Read East Ambae MATIU 28 Bible Online

MATIU 28 - East Ambae bible

MATIU 28

¹Lune a Rani Mangaana mo rovo, lolo robongi siaga, a muei rani talo wik, i Meri ta Makdala mei Meri tuegi rom vano ve roin lehi na qaru.

²Siserigi a ruru lawua mo ruru; huri a engsel noi Huqe mo hivo den eulu, mo lulugi vohogi na vatu ko mo toga lune.

³A varavarana mwere na vile ko a gavune u mevute garagara.

⁴A tangaloi leogoro ram matagu liu, ram ruru ruru ram mwere na tangaloi rau mate.

⁵A engsel mo veve lawera vavine vena, “Nero mese matagu. Nau ilo ve gimiru nerom hikesi Jisas rau toto vehavehaginie lo gai saroutu.

⁶Nge hatie tangaha, huri nge u maraga taligu mwere u veve tau. Nero vonai nero lehi na tanogi hi u eno aie.

⁷Nero vano siseri, nero veve lawe na nona rorongtagi vena: ‘Nge u maraga taligu dena mateana ko siserigi ngaha nge mo vano tomuegi gimiu a Kalili, nein lehe aiehi!’ Nam veve lawe gimiu ngaha.

⁸Siu rom vano siseri dena qaru, rom matagu ko rom havuhevu garagara, ko rom toa rom vano huri ve roin veve lawera nona rorongtagi.

⁹Siserigi i Jisas mo bulu meire, mo veve vena, “Garea lawe gimiru.” Ngere rom vonai lobena rom sisiqeu goroe ko rom tango lo karune.

¹⁰Jisas mo veve lawera vena, Nero mese matagu. Nero vano nero veve lawe retueku ve rain vano a Kalili ko rain lehieu aiehi.

¹¹Lo tarogi a vavine rom mule taligu, a tangaloi vuro lavasigi rau leogoro na qaru ram mule lolo vanue ram veve lawera muei rugurugu huri na gineu doluegi rau rovo vonai.

¹²Ira muei rugurugu meire tamaragai ram sone bubugi ko ram tau na nora leo; ram bete a homu lawua lawera tangaloi vuro

¹³ko ram veve vena, “Gimiu nen veve huri ve nona rorongtagi rau vonai lolo bongi ko ram balu na betune lo tarogi hi gimiu nem maturu.

¹⁴Ko tare ve a Kavman mo rongo huri ngaha, gamai gain vovohoigi na gineu ngehi lawea, ko gamai gain veie ve gimiu nein mese vano lo asigi huri na gineu hi.”

¹⁵Ira leogoro ram lai na homu ko ram vai mwerehi ira muei rugurugu rau veve lawera. A rorogi hi mo vano dolueginire ta Judia mo dadari bagataha.

¹⁶Ira rorongtagi hangavulu domwagi gatagale ram vano lo vusi hi a Kalili i Jisas u horara ve rain vano aie.

¹⁷Lune ram lehie ram sisiqeu goroe, nge ingere lavasigi ram lado gairue.

¹⁸I Jisas mo vonai lobera ko mo veve lawera vena: “Nau lei na managi doluegi beno lo eulu ko lo vavagi.

¹⁹Siu nen vano lobera sinobu doluegi vataha ute ko nen vaire ran voragi noku rorongtagi: nen garuhigogona ginire lo henai Mama ko i Netui ko i Vui Gogona,

²⁰ko nen huhuire ve ran rongo huri na gineu doluegi nau veve lawe gimiu. Ko leo! Ineu mei gimiu vataha bongi, vin dadari lo rovonai ure.”