Read East Ambae MAK 10 Bible Online

MAK 10 - East Ambae bible

MAK 10

¹Siu i Jisas mo siregi na vanue hi, ko mo vano lolo loloi venue ta Judia, ko lo tavalui wai Jodan. A sinobu ram vanai ram sone dalie taligu, ko nge mo huhuire mwere hi mo vai gesegi.

²Ira Varise lavasigi ram vonai lobena, ram vai lehe ram huie, ram veve vena, “U wa a Leo Hora mo siregi huri ve a tangaloi vin vilewahe den gahorana?”

³I Jisas mo duvi gorora mo veve vena, “?Hava Leo Hora hi i Mosis u bete lawe gimiu?”

⁴Ingere ram duvi goroe ram veve vena, “I Mosis u hora ve a tangaloi vin reve na revereve huri na togaana vilewahe, ko vin hora vohogi gahorana.”

⁵Nge i Jisas mo veve lawera vena, “I Mosis u reve na Leo Hora hi lawe gimiu a vevenagi a qatumiu rau siaga.

⁶Nge lo tauvuigi, lune God u teu na ure, u reve vena, ‘I God u teu na mwera ko a vavine.

⁷Giniehi, a tangaloi vin siregi tamana ko i retahine, ko mo bulu mei gahorana,

⁸ko ingere gairue roin voragi betugi gatagale.’ A vevenagi rohe gairue tea taligu, nge a betugi gatagale.

⁹Giniehi, irahine God u vilebubuginire, a tangaloi vin he vilewahe laire tea.”

¹⁰Lune ram vano taligu lolo vale, ira nona rorongtagi ram hui Jisas huri na gineu ngaha.

¹¹Nge mo veve lawera vena, “Tare ve a mwera mo hora vohogi gahorana ko mo lagi mena vavine wagineu, nge mo galegaleasi goro horana;

¹²mwerehi vage, tare ve a vavine mo vilewahe den tamai netune ko mo lagi mena mwera wagineu, nge mo galegaleasi goro tamai netune.”

¹³A tangaloi lavasigi ram lai na maresu lawe Jisas vena tangolure, nge ira rorongtagi ram tara gorora.

¹⁴I Jisas mo leo, mo lolobute huri, ko mo veve lawera vena, “Nen siregi nire maresu ve ran vonai lobeku, ko nen mese vai gorora, huri a ute hi i God mo ratahigi lolona a nora sinobu hi rau mwere na maresu ingere ngaha.

¹⁵A hogo nam veve lawe gimiu vena, tare vi ihine he mwere na maresu biti tea vin he ahu lai tea vohogi lolo mwasoana garaqa hi i God mo ratahigi lolona.”

¹⁶Tau nge mo ragovi na maresu, mo tangovire, mo vaigareaginire.

¹⁷Lune i Jisas mo dige taligu lo turegi, a tangaloi mo toa hurie, mo sisiqeu goroe, mo huie, mo veve vena, “?Huhui garea, nain vei mwerehilogo huri ve nain lei na mwasoana radu?”

¹⁸I Jisas mo veve lawea vena, “?Huri hava gineu gom wareau ve nau garea? Ihine tea he garea tea, nge i God hogosie.

¹⁹Gu ilo na Leo hora: ‘Goin mese ue tangaloi; goin mese vagasile lo vavine; goin mese balubelu; goin mese tawei vurogi; goin mese kalikeli; gon lado mavagi tamamu ko iratahimu.’ ”

²⁰Nge mo duvi lawea mo vena, “Huhui, nau tabe na Leo hora ingere ngaha doluegi lo mahogi nau mwalakelo mo dadari hi bagataha.

²¹Ko i Jisas mo lehe gina domi tabetabe, mo veve lawea vena, “A gineu gatagale mo eno gohe vaie tea mosigei. Goin vano gon sogagi vohogi na nomu lalaie teri, gon bete na manegi lawera mahogi, ko goin haqe na nomu lalaie lo eulu; siu gon vanai, goin hurieu.”

²²Lune nge mo rongo na leo ngaha, a nagona mo hivo, ko mo mule gina hahagavi, huri a nona lalaie u sao.

²³I Jisas mo leo dalibulu gi na nona rorongtagi, mo veve lawera vena, “Ei, u gona garagara hurire tagi hako gineu ve rain ehu lolo mwasoana garaqa i God mo ratahigi lolona.”

²⁴Ko ira rorongtagi ram awogi huri na nona leo, nge i Jisas mo veve taligu vena, “Ira netuku, u gona garagara huri ve ihine tea vin ehu lolo mwasoana garaqa God mo ratahigi lolona.

²⁵U mwatamwasara huri ve a bulugi vin ehu turu na matai nitil dena tagi hako gineu ve vin ehu lolo mwasoana garaqa hi i God mo ratahigi lolona.”

²⁶Nge ira rorongtagi ram garigi garagara, ram vui hui, huiginire gagatalegi vena, “?Nge siu ihine vin mwaso lai?

²⁷I Jisas mo leo vano lure, mo veve vena, “A sinobu ran he vailei na gineu hi tea, nge i God u veilei. I God u veilei na gineu doluegi.”

²⁸Siu i Bita mo laqa lawe Jisas vena, “Leo, gamai gau siregi na nomai lalaie doluegi ko gam hurigo.”

²⁹I Jisas mo veve vena, “A hogo, nam veve lawe gimiu ve, ihine tea vin siregi na valena sige ire tuana, sige ire haqena, sige i retahine, sige tamana, ko ire netune, sige a talune a vevenagi ineu ko a Roro Garea,

³⁰Ingeie vin lei vin liu lolo taro ngaha, vin lei na togagi venue vin liu den vudolue, ko ire tuana ko ire haqena ko ire retahine ko ire netune a talune, ko mena vai gagarasigo vage, ko lolo ure vin vonai nge vin lei na mwasoana radu.

³¹Nge ingere rau sao hi ram tomue rain tu tagu, ko ingere ram tu tagu rain tomue.”

³²Lune i Jisas meire nona rorongtagi ram huri na turegi mo hage Jerusalem. I Jisas mo vano tomue denire ko a nona rorongtagi ram garigi garagara; ko a sinobu ram vutugegi esi, irahine ram huri lo tagune ram matagu. Taligu i Jisas mo lai beraginire hangavulu domwagi gairue, mo tauvuigi mo laqagi lawera huri na gineu ve rain vei lawea.

³³I Jisas mo veve vena, “Leo, dam hage Jerusalem, ko rain lei i Netui Tangaloi lawera muei rugurugu ko ira huhui talo Leo Hora noi Mosis. Rain vevegi vagamatea ko rain sireginie lawera haroharo.

³⁴Ko ingere rain sovue, rain lodosie, rain telie ko rain vei vagamatea. Ko lo bongi gaitoligi nge vin maraga taligu.”

³⁵Siu i Jemis ko i Jon, ira netui Sebedi, rom vanai lobei Jisas, rom veve vena, “Huhui, gamaru goro mo tarani huri ve gon vai lawe gamaru a hava gineu gori nevu denigo.”

³⁶I Jisas mo huire vena, “Nerum tarani ve nain vei na hava gineu lawe gimiru?”

³⁷Rom duvi lawea vena, “Lune goin toga lo nomu tanoi togatoga ratahigi lolo ute roroa hi gom ratahigi lolona, gon siregi ve gori toga gatagale lo matuemu ko tuegi lo mawirimu.”

³⁸I Jisas mo veve lawera vena, “Nero he ilo tea huri na hava gineu nerum navu denieu. ?Wa neri inu lei lolo laha ineu nain inu lolona? ?Sige neri leilei na garuhigogona vin garuhigogonagieu ginie?”

³⁹Ngere rom duvi lawea vena, “Gori vei lei.” I Jisas mo veve lawera vena, “A hogo, gimiru neri inu laha hi ineu nain inue, ko neri lei na garuhigogona hi vin garuhigogonagieu ginie.

⁴⁰Nge hatie noku ve nain leowahe ve ihine vin toga lo matueku sige lo mawiriku, nge God hogosie ve vin bete lawe rahine hi u vei vagatai hurire.”

⁴¹Lune ira rorongtagi hangavulu ram rong huri na gineu ngaha, ram tauvuigi ram lologagasigi Jemis ko i Jon.

⁴²Siu i Jisas mo warera vonai lobena, mo veve lawera vena, “Igimiu neu ilo huri ve a sinobu ingere hi hatie duvi Israel a nora tomtomuegi lure. Igimiu neu ilo ve a tomtomuegi ngerehi ram rongarea huri ram haharagi na nora huireana lo ului nora sinobu, ko ira tomtomuegi lalawua ram vosangi ve ingere ram hakovi na huireana doluegi.

⁴³Nge ngaha vin he mwerehi tea mei gimiu. Nge ihine tea mei gimiu mo tarani ve vin lawua, nge vin voragi na nomiu tangaloi lalakogi;

⁴⁴ko ihine tea mei gimiu mo tarani ve vin tomue, nge vin voragi na tangaloi tabanagi lawe gimiu doluegi.

⁴⁵Huri i Netui Tangaloi sibona he vonai tea ve rain tabana lawea, nge ve vin tabana ko vin siregi na mwasoana gi gaivolire tangaloi saosao.”

⁴⁶Ingere ram vonai Jeriko. Lune i Jisas mo siregi na vanue hi meire nona rorongtagi ko a sinobu lawua, a tangaloi matadodo, Batimeas, netui Timeas, mo toga lo mwararai turegi mo navunevu.

⁴⁷Lune nge mo rongo ve i Jisas ta Nasaret, nge mo tauvuigi mo ulo vena, “Jisas, Netui Devet, gon hagavieu!”

⁴⁸A sinobu u sao ram gato goroe vena toga rorongo. Nge mo ulo siaga den tomue vena, “Netui Devet, gon hagavieu!”

⁴⁹I Jisas mo labe, mo veve vena, “Nen warea.” Siu ram ware na matadodo hi ram veve lawea vena, “Gon mese romasi! Maraga, nge mo warego.”

⁵⁰Ko inge mo tuli vohogi na luqana, mo maraga siseri, mo vonai lobei Jisas.

⁵¹I Jisas mo huie vena, “Gom taranieu ve nain vei na hava gineu lawego?” A matadodo hi mo duvi vena, “Huhui, nam tarani ve nain leo taligu.”

⁵²I Jisas mo veve lawea vena, “Gon vano, nomu ladohogo mo vagamwasoigo.” Ko siserigi nge mo leo taligu, ko mo huri Jisas lo turegi.