawego ve vin dadari vaga bitu; nge vin vano tamwere hi vin dadari vin he rovo lai tea.

²³Mwerehi, a mwasoana garaqa God mo ratahigi lolona u mwere na ratahigi gatagale, nge mo ladoutu ve vin lehi na tovoi bugure tangaloi tabanagi hi ram tabana lawea.

²⁴Lune nge mo tauvuigi mo lehi na tovoi bugure, ram lai na tangaloi vonai lobena, bugune lo mane u teri vaga saosao.

²⁵A nona mane hatie ve vin voli na bugune, siu a nona ratahigi mo horae vena sogaginie ko i gahorana ko ire netune, ko a nona hako gineu doluegi, huri ve vin voli na bugune ginie.

²⁶A tangaloi tabanagi mo sisiqeu hivo ko mo taigi goro na nona ratahigi, mo veve lawea vena, ‘Gon rongribi meieu, nain voli na buguku doluegi!”

²⁷Siu a ratahigi mo hagavie, mo ladovohogi na bugune, ko mo sireginie.

²⁸Nge a tangaloi hi mo mwalue mo vano, ko mo haqe na tangaloi tabanagi gatagale wagineu, a nona bugui mane lune u biti. Nge mo wiri bibie ko mo kumue lo mwagorona, mo veve lawea vena, ‘Gon voli na bugumu laweau!’

²⁹A tangaloi tabanagi hi mo sisiqeu hivo lobei karune, mo navu denie vena, ‘Gon rongo ribi meieu, nain voli na buguku!

³⁰Nge ingeie he tarani tea; nge mo vano ko mo tulie talolo valei vauveu, siu inge vin tino vin dadari lune nge vin voli na bugune.

³¹Lune a tangaloi tabanagi lavasigi ram leo hi na hava gineu u vei, ram hahagavi u liu, ko ram vano ram veve lawe na nora ratahigi huri na hava gineu doluegi u veie.

³²Siu a nona ratahigi mo warea vonai, mo veve lawea vena, ‘Iniko a tangaloi tabanagi esi! Nau ladovohogi na bugumu doluegi, a vevenagi gu nevue denieu.

³³U eno lawego ve goin hagavi na nomu buluana, mwere hi ineu nau hagavigo.

³⁴A nona ratahigi mo mero, mo laie vano lolo valei vauveu ve rain vei gagarasiginie vin dadari nge vin voli na bugune.”

³⁵Ko i Jisas mo tarihougi vena, “Ko i Tamaku eulu vin vei lawe gimiu mwerehi vage, tare ve igimiu ne he ladovohogi na bugui retuemiu tea gena lolo lolomiu.”