Read East Ambae MATIU 19 Bible Online

MATIU 19 - East Ambae bible

MATIU 19

¹Lune i Jisas u laqagi na leo ingere ngaha u rovo, nge mo vano dena Kalili, ko mo vonai lolo loloi venue ta Judia lo tavului wai Jodan.

²A sinobu sao ram hurie, ko nge mo vagamwasoire aiehi.

³Ira Varise lavasigi ram vonai lobena, ram tarani ve ran sine lehe, ram veve vena, “U tatarise mena Leo hora huri ve a tangaloi vin vilewahe den horana huri vataha gineu?”

⁴I Jisas mo duvi lawera vena, “Wa igimiu nehe valu na Reve reve Gogona ngaha tea? ‘Lo tauvuigi i God u teu na mwera ko a vavine,

⁵ko mo veve vena, “Giniehi, a tangaloi vin siregi tamana ko i retahine, ko mo bulu mei horana, ko ingere gairue roin voragi betugi gatagale.” ’

⁶A vevenagi rohe gairue tea taligu, nge a betugi gatagale. Giniehi, irahine i God u vilebubuginire, a tangaloi vin he vilewahera tea.”

⁷Ira Varise ram huie vena, “?Huri hava gineu i Mosis u hora ve a tangaloi vin lei na revereve huri na togaana vilewahe, ko vin hora vohogi horana?”

⁸Ko i Jisas mo veve lawera vena, “I Mosis u siregi lawe gimiu ve nen hora vohogi horamiu a vevenagi a qatumiu u siaga. Nge lo tauvuigi he mwerehi tea.

⁹Nge ineu nam veve lawe gimiu vena, ihine tea mo hora vohogi horana, ko mo lagi mena vavine wagineu, nge horana he vai vagasile tea mena mwera, nge mo vagasile.

¹⁰A nona rorongtagi ram huie vena, “Tare ve a gineu gi hi mena mwera mei horana mwerehi, he garea tea ve roin legi.”

¹¹I Jisas mo duvi lawera vena, “A leo huhui ngaha he tatarise tea huri na tangaloi doluegi, nge hogosie huri rahine hi i God mo bete lawera.

¹²Huri a tangaloi lavasigi rahe lagi tea a vevenagi a gineu gi rau wegiwegineu: lavasigi, rau vora a beture rahe tatarise tea mena lagi; lavasigi, a tangaloi rau lei vohogi na nora huireana denire; lavasigi, ram ladoutu ve rain he lagi tea huri vei na God vin voragi nora Ratahigi. Ihine vin leilei na leo huhui ngaha vin vei lei mwerehi.”

¹³A tangaloi lavasigi ram lai na maresu lawe Jisas vena tangovire ko vena tataro, hurire nge ira rorongtagi ram tara gorora.

¹⁴I Jisas mo veve vena, “Nen siregi nire ira maresu ve ran vonai lobeku, ko nese vai gorora, huri a vevenagi a Ute noi God i mo ratahigi lolona, a nora tangaloi rau mwereire ngaha.”

¹⁵Siu ingeie mo tangovire, siu mo vano dena vanue hi.

¹⁶Ko a tangaloi gatagale mo vonai lobei Jisas, mo huie vena, “?Huhui, nain vei na hava gineu u garea huri ve nain lei na mwasoana radu?”

¹⁷I Jisas mo duvi lawea vena, “?Huri hava gineu gom huieu huri na gineu garea? Nge Gatagale hogosie u garea. Tare ve gom tarani ve goin ehu sulo mwasoana, goin tatabegi na Leo hora.

¹⁸Nge mo hui Jisas vena, “?Ingere hi logo?” I Jisas mo duvi vena, “Goin mese ue tangaloi; gon mese vagasile lo vavine; goin mese balubelu; goin mese tawei hine tea vurogi;

¹⁹gon ladomavagi tamamu ko ratahimu; ko goin tabe na tangaloi wagineu mwereigo sibomu.”

²⁰A mwalakelo hi mo duvi lawea vena, “Nau tabe na Leo hora ngere ngaha doluegi. ?Nge a hava gineu hi na he vaie tea mosigei?”

²¹I Jisas mo veve lawea vena, “?Tare ve gom tarani ve goin vovohoi, goin vano gom sogagi vohogi na nomu lalaie teri, ko gom bete na mane gi lawera mahogi, ko goin haqe na lalaie lo eulu; siu gon vonai, gon hurieu.”

²²Lune a mwalakelo hi mo rongo na leo hi, nge mo mule gina hahagavi, huri a nona lalaie u sao.

²³Siu i Jisas mo veve lawera nona rorongtagi vena, “A hogo, nam veve lawe gimiu vena, u gona garagara huri ve a tangaloi a mwerai homu vin ehu lolo mwasoana garaqa God mo ratahigi lolona.

²⁴Ko taligu nam veve lawe gimiu vena u huire huri ve a tangaloi hi a mwerai homu ve vin soro lolo tanoi ratahigi hi God mo ratahigi lolona dena bulugi ve vin ehu turu na matai nitil.”

²⁵Lune a nona rorongtagi ram rono na leo hi, ram garigi garagara, ram huie vena, “?Nge siu ihine vin mwaso lai?”

²⁶I Jisas mo leo vano lure, mo veve lawera vena, “U gona meire tangaloi, nge God mo vai lei na gineu doluegi.

²⁷Siu i Bita mo duvi mo veve lawea vena, “Gom leo, igamai gau siregi na nomai lalaie doluegi ko gam hurigo. ?Gamai gain lei na hava gineu?”

²⁸I Jisas mo veve lawera vena: “A hogo, nam veve lawe gimiu vena, lune a ure garaqa vin vonai ko i Netui Tangaloi vin toga lo tanoi togatoga ratahigi lo varavarana, igimiu vage nem hurieu nein toga lo tanoi togatoga ratahigi hangavulu domwagi gairue, nein vevegi na garogi a duvi Israel hangavulu domwagi gairue.

²⁹Ko irahine tea ram siregi na valera, sige ire tuara, sige ire haqera, sige tamara, sige iretahire, sige ire neture, sige a tanora, a vevenagi ineu, ngehi vin lei vagavudolue vage lo ulugi, ko vin lei na mwasoana ngehi vin he rovo lai tea.

³⁰Nge ingere rau sao ram tomue rain tu tagu, ko ingere hi rau sao ram tu tagu rain tomue.