Read East Ambae MATIU 21 Bible Online

MATIU 21 - East Ambae bible

MATIU 21

¹Lune ingere ram vano kakarani a Jerusalem, ram vonai Betvas sulo Vusi Oliv. Aiehi i Jisas mo hora na nona rorongtagi gairue gitomue,

²mo veve lawera vena: “Neri vano lo togagi venue vantahi. Ko siserigi neri haqe na as mei netune meie. Neri torosire, neri leire vonai laweau.

³Ko tare ve ihine vin veve na gineu lawe gimiru, neri veve lawea vena, ‘A Huqe mo taranire,’ ko huri nge vin sireginire vagatagale.”

⁴Mo vai mwere ngaha huri ve vin vagahorongi na leo gina wuwai tangaloi ligoligogi vena:

⁵“Gon veve lawera ta Saeon vena: ‘Nen leo, a nomiu ratahigi mo vonai lobemiu, nge u lado wuweu, nge mo toga lo dongki, nge mo toga lo as biti, a natugi.”

⁶Siu ira rorongtagi rom vano tomue, rom vai mwerehi Jisas u horara:

⁷rom lai na as mei netune vonai, ram vugeri na luqara lo ului gain herera, ko i Jisas mo toga namawe.

⁸A sinobu u sao ram vugeri na luqara lo turegi ko lavasigi ram tai na rangai gei ko ram siure lo turegi.

⁹A sinobu ram tomuegi Jisas ko ram tu tagu, ingere doluegi ram ulo vena: “Waregareagi Netui Devet! Vevegarea ginie hi mo vonai lo henai Huqe! Waregarea lo eulu!”

¹⁰Lune i Jisas mo ahu lolo vanue Jerusalem, mo gilugi na domi sinobu doluegi, ram veve vena, “?Nge ngaha?

¹¹A sinobu ram duvi vena, “Ngaha i Jisas, a tangaloi veve rarai ta Nasaret a Kalili.”

¹²I Jisas mo ahu lolo Sara Gogona, ko mo vuro lue ngerehi doluegi ram voli ko ram sosogagi lolo Sara Gogona, ko mo talulugi dori na tanoi homu noi rahine ram lealeahi homu ko a tanoi togatoga noi rahine ram sogagi na rangamea,

¹³ko mo veve vena, “U reve beno lo Reve reve Gogona ve God u veve vena, ‘A valeku vin waregi ve a valei tataro.’ Nge gimiu nem vaie mo voragi malangai belu!”

¹⁴Ira matadodo meire lukuluku ram vonai lobei Jisas lo Sara Gogona, ko nge mo vagamwasoire.

¹⁵Ira muei rugurugu ko ira huhui talo Leo hora noi Mosis ram lologagasi lune ingere ram lehi na gineu garigiana nge u veire ko ira maresu ram ulo lolo Sara Gogona vena, “Waregareagi Netui Devet!”

¹⁶Ko ram veve lawe Jisas vena, “?Wa iniko gom rongo na hava gineu hi ram veve?” I Jisas mo duvi lawera vena, “Io. ?Wa igimiu ne he valu na Reve reve Gogona tea hi mo veve vena, ‘Gu lei na leo vevegarea dena singora maresu lalawua meire memeaga’?”

¹⁷I Jisas mo sireginire mo mwalue dena qatui venue ko mo vano Betani, ko mo maturu aiehi.

¹⁸Lo rani tuegi, ram vonai taligu sulo qatui venue, i Jisas mo mwaruruhi.

¹⁹Nge mo lehi na vui duledule lo mwararai turegi. Nge mo vano lobegi, mo lehi na raugi hogosie. Siu nge mo veve lawe na gai hi vena, “Iniko goin he wai tea taligu vin tuei!” He ribi tea, a vui duledule hi mo koru.

²⁰Ira rorongtagi ram leo, ram garigi hurie, ram hui vena, “?A vui duledule hi mo koru siserigi mwerehilogo?”

²¹I Jisas mo duvi lawera vena: “A hogo, nam veve lawe gimiu vena, tare ve gimiu nem ladohogo, ne he ladosavi tea, igimiu nein vei lei na gineu mwerehi nau vei lawe na vui duledule hi; hatie hogosie ngaha, nge gimiu nein veve lai lawe na vusi ngaha vena, ‘Maraga, gon tuligo sibomu lolo tahi,’ ko vin vei mwerehi.

²²Tare ve gimiu nem ladohogo, nein lei na hava gineu tea hi nem navu huri lo tataro.”

²³Siu i Jisas mo vonai taligu lolo Sara Gogona; lune nge mo huhui, ira muei rugurugu meire tamaragai ram vonai lobena, ram huie vena, “?Gom vai na gineu mwere ngaha gina managi mo vonai logo? ?Ihine u bete na managi ngaha lawego?”

²⁴I Jisas mo duvi lawera vena, “Ineu vage nain hui gimiu gina leo gatagale, ko tare ve gimiu nein duvi goroau, ineu vage nain veve lawe gimiu ve nam vai na gineu ingere ngaha gina managi mo vonai logo.

²⁵?I Jon u lei na managi logo vena garuhigogona: den God sige dena tangaloi? Ingere ram tauvuigi ram vuigarogi sibora vena, “Tare ve dam duvi goroe vena, ‘Den God’, nge vin veve lawe gide vena, “?Huri hava gineu gimiu ne he ladohogo tea ginie?’

²⁶Nge tare ve dam veve vena, ‘Dena tangaloi’, dam matagugi na sinobu, a vevenagi ingere doluegi ram lado siaga ve i Jon ineie a tangaloi veve rarai.”

²⁷Giniehi, ram duvi goro Jisas vena, “Gahe ilo tea.” Ko i Jisas mo veve lawera vena, “Ko ineu vage nain he veve tea lawe gimiu ve nam vai na gineu ngere ngaha gina managi mo vonai logo.

²⁸“?Tau, gimiu nem lado mwerehilogo? A tangaloi gatagale netune gairue. Nge mo vano lobena togagi, mo veve lawea vena, ‘Netuku, gon vano, gon kea lolo talui vaen gaqarigi.’

²⁹Nge mo duvi vena, ‘Nam rao’, nge lo tagugi nge mo lado dori ko mo vano.

³⁰Siu i tamara mo vano lobei tuana, mo veve mwerehi vage lawea. Ne mo duvi vena, ‘Io, mama’, nge he vano tea.

³¹?Nge hilogo denire gairue hi u vei na taraniana noi tamana?” Ngere ram duvi vena, “A togagi.” I Jisas mo veve lawera vena, “A hogo, nam veve lawe gimiu vena, ira vilevile homu ko ira vavine tuvetuvegi rain ehu lolo mwasoana garaqa God mo ratahigi lolona tomue den gimiu.

³²Huri i Jon Garuhigogona i vonai lobemiu, mo haharagi na matahala vovohoi lawe gimiu, nge gimiu ne he ladohogo te ginie. Nge ira vilevile homu meire vavine tuvetuvegi ram ladohogoginie. Gimiu nem leo ngaha, nge lo tagugi nehe lado dori tea ve nen ladohogoginie.”

³³I Jisas mo veve vena: “Nen rongo na gato tavalu wagineu. A huqei tano gatagale mo rivu na talui vaen, mo hakovi na ara goroe, mo geli na walu huri ve vin seri na mwasi vaen lolona ko mo hakovi na tuleo. Siu mo siregi na talui vaen lawera leogoro ko mo vano lo vanue wagineu.

³⁴Lo taroi taro matue, ne mo horara nona tangaloi tabanagi lawera leogoro ve rain lei na nona duvigi denire.

³⁵Ira leogoro ram wiri bibire tangaloi tabanagi, ram talie gatagale, ram ue vagamatea gatagale, ko ram bugurie gatagale.

³⁶A huqegi mo horara tangaloi tabanagi taligu, rau sao liure tomue, ko ira leogoro ram vai lawera mwerehi vage.

³⁷Siu mo hora vagasigi lawera leogoro i netune, mo veve vena, ‘Ngere rain ladomavagi netuku.’

³⁸Lune ira leogoro ram lehi netune, ram veve veveginire vena, ‘I gineu ngaha vin hako hougi na talu. Da, da ue vagamatea, siu dain lei na talune gi talude.’

³⁹Siu ram wiri bibie, ram tuli vohoginie den talui vaen ko ram ue vagamatea.”

⁴⁰I Jisas mo hui vena, “?Lune a huqei telu vin vonai nge vin vei na hava gineu lawera leogoro hi?”

⁴¹Ngere ram duvi vena, “Nge vin ue asiesiginire tangaloi esi ngerehi, ko vin siregi na talu lawera leogoro wagineu, rain bete nona duvi mwasi vaen lawea lo taro matue.”

⁴²I Jisas mo veve lawera vena, “Gimiu nehe valu tea lo Reve reve Gogona vena: ‘A vatu hi ira hakohako vale rau tuli vohoginie mo voragi na vatu togaibibi. A Huqe u veie ngaha, a gineu garigiana lo matada!’ ”

⁴³I Jisas mo tarihougi vena: “Nam veve lawe gimiu vena, i God vin he voragi nomiu Ratahigi tea ingeie vin betea lawe na sinobu wagineu ingere rain lei na mwasigi vovohoi denie.

⁴⁴Ihine tea vin soi talo vatu hi vin mevurivuri, nge a vatu hi vin soi talu ihine tea vin momogaginie mwere na qie.”

⁴⁵Ira muei rugurugu meire Varise ram rongo na gato tavalu noi Jisas, ram ilo ve nge u veve hurire,

⁴⁶siu ram vai leo ve ran wiri bibie. Nge ram matagugi na sinobu, huri ingere ram lado ve i Jisas nge a tangaloi ligoligogi.