Read East Ambae MATIU 4 Bible Online

MATIU 4 - East Ambae bible

MATIU 4

¹Siu a Vui Gogona mo tomuegi Jisas sulo vanue vurogi ve i Vui Esi vin keli lehie.

²Ingere he gagani tea huri na rani ngavulu gaivesi ko a bongi ngavulu gaivesi, siu mo bei mweruruhi.

³Ko a Vui Esi, mo vanai lobei Jisas mo kali lehie, mo veve vena, “Tare ve iniko i Netui God, gon veve lawe na vatu ngere ngaha ve ran dori gina bereti.”

⁴I Jisas mo duvi vena, “U reve beno lo Reve reve Gogona vena, ‘A tangaloi vin he mwaso lai tea gina bereti hogosie, nge gina leo doluegi ram mwalue dena wuwai God hi mo veve.’ ”

⁵Siu a Vui esi mo lai Jisas vano lo togagi venue lawua gogona Jerusalem, ko mo labetaginie lo hunei Vale Gogona, hi u eno namawe,

⁶Ko mo veve lawea vena, “Tare ve iniko i Netui God, gon qale hivo; vuine huri u reve beno lo Reve reve Gogona vena: ‘God vin horara nona engsel hurigo: Rain halovigo hage lo limara, vai teu gom taturegi na karumu lo vatu.’ ”

⁷I Jisas mo duvi vena, “U reve beno vage lo Reve reve Gogona vena, ‘Go mese kali lehi na Huqe nomu God.’ ”

⁸Siu a Vui esi mo lai Jisas hage lo vuhungei vusi namawe mo haharagi na vanuei ratahigi doluegi talo ure ko a gareanara,

⁹mo veve lawea vena, “Nain bete na gineu doluegi ingere ngaha lawego, tare ve gom huduhudu goroau.”

¹⁰Siu I Jisas mo duvi lawea vena, “Vano denieu, Setan! Huri u reve beno lo Reve reve Gogona vena, ‘Gon huduhudu goro na Huqe a nomu God, ko gon vagagogona ginie hogosie.’ ”

¹¹I Siu a Vui esi mo siregi Jisas; ko ira engsel ram vonai, ram tabanagi lawea.

¹²I Jisas mo rongo huri ve rau teu Jon beno lo valei vauveu, ingeie mo vano beragi a Kalili.

¹³Ko ingeie mo siregi Nasaret, mo vano mo toga a Kabeniam, lo mwararai Wai ta Kalili, lo vanuara Sebulun ko Navtali.

¹⁴Mo vai mwere ngaha huri ve vin vagahorongi na leo gina wuwai Aesaea a tangaloi ligoligogi u veve vena:

¹⁵“Vanuara Sebulun, vanuara Navtali, Mo huri mo vano tavului Jodan, Kalili a togagi venue nora haroharo!

¹⁶A sinobu ram toga lolo dodogi ram lehi na leleo lawua! Ko ingere ram toga lolo malumelui mateana a leleo mo leleo haginire!”

¹⁷Dena tarogi hi i Jisas mo tau vuigi mo toretore vena: “Nen ladowenigi, a vevenagi a mwasoana garaqa hi God mo ratahigi lolona mo kakarani ve na vonai!”

¹⁸I Jisas mo vano lo mwararai Wai ta Kalili, mo lehi na tangaloi loli ige gairue ingere a reretehigi, Saemon, mo ware gi Bita, ko i tuana Andru, rom tuli nora gabe lolo wai.

¹⁹I Jisas mo veve lawera vena, “Nero hurieu ko ineu nain huhui gimiru neri loli na tangaloi.”

²⁰Siserigi rom siregi na nora gabe rom hurie.

²¹Mo dige qilodo mo lehire reretehigi gairue vage, i Jemis netui Sebedi ko i tuana Jon. Ingere vage rom toga lolo aka mei tamara Sebedi, rom vai huri na nora gabe. I Jisas mo warera;

²²rom maraga siserigi dena akara ko i tamara, rom huri Jisas.

²³I Jisas mo dige doluegi na Kalili, mo huhui lolo nora valei soneana, mo toretore gina Roro Garea huri ve God vin voragi Ratahigi goro na tangaloi doluegi ko mo vagamwasoire ram sege gina lalangai segeana u sao.

²⁴A rorona mo gao doluegi na vanue Siria, ko ram laire hi ram sege gina lalangai segeana wagiwegineu u sao, ko lavasigi ram a rongo gagarasi ram vonai meire lobena: lavasigi a vui esi lure, lavasigi ram matemategivule, lavasigi ira lukuluku; ko i Jisas mo vagamwasoire.

²⁵A sinobu u sao ram hurie den Kalili, dena qatui venue hangavulu, den Jerusalem, den Judia ko dena tavului Jodan.