Read East Ambae MATIU 5 Bible Online

MATIU 5 - East Ambae bible

MATIU 5

¹I Jisas mo lehi na sinobu, mo hage lo vusi. Ingeie mo toga hivo aie ko ira nona rorongtagi ram vonai lobena. Siu ingeie mo tauvuigi mo huhuire

²mo veve vena:

³“Havuhevu mei rahine ram ilo ve ram mahogi lolo lolora: Huri a nora mwasoana garaqa God mo ratahigi lolona.

⁴“Havuhevu mei rahine ram tangi: huri God vin vei mesuri ginire.

⁵“Havuhevu mei rahine ram ladowuweu: huri ingere ran lei hougi na ure.

⁶“Havuhevu mei rahine ram mwaruruhi ko ram madogu huri ve rain vei na vataha gineu i God mo tarani: huri ingere rain guqe.

⁷“Havuhevu mei rahine ram hagavi na tangaloi: !Huri God vin hagavire taligu!

⁸“Havuhevu mei rahine a taqangire u renige: !Huri ingere rain lehi God!

⁹Havuhevu mei rahine ram vai bulu taligu ginire lo tamwata: Huri God vin warera ve ire netune!

¹⁰“Havuhevu mei rahine ram vai asiesiginire a vevenagi ram vai na gineu i God mo tarani: Huri a nora mwasoana garaqa God mo ratahigi lolona.

¹¹“Havuhevu mei gimiu lune ingere ram hurei gimiu ko ram vaivei gimiu ko ram veve asiesigi gimiu vurogi hurieu.

¹²Nen garigeri ko nen havuhevu, huri a gaitawe lawua mo eno rarai gimiu lo eulu. Huri mwerehi ingere ram vaivei ira tangaloi ligoligogi rau toga tomue den gimiu.

¹³“Igimiu neu mwere na mavai talo ure. Nge tare ve a mavai mo voragi wai mweda, vin vei gogonaginie taligu gena hava gineu? U voragi na gineu vurogi, ram tuli vohogi ko ram vavarahie.

¹⁴“Igimiu neu mwere na leleo talo ure. A togagi venue mo toga lo vusi vin he toga vunigi lei tea.

¹⁵Ihine he bule na leleo tea vena taue lo vavai laha, ingeie mo taue lo gaiturei leleo, ko mo leleohagi na sinobu doluegi lolo vale.

¹⁶Mwere hi teu a nomiu leleo na leleo lo nagora tangaloi wagineu, ve ingere rain lehi na nomiu lalakogi u garea ko rain waregi roroi Tamamiu eulu hurie.

¹⁷“Gimiu ne mese lado ve ineu nau vonai ve nain vei vohogi na Leo hora noi Mosis sige a leo huhui nora tangaloi ligoligogi. Na he vonai tea ve nain vei vohoginire, nge nau vonai ve nain vagahorongi na havagineu rau laqagi.

¹⁸A hogo, nam veve lawe gimiu vena, vin dadari a mahava ko a tano roin sala, a leta gatagale sige a gigilegi leo gatagale vin he sala tea dena Leo hora, vin dadari vin vagahorongi na gineu doluegi.

¹⁹Giniehi, tare ve ihine tea vin tala vohogi na Leo hora gatagale denire ngaha u biti ko vin huhui na tangaloi mwerehi, vin warea ve ingeie bitibiti geni lo mwasoana garaqa God mo ratahigi lolona. Tare ve ihine tea vin tabe na Leo hora ko vin huhui na tangaloi mwerehi, vin warea ve u lawua lo mwasoana garaqa God mo ratahigi lolona.

²⁰Huri ineu nam veve lawe gimiu vena, tare ve gimiu nein he ronghuri tea vena liu denire huhui talo Leo hora noi Mosis meire Varise ve nein vei na gineu vatahae i God mo tarani, igimiu nein he ahu lei tea lolo mwasoana garaqa God mo ratahigi lolona.

²¹“Igimiu neu rongo ve u veve lawera noda sinobu ta tuei redu vena, ‘Gon mese ue tangaloi, ko ingeie mo ue, u tatarise ve vin leie sulo vevegi.’

²²Nge ineu nam veve lawe gimiu vena: ihine tea mo lolo gagasigi tuana u tatarise ve vin lei nan leo vevegi; ihine tea mo veve leo asi lawe tuana sige ve i haqena ‘Reragi!’ U tatarise ve a Kansel vin veveginie, nge tare ve nem ware hine tea ve ingeie a dalo u tatarise ve nein vano lolo gagarasi ko a avi redu.

²³Giniehi, tare ve gom lai na nomu hogogi sulo tanoi rugurugu, ko aiehi gom lado haqe ve a gineu he vovohoi tea meigo koi tuemu,

²⁴gon siregi na nomu hogogi na eno aiehi lo nagoi tanoi rugurugu, ko gon vano tomue, gon vai bulu garea mei tuemu; siu gobei vanai teligu, gon turegi na nomu hogogi lawe God.

²⁵“Gon bulu garea siserigi mena nomu tavului vuro lune gimiru mosigei lo turegi, nerom vano lo kot. Tare ve goin he vai te mwere ngaha, nge vin leigo vano lawe vevegi, ko i vevegi vin laigo vano lawe na bolisman, ko ingeie vin teugo lo valei vauveu.

²⁶A hogo nam veve lawego vena, goin he mwalue lai tea vin dadari goin voli vagasigi na bugumu.

²⁷“Gimiu neu rongo ve rau veve vena, ‘Gon mese vagasile lo vavine.’

²⁸Nge ineu nam veve lawe gimiu vena: ihine tea mo lehi na vavine ko mo vai hurie, ingeie u vagasile beno meie lolo taqangine.

²⁹Tare ve a matamu lo matue mo vai tatureginigo, gon dangea ko gon tuli vohoginie denigo. U garea meigo huri ve a mavusui betumu vin sala denie hi ve rain tuli vohogi na betumu doluegi lolo gagarasi redu.

³⁰Ko tare ve a limemu lo matue mo vai tatureginigo, gon tai utue ko gon tuli vohoginie denigo. U garea meigo huri ve a mavusui betumu vin sala denie hi ve a betumu doluegi vin vano lolo gagarasi redu.

³¹“Rau veve vena, ‘Ihine tea mo hora vohogi horana, nge vin lei lawea na revereve huri na togaana vilewahe lawea.’

³²Nge ineu nam veve lawe gimiu vena: ihine tea mo hora vohogi horana, nge i horana he vagasile tea, nge mo vaie ve vin vagasile; ko a mwera hi mo lagi meie nge mo vagasile vage.

³³“Gimiu neu rongo vage ve rau veve lawera ta tuei vena, ‘Gon mese haharigi mwedagi,’ nge ‘Gon vai na hava gineu na huri na nomu haharigi lawe na Huqe.’

³⁴Nge ineu nam veve lawe gimiu vena: nen mese haharigi vohogi; nen mese ware ingeie hi eulu, a vevenagi eulu a tanoi togatoga ratahigi noi God;

³⁵nen mese ware na ure, a vevenagi ngehi a tanoi karune; nen mese ware na Jerusalem, a vevenagi ngehi a togagi venue nona Huqe lawua.

³⁶Nen mese ware na qatumiu, a vevenagi ne he vai lei na vulumiu gatagale tea vena mavute sige na maeto.

³⁷Nge a nomiu leo ve io, io, sige hatie, hatie - a hava leo vage nem veve ngehi mo vonai dena Gineu Esi.

³⁸Gimiu neu rongo ve rau veve vena, ‘Mata huri mata, ko livo huri livo.’

³⁹Nge ineu nam veve lawe gimiu vena: nen mese raba gineu esi gina gineu esi. Tare ve ihine mo rabago lo balahemu lo matue, gon siregi lawea ve vin rabago lo mawiri vage.

⁴⁰Tare ve ihine mo laigo vano lo kot, mo tarani ve vin lei na luqemu, gon bete na gavumu vage lawea.

⁴¹Tare ve a soldia ta Rom mo garoginigo ve gon waliweli nona huri mahoi aho gatagale, gon vano meie huri mahoi aho gairue.

⁴²Tare ve ihine mo navu na gineu denigo, gon bete lawea; tare ve ihine mo tarani vena lai gineu denigo, gon mese sigigi.

⁴³“Gimiu neu rongo ve rau veve vena, ‘Gon tabe na taguivenuemu, ko gon loloasi gina nomu tavului vuro.

⁴⁴Nge ineu nam veve lawe gimiu vena: nen tabe ira nomiu tavului vuro, ko nen tataro hurire ram vai asiesigi gimiu,

⁴⁵huri ve giniehi, nein voragi ira netui Tamamiu eulu; a vevenagi ingeie mo vai na nona aho mo leleo lo sinobu rau esi ko rau garea vage, ko mo bete na uhe lawe rahine rau vovohoi ko lawe rahine rahe vovohoi tea.

⁴⁶Huri tare ve nem tabe irahine hogosie ram tabe gimiu, igimiu nem rarai na gaitawe huri hava gineu? Huri ira tangaloi vilevile homu vage ingere ram vai mwerehi.

⁴⁷Tare ve gimiu nem lai vurugegi ira nomiu buluana hogosie, gimiu nem vai na hava gineu liu denire tangaloi wagineu? Huri ira haroharo vage ingere ram vai mwerehi.

⁴⁸Nge a domimiu na garea vurugegi mwere na domi Tamamiu eulu u garea vurugegi.