Read East Ambae MATIU 23 Bible Online

MATIU 23 - East Ambae bible

MATIU 23

¹Mo rovo vunu, i Jisas mo laqa lawera sinobu ko lawera nona rorongtagi mo veve vena:

²“Ira huhui talo Leo hora noi Mosis meire Varise ingere ram hako managi ve rain matamwasaragi na Leo hora hi.

³A vevenagi hi, nen rongo ko nen vai na hava gineu rain veve lawe gimiu nein veie; nge nen leo goro, nen mese huri na nora lalakogi, a vevenagi ingere ram vevea ko rahe vaie tea.

⁴Ram vau bulutegi na hakohako mava, ram taue lo gainherera tangaloi, nge ingere rahe buluire tea ve rain wali na hakohako mava hi.

⁵Ngere ram vai na gineu doluegi huri ve a tangaloi rain lehire. Ram vai na nora tangai mavusui revereve gogona u lawua ngehi mo eno lo raera, ko ram vai na singoi luqara ram qaqaravu.

⁶Ram tarani na muei tanogi lo gaganie lawua ko a muei tanoi togatoga lo valei soneana;

⁷ram tarani ve a tangaloi rain vevegarea ginire lo sarai volivoli, ko ve a sinobu rain warera ve ‘Huhui.’

⁸Nen mese siregi ve a tangaloi rain ware gimiu ve ‘Huhui’, huri gimiu doluegi ira reretehigi, ko a nomiu Huhui gatagale hogosie.

⁹Ko nen mese ware hine tea talo ure ve ‘Mama’, huri Tamamiu gatagale hogosie mo toga lo eulu.

¹⁰Nen mese siregi ve a tangaloi rain ware gimiu ve ‘Tomtomuegi’, huri a nomiu Tomtomuegi gatagale hogosie i Kraes.

¹¹A tangaloi lawua mei gimiu nge vin voragi na nomiu tangaloi lalakogi.

¹²Ko ihine mo lado hage ginie sibona God vin vei wuweuginie, ko ihine mo lado wuweuginie sibona God vin vei hageginie.

¹³“Hahagavi huri gimiu, ira huhui talo Leo hora noi Mosis meire Varise! Gimiu ira kali goro! Gimiu nem gorogoro na mwasoana garaqa God mo ratahigi lolona lo nagora tangaloi, nge gimiu sibomiu nein he ahu tea lolona, ko a sinobu ram tarani ve rain ehu gimiu nehe sireginire tea ve rain vano lolona.

¹⁴“Ra huhui talo Leo hora noi Mosis ko ira Varise, hahagavi huri gimiu uliu. A domimiu gairue. Nem balu na hakogineu nora madue, morovo nem vai na tataro qaqaravu nem kali na tangaloi ve ingere ran lado mava gi gimiu. Nem vaie mwerehi a leo vevegi lawe gimiu vin huire vin liu.

¹⁵“Hahagavi huri gimiu, ira huhui talo Leo hora noi Mosis meire Varise! Gimiu ira kali goro! Nem walawalau lolo tahi, nem vano utu lo vanue doluegi wagiwagineu huri ve nein reve na tangaloi gatagale ve vin ehu lo nomiu burigi, ko lune gimiu nem vai mwerehi, nem vaie ve vin tatarise huri gagarasi redu u liu den gimiu vagarue.

¹⁶“Hahagavi huri gimiu, ira tomtomuegi matadodo! Nem huhui vena, ‘Tare ve a tangaloi vin ware na vale gogona, hatie bugune tare ve mo vai utu na nona varatau; nge tare ve vin ware na kol lo vale gogona, a bugune huri, tare ve mo vai utu na nona varatau.’

¹⁷Gimiu ira lenglengaga ko ira matadodo! Ngehilogo u liuhage, a kol sige a vale gogona mo vai na kol mo gogona?

¹⁸Gimiu nem huhui vage vena, ‘Tare ve a tangaloi vin ware na tanoi rugurugu, hatie bugune tare ve mo vai utu na nona varatau; nge tare ve vin ware na hogogi lo tanoi rugurugu, a bugune huri, tare ve mo vai utu na nona waratau.’

¹⁹Gimiu ira lenglengaga ko ira matadodo! ?Ngehilogo u liuhage, a hogogi sige a tanoi rugurugu mo vai na hogogi mo gogona?

²⁰A vevenagi hi, ihine mo ware na tanoi rugurugu, mo ware na tanoi rugurugu ko a hogogi doluegi ram eno lo tanoi rugurugu;

²¹ko ihine mo ware na vale gogona, mo ware na vale gogona ko i God, ingeie mo toga lo vale gogona;

²²ko ihine mo ware na eulu, mo ware na tanoi togatoga noi God ko i God, ingeie mo toga lune.

²³“Hahagavi huri gimiu, ira huhui talo Leo hora noi Mosis meire Varise! Gimiu ira kali goro! Nem lai lawe God a hangavulugi den vataha bulemiu rivurivu wuwerigi dam tau lo hinaga huri a bonagi mo garea, nge nem tau vohogi na gineu mava talo Leo hora, mwere na lengai vovohoi, a hahagavi ko a doridori garea. Mo eno lawe gimiu ve nein vei na gineu ngerehi, nge nen mese siregi na gineu wuwerigi ingere ngaha.

²⁴Gimiu ira tomuegi matadodo! Nem lai vohogi na garonono lolo memiu wai, nge gimiu nem dono na bulugi!

²⁵“Hahagavi huri gimiu, ira huhui talo Leo hora noi Mosis meire Varise! Gimiu ira kali goro! Nem solo na nomiu laha ko a tagugi peleti, nge a lolora u horo gena gineu nem garohurire ko nem matagara hurire.

²⁶Iniko a Varise a matamu u dodo! Gon solo na gineu ngerehi lolo laha tomuegi, siu a tagugi vin mwasara vage.

²⁷“Hahagavi huri gimiu, ira huhui talo Leo hora noi Mosis meire Varise! Gimiu ira kali goro! Gimiu mwere na qarui mateana a simede ram burue gena laem, dam lehie varea u garea, nge lolona u horo gena hui tamate ko a betugi u mada.

²⁸Mwerehi vohogi, dam lehi gimiu lo betumiu varea huri ve neu garea, ne a lolomiu mo horo gena kalikeli ko a galegaleasi.

²⁹“Hahagavi huri gimiu, ira huhui talo Leo hora noi Mosis meire Varise! Gimiu ira kali goro! Gimiu nem vai na qaru huri ira tangaloi veve rarai ko nem gabugi na voda huri ira tangaloi vovohoi tau tuei,

³⁰ko nem veve vena, ‘Tare ve gide dau toga tuei lo taro retamada rau toga tau, gide dain he vai na gineu mwere ngaha tea mwere ingere rau veire, dain he wehire tangaloi veve rarai tea.’

³¹Mwerehi, gimiu nem daragi ve igimiu a duvire tangaloi hi rau wehire tangaloi veve rarai tau tuei.

³²Ko gimiu nen vai, nen vai vagasigi na tabanagi noi retamamiu rau teu vuigi tau tuei!

³³Gimiu ira duvi Mwata! Huri hava gineu gimiu nem tarani ve nein toa? Vin vei gagarasigi gimiu lo gagarasi redu.

³⁴Giniehi, nam veve lawe gimiu vena: nain horara lawe gimiu ira tangaloi veve rarai, ira mataisao ko ira huhui; nein wehire lavasigi, nein toto vehavehaginire lavasigi lo gai saroutu, ko nein vivihire lavasigi lo nomiu valei soneana, ko nein livusire den togagi venue tuegi sulune tuegi.

³⁵Siu nein rongo gagarasi hurire tangaloi vovohoi doluegi rau wehire, u teu vuigi lui Ebel a tangaloi vovohoi, mo dadari lui Sekaraea netui Barakaia, nem wehie lo livugei vale gogona ko a tanoi rugurugu.

³⁶A hogo, nam veve lawe gimiu vena, vin vei gagarasigi na sinobu ta bagataha hurire tangaloi ingere ngaha doluegi neu wehire.

³⁷“Jerusalem, Jerusalem! Gimiu nem wehire tangaloi veve rarai ko nem buguri na tangaloi hora noi God u horara vonai! Nau tarani vagasaosao ve nain koko goro gimiu mwere na toa mo vagalugugi ra netune lolo vavai bainhine, ko gimiu nehe tarani tea.

³⁸Nge siseri ngaha a vanuemiu vin eno vurogi.

³⁹Huri nam veve lawe gimiu vena, den siseri ngaha gimiu nein he lehieu te taligu vin dadari lo tarogi nein veve vena, ‘Waregarea ginie hi mo vonai lo henai Huqe.’ ”