Read East Ambae MATIU 9 Bible Online

MATIU 9 - East Ambae bible

MATIU 9

¹I Jisas mo kalo lo aka, mo vano taligu lo tavului wei, mo dadari lo nona togagi venue.

²A tangaloi lavasigi ram wali na tangaloi lukuluku vonai lobena mo eno lo niana. I Jisas mo lehi na nora ladohogo, mo veve lawe na tangaloi lukuluku hi vena, “Netuku, gon toga surigi, a bugumu u ladovohogi beno!”

³A huhui lavasigi talo Leo hora noi Mosis ram veve veveginire vena, “Ingeie mo veve asiesigi God.”

⁴I Jisas u ilo na nora domiana beno, mo veve vena: “?Huri hava gineu gimiu nem lado na gineu esi lolo taqangimiu?

⁵?Nem lado ve u makemu mwere hilogo huri ve na veve vena, ‘A bugumu u ladovohogi beno,’ sige na veve vena, ‘Gon maraga, gon dige’?

⁶Ineu nai vei matamwasaragi lawe gimiu, ve i Netui Tangaloi mo hako managi lo ure huri ve vin ladovohogi na bugu.” Ko nge mo veve lawe na tangaloi lukuluku hi vena, “Gon maraga, gon wali na niemu, gon mule taligu lo valemu!”

⁷Ko inge mo maraga, mo mule taligu lo valena.

⁸A sinobu ram lehe, ram matagu, ko ram waregareagi God huri mo bete na managi mwere ngaha lawera tangaloi.

⁹I Jisas mo dige lue den aiehi, mo lehi na tangaloi vilevile homu a henana i Matiu mo toga lo tantanona. I Jisas mo veve lawea vena, “Gon hurieu,” ko ingeie mo maraga mo hurie.

¹⁰Lune i Jisas mo gagani lolo valei Matiu, a tangaloi vilevile homu u sao mena tangaloi galegaleasi ram vonai ram gagani mei Jisas ko a nona rorongtagi.

¹¹Ira Varise, ingere a burigi ram hako siagagi na Leo hora noi Mosis, ram lehe, ram hui na nona rorongtagi vena, “?Huri hava gineu a nomiu huhui mo gagani bubugi meire tangaloi vilevile homu ko ira galegaleasi?”

¹²I Jisas mo rongora mo duvi vena, “Irahine ram maso rahe tarani tea dokta, nge irahine hi ram sege.

¹³Nen vano, nen hikehike huri na revereve gogona ngaha, vena, ‘Na he tarani na rugurugu gina kakarue tea, nge a lologarea.’ Huri na he vonai tea ve nain ware irahine rau vovohoi, nge irahine rau galegaleasi.

¹⁴Lo tarogi hi ira rorongtagi noi Jon Garuhigogona ram vonai lobei Jisas ram huie vena, “Huri hava gineu igamai meire Varise gam golo, nge ira nomu rorongtagi hatie?”

¹⁵I Jisas mo duvi vena: “Ira sinobui lagiana rain tengi lei lune ve ingere hi rom lagi ingere meire tau sige hatie? Tau a tarogi vin vonai rain lei vohogi i lagiana hi denire, ko lo tarogi hi ingere ram bei golo.

¹⁶“A tangaloi vin he lai na mavusui luqe garaqa tea vena bulue talo luqe malea. Huri a mavusui luqe garaqa hi vin dare na luqe malea, vin mweduru vin lawua denie hi tomue.

¹⁷A tangaloi rahe saru na waen garaqa tea talolo vinui kakarue malea. Tare ve mo vai mwerehi, a vinui kakarue vin mateteri, ko a waen vin hale vohogi ko a vinui kakarue vin esi. Hatie! Ram tau na waen garaqa lolo vinui kakarue garaqa, ko ingere vunu roin eno vurugegi.”

¹⁸Lune i Jisas mo laqa lawera mosigei, a tangaloi lawua gatagale mo vonai lobena, mo sisiqeu goroe, mo veve vena, “I netuku a maresu vavine mo bei mate; gon vonai gon tau na limemu lune ko vin mwaso taligu.

¹⁹I Jisas mo maraga, mo hurie, ko ira nona rorongtagi vage.

²⁰A vavine gatagale, a dai qaravu u veie a higao hangavulu domwagi gairue, mo vonai lo tagui Jisas, mo sikeli na singoi luqana.

²¹Huri ingeie mo lado vena, “Tare ve nain sikeli na luqana hogosie nain mwaso.”

²²I Jisas mo tudori, mo lehie, mo veve vena, “Netuku, gon toga surigi! A nomu ladohogo mo vaigo gom mwaso.” Ko nge mo mwaso lo mahogi hi.

²³I Jisas mo dadari lo valei tangaloi lawua goro hi. Ingeie mo lehi na tangaloi ram uvi na gori ko a sinobu ram vui rorogi,

²⁴ingeie mo veve vena, “Nen mwalue! A maresu hi he mate tea, nge mo maturu.” Nge ingere ram sovue.

²⁵Lune i Jisas u vuro luara beno, ingeie mo ahu vano lobe na maresu, mo hako lo limana, ko ingeie mo maraga.

²⁶Ko a rorona mo gao doluegi na vanue.

²⁷I Jisas mo dige lue den aiehi, ko a matadodo gairue rom hurie. Rom ulo, rom veve vena, “Netui Devet, gon hagavi gamaru!”

²⁸I Jisas mo ahu lolo vale, ko a matadodo hi rom vonai lobena, ko ingeie mo huire vena, “?Wa nerom ladohogo ve nain vei lei mwere ngaha?” Ingere rom duvi vena, “Io, Huqe.”

²⁹Siu i Jisas mo tango vano lo matara, mo veve vena, “Vin vei lawe gimiru huri nerom ladohogo.”

³⁰Ko a matara mo waga. I Jisas mo gato siaga lawera vena, “Nero mese veve lategi lawe hine beno!”

³¹Nge ingere rom mwalue rom vano, rom laqagi huri Jisas lo vataha na mahoi venue hi.

³²Lo mahogi rom mwalue, ram lai na bao a vui esi lune vonai lobei Jisas.

³³Lune i Jisas mo vuro lue na vui esi hi, a bao mo tauvuigi mo gato. A sinobu ram garigi, ram veve vena, “Igide da he lehi na gineu tea mwere ngaha vohogi lo vanue, Israel!”

³⁴Nge ira Varise ram veve vena, “A ratahigi nora vui esi mo bete na managi lawea ve vin vuro lue na vui esi teri.”

³⁵Siu i Jisas mo dige dali na togagi venue ko a qatui venue doluegi. Ingeie mo huhui lolo nora valei soneana, mo toretore gina Roro Garea huri ve i God mo voragi Ratahigi goro na nona tangaloi, ko mo vagamwasoire ram sege gina lalangai segeana u sao.

³⁶Nge mo lehi na sinobu, mo hagavire, a vevenagi ingere ram romasi ko rahe buluire lai tea sibora, mwere na sibsib hate tangaloi huri vena leo gorora.

³⁷Siu ingeie mo veve lawera nona rorongtagi vena, “A hinaga matue u sao lolo talu, nge a tangaloi tabanagi he sao tea.

³⁸Giniehi, nen tataro lawe na huqegi talo talu huri ve vin horara tangaloi tabanagi sulolo talune.”