Read East Ambae MAK 1 Bible Online

MAK 1 - East Ambae bible

MAK 1

¹Nge ngaha a Roro Garea huri Jisas Kraes, Netui God.

²U teuvuigi mwerehi a tangaloi ligoligogi i Aesaea u uli: “I God mo veve vena, ‘Nge ngaha a noku gaihora, nam horae tomue denigo huri vena vagatai na turegi hurigo.’

³A diloi hine tea hine tea tangaloi mo ware lolo vanue vurogi mo veve vena: ‘Nen vagatai na matahalai Huqe, nen vai na turegi ran vovohoi hurie.’ ”

⁴I Jon u dadari lo vanue vurogi, mo garuhigogonagi na sinobu, ko mo toretore mo veve vena: “Nen tudori den nomiu galegaleasi, ko nen lai na garuhigogona; siu i God vin ladovohogi na bugumiu.”

⁵A tangaloi u sao talo vanue Judia meire vage ta Jerusalem rau vano ram rorongtagi Jon mo laqa ko ram veve sere na bugure, ko i Jon mo garuhigogona ginire lolo wai Jodan.

⁶I Jon mo luqegi na vinui kamel, ko mo wasigi na vinui bulugi; mo gani na diso mena nubui bi talolo labute.

⁷Mo veve lawe na sinobu vena: “Ihine hi vin vanai lo taguku, u lawua denieu. Na he tatarise tea ve nai siolo hivo ko nai taga na garoi nona butu.

⁸Ineu nam garuhigogonagi gimiu gena wai hogosie, nge ingeie vin garuhigogonagi gimiu gina Vui Gogona.”

⁹Lo tagugi i Jisas u vonai den Nasaret lo duvi vanue Kalili, ko i Jon mo garuhigogona-ginie lolo wai Jodan.

¹⁰Ko siserigi lune i Jisas mo mwalue dena wai, mo dada hage eulu mo lehi na dodo mo waga, ko a Vui mo hivo lo ulune mwere na rangamea.

¹¹A dilogi mo himei dena eulu mo veve vena: “Iniko i Netuku, a mweratabe. Ineu nam rongarea ginigo.”

¹²Siserigi a Vui mo vaie mo vano lo vanue vurogi.

¹³U toga lo vanue vurogi a rani ngavulu gaivesi. I Satan mo kalie lehie, ko ingeie u toga meire kakarue turu, ko ira engsel ram vanai ram buluie.

¹⁴Lo tagugi hi rau teu Jon lolo valei vauveu, i Jisas mo vano lo vanue Kalili, ko mo toretoregi na Roro Garea hi mo vonai den God,

¹⁵mo veve vena: “A tarogi vovohoi u mo vonai, ko a mwasoana garaqa hi i God mo ratahigi lolona mo kakarani! Nen tudori dena nomiu galegaleasi, ko nen ladohogo gina Roro Garea!”

¹⁶I Jisas mo vano lo mwararai Wei ta Kalili, ko mo lehi na tangaloi loli ige gairue, Saemon tona tuana Andru rom tuli nora gabe lolo wai.

¹⁷I Jisas mo veve lawera vena: “Nero hurieu ko ineu nai huhui gimiru neri loli na tangaloi.”

¹⁸Siserigi rom siregi na nora gabe rom hurie.

¹⁹Ingeie mo dige qilodo vano mo lehi netui Sebedi gairue, Jemis tona tuana Jon rom vai vurugegi na nora gabe lolo aka.

²⁰I Jisas mo lehire, mo warera siserigi; rom maraga dei tamara Sebedi mo toga lolo aka mena nora tangaloi tabanagi, rom huri Jisas.

²¹I Jisas meire nona rorongtagi ram vanai a Kabeniam. Lo Rani mangaana i Jisas mo ahu lolo valei soneana, mo tauvuigi mo huhuire.

²²A sinobu ram rongoe ram awogi hurie, huri nge mo huhuire gena managi, nge hatie mwere nora huhui talo Leo Hora noi Mosis.

²³A tangaloi gatagale mo vanai mo ahu vano lolo valei soneana a vui esi lune. Nge mo ulo, mo veve vena:

²⁴“?Gom tarani na havagineu mei gamai Jisas ta Nasaret? ?Sige iniko gom vonai ve gon vai vohogi gamai? Nau ilogo, iniko a gai hora gogona noi God!”

²⁵I Jisas mo gato goro na vui esi hi mo veve vena, “Toga rorongo, gon mwalue denie!”

²⁶A tangaloi hi a vui esi u veie mo rurururu gi, ko mo ulo gena dilogi u lawua, mo mwalue denie.

²⁷Ira sinobu ram garigi garagara huri, ko ram vuihuiginire, ram veve vena, “?Hava gineu ngaha? ?A lengai huhui garaqa? Mo gato goro na vui esi ko ram rong tabea!”

²⁸Ko a roroi Jisas mo vano vataha vanue doluegi a Kalili.

²⁹I Jisas meire nona rorongtagi ram siregi na valei soneana, ram vano tuturedu huri na valei Saemon tona Andru; Jemis tona Jon rom hurire vage.

³⁰Tubui qeligei Saemon mo mahagi mo eno lolo vale, ko lo taro ram lehi Jisas ram veve sere lawea hurie.

³¹I Jisas mo ahu vano lobena, mo hako lo limana, mo hau ragasie, ko a mahagite hi mo rovo denie. Siu mo maraga, mo vai rarai na gara hinaga.

³²Mo revirevi, lo tagui matenaho roro, a sinobu ram lai na tangaloi segesege meire hi a vui esi lure lawe Jisas.

³³A tangaloi doluegi lolo togagi venue rau vonai ram labe lo matai vale.

³⁴Ko i Jisas mo vagamwasoi na sinobu u sao dena lalangai segeana, ko mo livu vohogi na vui esi u sao denire. He siregi na vui esi tea ve ran laqa, a vevenagi rau iloe beno.

³⁵Lolo robongi siaga, mo leleo duruduru, Jisas mo maraga mwalue dena vale, mo vano lo mahoi ute, ko mo tataro.

³⁶Nge i Saemon meire buluine ram vano ve ran hikesie.

³⁷Lune ram haqea, ram veve vena, “A sinobu doluegi ram hikesigo.”

³⁸Nge i Jisas mo duvi mo veve lawera vena, “Igide da vano lo togagi venue ram toga dali bulu ve nan toretore lawera vage; a vevenagi nau vonai huri na gineu ngehi.”

³⁹Ko nge mo vano vataha vanue a Kalili, mo toretore lolo valei soneana, ko mo vuro lue na vui esi.

⁴⁰A tangaloi a vohavono mo vonai lobei Jisas mo veve vena, “Tare ve gom tarani, goin vei leieu ve nan mwasara.”

⁴¹I Jisas u horo gina hahagavi, mo vugeri na limana, mo tango vano lune, mo veve vena, “Nam tarani, gon mwasara!”

⁴²Ko siserigi a vohavono hi mo rovo denie, ko mo mwasara.

⁴³Ko i Jisas mo gato siaga lawea, mo hora vena vano, mo veve vena,

⁴⁴“Gon rongo, go mese veve lategi lawe hine tea beno, nge gon vano tuturedu lobena rugurugu huri ingeie vin lehigo tomue. Ko gon bete nom hogogi mwere a Leo Hora noi Mosis u veve, a gigilegi lawera ve gu mwasara.”

⁴⁵Nge a tangaloi hi mo vano mo tauvuigi mo laqagi lategi hurie vataha vanue. A vevenagi hi i Jisas he vano lai tea lo vanue lo ute lawua, nge mo toga gahea lo mahoi venue, ko a tangaloi u sao ram vonai lobena den vataha vanue.