Read East Ambae MATIU 6 Bible Online

MATIU 6 - East Ambae bible

MATIU 6

¹“Gimiu nen leo huri nen mese vai na nomiu lalakogi garea lo nagora tangaloi ve ingere ran lehi gimiu. Tare ve gimiu nem vai mwere ngaha, nein he lai na gaitawe tea den Tamamiu eulu.

²“Lune gom bete na tabeana lawe hine tea, gon mese uvi na tavue huri ve a sinobu ran lehigo, mwere ira kaligoro ram vai lolo valei soneana ko lolo sara, huri ve a tangaloi rain geriginire hurie. A hogo, nam veve lawe gimiu vena, rau lei na nora gaitawe beno.

³Nge iniko lune gom bete na tabeana lawe hine, a mawirimu na mese ilo na hava gineu a matuemu mo vaie,

⁴huri ve a nomu doridori garea vin toga hiligi. Ko i Tamamu, mo lehi na hava gineu gom vai hiliginie, vin teugo.

⁵“Ko lune gimiu nem tataro, nen mese mwere ira kaligoro. Huri ngerehi ram tarani ve ran labe ram tataro lolo valei soneana ko lolo livugei sara, huri ve a tangaloi rain lehire. A hogo, nam veve lawe gimiu vena, rau lei na nora gaitawe beno.

⁶Nge iniko lune gom tataro, gon vano lolo nomu besebese, gon gorogoro na mataivale, ko gon tataro lawe i Tamamu mo toga hiligi. Ko i Tamamu, mo lehi na hava gineu gom vai hiliginie, vin tawego.

⁷“Lune gimiu nem tataro, nen mese gatogato qilingo, mwere ira haroharo, huri ngerehi ram lado ve i God vin rongo hurire, huri na nora leo u sao.

⁸Gimiu nen mese mwereire; huri i Tamamiu u ilo beno huri na hava gineu gimiu nem tarani tomue siu nem bei nevu.

⁹Giniehi, gimiu nen tataro mwere ngaha: ‘Mama eulu: a henamu u gogona,

¹⁰Gamai gam tarani ve a tangaloi doluegi rain ladomava ginigo, ko iniko goin voragi Ratahigi nora tangaloi doluegi, ve a tangaloi doluegi lo ureure rain mwerehi eulu.

¹¹Lai himei gaqarigi lawe gamai a hinaga na eno huri gaqarigi.

¹²Gon ladovohogi na bugumai, mwerehi igamai gam ladovohogi na bugure hi ram vai asiesigi gamai.

¹³Gon mese siregi gamai lolo kalikeli, gon lai gamai den i Gineu Esi.’

¹⁴“Huri tare ve gimiu nem ladovohogi na bugure tangaloi ram vai gimiu, i Tamamiu eulu vage vin ladovohogi na bugumiu.

¹⁵Nge tare ve igimiu nehe ladovohogi na bugure tangaloi tea ram vai gimiu, i Tamamiu vin he ladovohogi na bugumiu tea.

¹⁶“Lune nem golo, nen mese siregi na nagomiu vena hahagavi mwere ira kaligoro; ingere ram tatavigi huri ve a tangaloi rain lehire ve ram golo. A hogo, nam veve lawe gimiu vena, rau lei na nora gaitawe beno.

¹⁷Nge iniko lune gom golo, gon solo na nagomu ko gon hibi na vulumiu,

¹⁸huri ve a tangaloi wagineu ra mese lehigo ve gom golo, nge i Tamamu hogosie mo toga hiligi. Ko i Tamana, mo lehi na havagineu gom vai hiliginie, vin tawego.

¹⁹“Nen mese hogoni bubugi na nomiu lalaie lo ure ngaha, a boeboe ram ganire ko a dairegi mo vagamabobogi nire ko a tangaloi belu ram ahu ve ran balu aie.

²⁰Nge nen hogoni bubugi na nomiu lalaie lo eulu, aiehi a boeboe rain he gani lei tea, ko a dairegi vin he vagamabobogi lei tea, ko a tangaloi belu rain he ahu lei tea ve ran balu.

²¹Huri lo tanogi hi a nomiu lalaie ram eno aie, a lolomu vin eno aiehi vage.

²²A mata a leleo huri na betugi: tare ve a matamu u garea, a betumu doluegi vin horo gina leleo;

²³nge tare ve a matamu u esi, a betumu doluegi vin horo gina dodogi. Giniehi, tare ve a leleo lolo lolomu mo dodo, aiehi, mo dodo liu!

²⁴“Ihine tea vin he tabana lai tea lawe na ratahigi gairue. Huri vin vei asiesiginie tuegi ko vin tabea tuegi, vin leilei hageginie tuegi ko vin vei hivohivo ginie tuegi. Nein he tabana lai tea lawe God ko a mane vagatagale.

²⁵“Giniehi, nam veve lawe gimiu ve nen mese romasi huri na mwasoamiu, huri na hava gineu nem gani ko nem inu, sige huri na hava gineu nem saru goro na betumiu ginie. ?Tau wa mwasoamiu he liu tea den hinaga, ko a betumiu he liu tea den luqe?

²⁶Nen lehi na manu namawe: rahe rivurivu tea, ra he lai na mwasigi tea, ko ra he tau bubugi nire tea lolo vale: nge i Tamamiu eulu mo vanganire. ?Wa igimiu ne he liuhage tea dena manu?

²⁷Ihine tea den gimiu, mo romasi huri na mwasoana, vin vei lei vena toga na mala qaravu?

²⁸“?Huri hava i igimiu nem romasi huri na luqe? Nen lehi na vire ram mauri mwere hilogo. Ra he tabana tea, rahe redigi tea luqara.

²⁹Nge nam veve lawe gimiu vena a luqei Solomon, ingeie u ratahigi liuhage denire tangaloi doluegi, he raka tea mwere na vire ngere ngaha.

³⁰Tare ve i God mo gabugi na labute mwerehi, he eno tea vena ribi, gaqarigi mo labe lolo talu, mavugo rain tulire talolo avi. ?Tau vin he gabugi gimiu tea vena liu denire, gimiu ira ladohogo biti?

³¹?Giniehi, nen mese romasi huri vena, ‘?Nain geni na hava gineu? Nain inu na hava gineu?’ sige ‘?Nain luqegi na hava gineu?’

³²Huri a gineu ingere ngaha hi ira haroharo ram hike huri. Huri i Tamamiu eulu mo ilo ve nem tarani na gineu ingere ngaha doluegi.

³³Siu nen hike tomue huri nona Ute ko a lengagi u vovohoi nge mo tarani, ko nge vin bete na gineu ngerehi doluegi vage lawe gimiu.

³⁴Giniehi, nen mese romasi huri na rani mavugo; huri mavugo a rani wagineu. A gineu esi ram vonai vataha rani rau tatarise huri na rani hi.