Read East Ambae MATIU 22 Bible Online

MATIU 22 - East Ambae bible

MATIU 22

¹I Jisas mo veve lawera taligu gina gato tavalu vena:

²“A mwasoana garaqa God mo ratahigi lolona u mwere na tangaloi a ratahigi mo vai na hinaga lawua huri na lagiana noi netune.

³Nge mo hora na nona tangaloi tabanagi ram vano ve rain veve lawera tangaloi u warera tau huri na lagiana ve rain vonai, tau ra he tarani tea ve rain vonai.

⁴Siu nge mo horara nona tangaloi tabanagi lavasigi taligu, mo veve vena, ‘Nen vano nen veve lawera tangaloi hi nau warera tau vonai vena, “Leo, nau vei vagatai na gaganie u rovo; nau wehi na bulugi ko a natui bulugi u damoe, ko a gineu doluegi u rarai rovo. Nen vonai lolo lagiana!” ’

⁵Tau ingere rahe ladomavaginie tea, ram vano lo matahalara, gatagale lolo talune, tuegi lolo nona lalaie,

⁶ko lavasigi ram wiri bibire tangaloi tabanagi ngerehi, ram wehire, ram ue vagamatera.

⁷Nge lune i ratahigi mo rono, a lolona mo gagasi huri, mo horara nona tangaloi vuro vano, ram wehi na tangaloi ue balu ngerehi ko ram hure na vanuara.

⁸Siu nge mo veve lawera nona tangaloi tabanagi vena, ‘A lagiana u rarai beno, nge a tangaloi hi nau warera tau vonai rahe tatarise tea huri.

⁹Nen vano vataha na turegi lawua ko vataha na tangaloi nein haqera nen warera rain vonai lolo lagiana.’

¹⁰Siu a tangaloi tabanagi ngerehi ram vano vataha na turegi ko ram vile buluteginire hi doluegi ram haqera, rau esi ko rau garea, ko a vale lagiana mo horo gina sinobu.

¹¹“I ratahigi mo vano lolo vale mo lehi na tangaloi hi u warera ko nge mo lehi na tangaloi gatagale he saru na gavui lagiana tea.

¹²Mo veve lawea vena, ‘?Buluana, gu vonai tangaha wuraha, go he saru na gavui lagiana tea?’ Nge ingeie he veve na hava gineu tea.

¹³Siu i ratahigi mo veve lawera nona tangaloi tabanagi vena, ‘Nen vau bulutegi na limana ko a karune, nen tuli vohoginie lolo dodogi varea, vin tengi ko vin gesigesigi livona aie.’ ”

¹⁴Ko i Jisas mo veve vagasigi vena, “Mo warera u sao, nge mo leo wahera he sao tea.

¹⁵Ira Varise ram mwalue ram tau na nora leo huri ve rain holi Jisas lo leona.

¹⁶Siu ram hora lawe Jisas na nora rorongtagi lavasigi ko lavasigi dena burigi noi Herod, ram veve lawea vena, “Huhui, gamai gam ilo ve iniko a hogo, gom huhui na matahalai God hogo: gohe matagu tea gina tangaloi, a vevenagi gohe lado na nagoi tangaloi tea.

¹⁷?Gon veve lawe gamai, gom lado mwere hilogo? ?U tatarise mena Leo hora ve dain voli takis lawe na muei ratahigi ta Rom sige hatie?”

¹⁸Nge i Jisas mo ilo na nora tau leo asi hi, mo duvi gorora vena, “Gimiu ira kali goro! ?Huri hava gineu nem vai leo ve nein sinau?

¹⁹Nen haharagi na homu hi dam voli na takis ginie.” Siu ram bete na vatu lawea,

²⁰ko nge mo huire vena, “?Nunui hine ko a henai hine ngaha?”

²¹Ram duvi goroe vena, “Noi muei ratahigi.” Siu nge mo veve lawera vena, “Giniehi, nen bete lawe i muei ratahigi a hava gineu noi muei ratahigi, ko lawe God a hava gineu noi God.”

²²Lune ingere ram rongo na leo ngehi ram awogi hurie, ko ram sireginie ram vano denie.

²³Lo mahoi reni hi tau mosigei ira Sadusi lavasigi ram vonai lobei Jisas. Ngere ram veve ve hatie maraga taligu dena mateana. Ram huie vena:

²⁴“Huhui, i Mosis u veve vena, ‘Tare ve a Tangaloi vin mate, nge netune hatie, i tuana vin lei na maduana, vin hakovi na maresu lawe tuana hi u mate beno.’

²⁵Siu ira reretehigi ingere gaibitu lobemai. A togagi mo lagi na vavine; siu mo mate, he hako te maresu. Giniehi, nge mo siregi na maduana lawe i tuana.

²⁶Mwerehi i tuana tuegi ko gaitoligi, mo dadari lo gaibitugi.

²⁷Vagasigi a vavine hi mo mate vage.

²⁸?Nge lo maraga taligu nge vin voragi gahorai hine vohogi denire gaibitu? Huri ingere doluegi rau legi meie.”

²⁹I Jisas mo duvi gorora vena: “Gimiu nem lenga, nehe ilo tea na Reve reve Gogona sige a managi noi God.

³⁰Huri lo maraga taligu ingere rain mwere ira engsel ta eulu, ko a mwera ko a vavine rain he lagi tea taligu.

³¹Nge huri ira mate ve rain maraga taligu, nehe valu na leo tea hi God u veve vena,

³²‘Ineu God noi Ebraham, God noi Aesak ko i God noi Jekob.’ Mwerehi nem ilo ve ingeie God nora mwaso, hatie nora mategi.”

³³Lune ira sinobu ram rongoe, ram garigi huri na nona leo huhui.

³⁴Lune ira Varise ram rongo huri ve i Jisas u vaire Sadusi ram toga qatoa, nge ingere ram vonai tabulutegi.

³⁵Gatagale denire, a huhui talo Leo hora noi Mosis, mo vai leo huri vena sine Jisas gina leo huihui.

³⁶Mo hui Jisas mo veve vena, “?Huhui, a Leo hora ngehilogo u lawua liu lo Leo hora noi Mosis?”

³⁷I Jisas mo duvi goroe vena, “Gon tabe na Huqe nomu God gina taqangimu doluegi, ko gina tamatemu doluegi, ko gina domimu doluegi.

³⁸Ngehi a muei Leo hora ko u lawua.

³⁹Ko a Leo hora tuegi mwerehi vage nge ngaha: ‘Gon tabe na tangaloi wagineu mwereigo sibomu.’

⁴⁰A Leo hora noi Mosis ko a leo huhui nora tangaloi veve rarai rom labe lo Leo hora gairue ngerehi.”

⁴¹Lune ira Varise ram vonai bubugi, i Jisas mo huire vena,

⁴²“?Nem lado wuraha huri i Kraes? Ingeie a duvi hine?” Ngere ram veve vena, “Ingeie den duvi Devet.”

⁴³I Jisas mo hui vena, “?Huri hava gineu a Vui u vei Devet mo ware i Kraes ve nona Huqe? Huri i Devet mo veve vena,

⁴⁴‘A Huqe mo veve lawe na noku Huqe vena: Gon toga lo matueku, vin dadari nain teu na nomu tavului vuro teri lovavai kerumu.’

⁴⁵?Tare ve i Devet mo ware Kraes ve nona Huqe, nge vin voragi duvi Devet mwerehilogo?”

⁴⁶Ihine tea he duvi goro i Jisas lai tea gena leo gatagale, ko dena mahogi hi a tangaloi gatagale he huie lai tea huri hava gineu.