Read East Ambae MATIU 8 Bible Online

MATIU 8 - East Ambae bible

MATIU 8

¹I Jisas mo himei dena vusi, ko a sinobu u sao ram hurie.

²A tangaloi a vohavono mo vonai lobena, mo sisiqeu goroe, mo veve vena, “Huqe, tare ve gom tarani, gon vaieu ve nan mwasara.”

³I Jisas mo vugeri na limana mo tango vano lune, mo veve vena, “Nam tarani, gon mwasara!” Ko siserigi ingeie mo mwasara dena vohavono.

⁴Ko I Jisas mo veve lawea vena, “Gon rongo, go mese veve lategi lawe hine tea beno, nge gon vano tuturedu lobei rugurugu na lehigo tomue. Ko gon bete nomu hogogi mwere a Leo hora noi Mosis u veve, a gigilegi lawera ve gu mwasara.”

⁵Lune i Jisas mo ahu vano a Kabeniam, a leogoro soldia vudolue mo vonai lobena, mo navuhie vena,

⁶“Huqe a noku mwalakelo mo eno lo vale u luku, mo gagarasi u liu.”

⁷I Jisas mo veve lawea vena, “Nain vano, nain vagamwasoie.”

⁸A leogoro mo duvi vena, “Mese, Huqe. Na he tatarise tea ve goin ehu lolo valeku. Nge gon hora na leomu hogosie, ko a noku mwalakelo vin mwaso.

⁹Huri ineu vage nam toga lo vavara tangaloi ram hako huireana goroau, ko ineu nam hako huireana gorora noku soldia; nam horae gatagale denire vena, ‘Gon vano!’ ko mo vano; ko nam horae tuegi vena, ‘Gon vonai!’ ko mo vonai; ko nam hora na noku tangaloi tabanagi vena, ‘Gon vaie ngaha!’ ko mo vaie.

¹⁰Lune i Jisas mo rono mwerehi, nge mo garigi huri, mo veve lawe rahine ram hurie vena: “A hogo, nam veve lawe gimiu vena, na he haqe ihine tea a Israel mena ladohogo u lawua mwere ngaha.

¹¹Nam veve lawe gimiu vena, ingere rau sao rain vonai dena vui matainaho ko dena matainaho roro, rain toga hivo mei Ebraham ko i Aesak ko i Jekob lo mwasoana garaqa God mo ratahigi lolona.

¹²Nge ira lai hougi na mwasoana garaqa vin tuli vohoginire lolo dodogi varea, rain tangi ko rain gasigesigi livora aie.”

¹³Ko i Jisas mo veve lawe na leogoro vena, “Gon vano, ko huri a nomu ladohogo vin vei mwerehi lawego.” Ko a mwalakelo hi mo mwaso taligu lo mahoi rani hi.

¹⁴I Jisas u ehu lolo valei Bita, mo lehi tubui qeligana mo eno gina mahagite.

¹⁵Nge mo hako lo limana, ko a mahagite hi mo rovo denie. Siu mo maraga, mo vai rarai gana hinaga.

¹⁶Mo revirevi, a sinobu ram lai na tangaloi a vui esi lure lawe Jisas, ko nge mo vuro lue na vui esi gina leona, ko mo vagamwasoire segesege doluegi.

¹⁷Nge mo vai mwere ngaha huri ve vin vagahorongi na leo gina singoi Aesaea a tangaloi veve rarai vena, Ingeie sibona mo lai vohogi na noda segeana, ko mo wali na noda gagarasi.

¹⁸I Jisas mo lehi na sinobu ram sone dalie, nge mo hora ira nona rorongtagi ve ran vano lo tavului wei.

¹⁹A huhui gatagale talo Leo hora noi Mosis mo vonai lobena, mo veve vena, “Huhui, nain hurigo vataha ute goin vano aie.”

²⁰I Jisas mo duvi lawea vena, “A wiriu turu a malangara lure, ko a manu namawe a mwagunire lure, nge i Netui Tangaloi hate tanoi niana.”

²¹A tangaloi tuegi, a rorongtagi, mo veve lawea vena, “Huqe, gon siregieu ve nan vano tomue na tulegi tamaku.”

²²I Jisas mo duvi vena, “Gon hurieu, gon sireginire hi rau mate beno ran tulegi na nora mateana sibora.”

²³I Jisas mo kalo sulolo aka ko ira nona rorongtagi ram, hurie.

²⁴Ko a rebu lawua mo maraga lolo wai, giniehi, a navo mo luluwegi na aka. Nge i Jisas mo maturu.

²⁵Ira rorongtagi ram vano lobena, ram vagaradasie, ram veve vena, “Huqe, gon vagamwasoi gide! Dam mate!”

²⁶I Jisas mo duvi lawera vena, “?Huri hava gineu nem matagu, gimiu ira ladohogo biti?” Siu nge mo maraga, mo gato goro na langi mena rebu, ko a wai mo taro dali bulu.

²⁷Ingere doluegi ram garigi, ram veve vena, “?Hava tangaloi naha? Huri a langi ko a rebu rom rongo hurie!”

²⁸I Jisas mo dadari lo tavului wei ta Kalili lolo loloi venue ta Kadara, ko a tangaloi gairue rom haqea rom bei mwelue dena malanga vatu ram tau rahine rau mate lolona. A tangaloi hi a vui esi lure, ko rom muramuraga; giniehi, ihine tea he vano lai tea lo turegi hi.

²⁹Rom ulo siaga vena, “?Netui God, gom tarani na hava gineu mei gamaru? ?Vaiteu gom vonai ve gon vai garasi gamaru, huri a tarogi hatie tau?”

³⁰He vagahao tea a buri boe sao ram huhue.

³¹A vui esi hi rom hui siaga den Jisas vena, “Tare ve goin vuro lue gamaru, gon hora gamaru lawe na boe.”

³²I Jisas mo veve lawera vena, “Nero vano.” Ko a vui esi hi rom mwalue dena tangaloi gairue hi, rom ahu lolo boe. Ko a buri boe doluegi ram toa ram hivo lo bahai wei, ram qale talolo wai, ram dono aie hi.

³³A tangaloi hi rau leo goro na boe ram toa vano, ram dadari lo qatui venue lawua hi, ram veve lategi na gineu ingere ngaha doluegi ko a hava gineu u vei lawe na tangaloi hi a vui esi lure.

³⁴Ngere doluegi talo qatui venue hi ram vonai ram vui haqe mei Jisas; lune ram lehie, ram veve siaga vena vano dena vanuara.