Read East Ambae MATIU 24 Bible Online

MATIU 24 - East Ambae bible

MATIU 24

¹Lune i Jisas mo mwalue mo vano dena Sara Gogona, ira nona rorongtagi ram vonai lobena vena haharagi na vale ngerehi lo Sara Gogona lawea.

²Ingeie mo duvi lawera vena, “?Io, gimiu nem lehi na gineu ingere ngaha? A hogo, nam veve lawe gimiu vena, a vatu gatagale vin he toga tea lo ului vetu tuegi, nge rain sasarugi doluegi.”

³Lune i Jisas mo toga lo Vusi Oliv, ira rorongtagi ram vonai lobena gahera, ram huie vena, “Gon serelue lawe gamai ve a gineu ngere ngaha vin vei tagaha, ko a hava gigilegi vin haharagi ve iniko goin vonai ko ve a ure vin rovo.”

⁴I Jisas mo duvi lawera vena: “Nen leo goro gimiu vaiteu ihine tea mo sine gimiu.

⁵A tangaloi u sao rain vonai lo henaku, rain veve vena, ‘Ineu hi i Kraes!’ ko rain sine na sinobu sao.

⁶Gimiu nein rongo huri na vuro ko a roroi vuro. Nen leo goro vaiteu nem romasi hurie. A gineu ingere ngaha rain he mese tea rain dadari tomue, nge a rovonagi hatie tau.

⁷Huri a sinobu vin qalo mena sinobu, ko a vanue mena vanue. A maro ko a ruru rain vonai lo vanue saosao.

⁸A gineu ingere naha doluegi ram mwere na tauvui gagarasi lo bavabava.

⁹“Ngere rain wiri bibi gimiu huri ve rain vei gagarasigi gimiu ko rain uevagamate gimiu. A tangaloi doluegi rain sebugi gimiu huri na henaku.

¹⁰U sao rain siregi na nora ladohogo lo taro hi; rain vui rono na leoi gara ko rain vui sebuginire.

¹¹A tangaloi ligoligogi kalikeli u sao rain maraga ko rain sine na sinobu u sao.

¹²A gineu esi rain gagaburegi, ko giniehi, a tabetabe nora sinobu u sao vin gamwadidi.

¹³Nge ihine vin labe siaga vin dadari lo rovonagi vin mwaso.

¹⁴Ko vin toretore gina Roro Garea ngaha huri ve i God vin voragi nora Ratahigi dali na ure doluegi, huri na gigilegi lawera tangaloi doluegi - siu a rovonagi vin vonai.

¹⁵“Gimiu nein lehi na ‘Gineu Vovonosi mo vai mwasarugi’, ngehi a tangaloi veve rarai i Daniel u veve huri, vin labe lo ute gogona.” (Ihine mo vasogo nge na ilo vurugegi!)

¹⁶Lo tarogi hi ingere ram toga Judia ran toa sulo vusi.

¹⁷Ihine mo toga lo ului valena vin he hivo tea lolona vena lai na hava gineu.

¹⁸Ihine mo toga lo talu vin he mule tea lo valena vena lai na luqana.

¹⁹Nge hahagavi hurire vavine ram wali taqangi ko irahine ram vagahuhu lo bongi ngerehi!

²⁰Nen tataro ve igimiu nein mese toa lolo taroi gamwadidi sige lo rani mangaana!

²¹A vevenagi lo tarogi hi a gagarasi vin lawua, hatie gagarasi mwerehi mosigei lo tauvui ure mo dadari hibagataha, ko vin he mwerehi tea taligu tetagaha.

²²Nge God mo wiri utu na bongi ingere naha; ve mwerehi hatie, ihine vin he mwaso lai tea. Nge a vevenagi a sinobu i God u leowahera, nge u wiri utu na bongi ingere ngaha.

²³“Lo tarogi ngehi, tare ve ihine vin veve lawe gimiu vena, ‘Leo, hingaha i Kraes!’ sige ‘Ingeie hi!’ nen he ladohogo te ginie.

²⁴Huri ira Kraes kalikeli ko ira tangaloi veve rarai kalikeli rain maraga; rain vei na gigilegi lalawua ko a vaigivui huri ve ran sinara leowahe noi God, tare mo lai.

²⁵Nen leo, ineu nau veve beno na gineu ingere ngaha lawe gimiu gitomue.

²⁶“Sige tare ve a sinobu rain veve lawe gimiu vena, ‘Leo, Ingeie lo vanue vurogi!’ nen he vano te aie; sige rain veve vena, ‘Leo, Ingeie mo hili tahi!’ nen he ladohogo te ginie.

²⁷Huri i Netui Tangaloi vin vonai mwere na vile mo vile utuhi na mahava doluegi dena matainaho kalo mo dadari lo matainaho roro.

²⁸“Vin mwere na manu hi ram gani na matei gineu. Lune a matei gineu mo taqao ingere ram sone bulutegi aiehi.

²⁹“Siserigi lo tagui gagarasi lo bongi ngerehi a aho vin dodo ko a vule vin he leleo tea, ko a visiu rain soi dena mahava, ko a managi talo mahava rain gilu lategi den tanora.

³⁰Ko lo tarogi ngehi a gigilegi noi Netui Tangaloi vin serelue lo mahava; ko a duvi sinobu doluegi lolo ure rain tengi, ko rain lehi i Netui Tangaloi vin vonai lo dodo lolo mahava mena managi ko a varavara lawua.

³¹Siu nge vin hora ira nona engsel mena diloi tavue ko rain vile ira nona leowahe dali na ureure.

³²“Nen hikehike lo gato tavalu huri na vui duledule. Lune a rangana mo tauvuigi mo mwaukeuke, ko mo tavutevu, nem ilo ve a mwagoto mo kakarani.

³³Mwerehi vage, lune nem lehi na gineu ingere ngaha doluegi ram vonai, nein ilo ve a tarogi mo kakarani vonai lo mataivale.

³⁴A hogo, nam veve lawe gimiu vena, a tangaloi ram mwaso siseri ngaha ran he mate tea doluegi vin dadari a gineu doluegi naha rain vonai.

³⁵A mahava ko a tano roin rovo, nge noku leo vin he rovo lai tea.

³⁶“Nge huri na bongi ngehi sige a mahoi reni ngehi ihine he ilo tea, hatie ira engsel ta eulu, hatie i Netui, nge i Mama hogosie.

³⁷Huri mwere u vei lo taroi Noa, mwerehi vage vin vei lo tarogi i Netui Tangaloi vin vonai.

³⁸Huri lo taro tomue a wai u horo goro na vanue, rau gagani, rau inuinu, rau legi, u dadari lo tarogi Noa mo kalo lolo aka;

³⁹nge rahe ilo na hava gineu tea, u dadari a wai u horo goro na vanue ko mo wali vohoginire doluegi. Vin vei mwerehi lo tarogi i Netui Tangaloi vin vonai.

⁴⁰Lo tarogi hi a tangaloi gairue roin tabana lolo talu; vin leie tuegi, tuegi vin tino.

⁴¹A vavine gairue roin vei na hinaga bubugi; vin leie tuegi, tuegi vin tino.

⁴²Siu nen leo huri, a vevenagi ne he ilo tea a tarogi a nomiu Huqe vin vonai lolona.

⁴³Nge ne ilo vurugegi ngaha, tare ve a huqei vale u ilo na hava taro lolo bongi huri ve a tangaloi belu vin vonai lolo valena, nge vin leo goro na tangaloi belu hi ve vin mese waga na valena.

⁴⁴Giniehi, gimiu vage nen toga rarai, a vevenagi i Netui Tangaloi vin vonai lo tarogi gimiu nge he lado rarai tea.

⁴⁵“?Ihine hi a tangaloi tabanagi a hui garea ko u mataisao? Ingeie hi a huqei vale mo taue mo leogorora tangaloi tabanagi doluegi talo valena, ve vin bete na gara hinaga lawera lo tarogi vovohoi.

⁴⁶Havuhevu mena tangaloi tabanagi hi nona huqe vin haqea mo vai mwerehi lune nge vin mule vonai teligu lo valena!

⁴⁷A hogo, nam veve lawe gimiu vena, nona huqe vin teue vin leogoro vataha na nona lalaie doluegi.

⁴⁸Nge a tangaloi tabanagi hi a hui wiri vin lado lolo domine sibona vena, ‘Noku huqe vin he vonai tea vena siseri,’

⁴⁹ko nge mo tau vuigi mo wehire tangaloi tabanagi lavasigi, mo gagani mo inuinu meire tangaloi ram inu dadavule.

⁵⁰Siu nona huqe vin mule vonai teligu lo tarogi nge he lado rarai tea ko lo mahoi reni ne he ilo tea;

⁵¹a huqe vin tei vurivurie, vin teue vin vano meire kali goro. Aiehi vin tangi ko vin gasigesigi livona.