Read East Ambae MAK 13 Bible Online

MAK 13 - East Ambae bible

MAK 13

¹Lune i Jisas mo siregi na Sara Gogona, gatagale denire nona rorongtagi mo veve lawea vena, “!Huhui, leo! Hava na vatu gagareagi ingere ngaha hava na vale gagareagi ingere ngaha”

²Nge i Jisas mo duvi lawea vena, “?Gom lehi na vale lalawua ingere ngaha? A vatu gatagale vin he toga tea loului vetu tuegi, nge rai sasarugi talo tano doluegi.”

³I Jisas mo toga lo Vusi Oliv mo leo vano lo Sara Gogona, ko i Bita, Jemis, Jon ko i Andru ram huie gahea vena,

⁴“?Iniko gon veve lawe gamai ve a gineu ngaha vin vei tangaha? Ko gon veve lawe gamai a hava gigilegi vin vei vena haharagi ve a taro u vanai beno ve a gineu ingere ngaha rain vei lolona.”

⁵I Jisas mo tauvuigi mo veve lawera vena, “Nen leohuri gimiu vaiteu ihine tea mo vaga lengagi gimiu.

⁶A tangaloi u sao rain vonai lo henaku, rain veve vena, ‘!Ineu hi!’ ko rain sine na sinohu sao.

⁷Nge lune gimiu nein rongo huri na vuro ko a roroi vuro vagahao nein matagu. Huri a gineu ingere ngaha rain vei, nge a rovonagi hatie tau.

⁸Huri a sinobu vin qalo mena sinobu, ko a vanue mena vanue. A ruru vin vonai lo vanue saosao, ko vin maro. A gineu ingere ngaha a gagarasigi mwere hi a maresu mo ragasi retahine vena bavae.

⁹“Igimiu nen leohuri gimiu sibomiu. Ngere rain lei gimiu siu lo kot. Rain teli gimiu lolo valei soneana. Nein labe lo nagora Kavman meire ratahigi hurieu, huri nen ngasagi na Roro Garea lawera.

¹⁰Nge gitomuegi siu a Rani vagasigi vin vanai ne ngasagi na Roro Garea lawera sinobu doluegi.

¹¹Ko lune vin waregi sere lawe na sinobu doluegi. Ingere rain wiribibi gimiu, rain lei gimiu sulo kot; nge nen laqagi na hava gineu vin bete lawe gimiu lo tarogi ngehi. Huri nehe laqa tea gina leomiu sibomiu, nge gina leo mo vonai dena Vui Gogona.

¹²A tangaloi rain siregi tuara huri ve rain ue vagamatera, ko a tamagi vin vei mwerehi vage lawe renetune; ko ire neture rain maraga goro tamara mei retahire ko rain sireginire huri ve rain ue vagamatera.

¹³A tangaloi doluegi rain sebugi gimiu huri na henaku. Nge ihine tea vin labe siaga vin dadari lo qereqerenagi vin mwaso.

¹⁴“Gimiu nein lehi na Gineu makaragiana lawua’ mo labe lo ute hi ve vin he labe tea aie.” (!Igimiu hi nem valu huri na gineu ngaha nein ilo vurugegi na iloilogi!) “Lo tarogi hi, ingere ram toga Judia rain toa sulo vusi.

¹⁵Ihine tea mo toga loului valena, vin mese susuni na taro vena hivo lolo valena vena lai te gineu ve vin dige meie.

¹⁶Ihine mo tino lolo talu, vin he mule tea lo valena vena lai na luqana.

¹⁷Nge u esi garagara hurire vavine ram wali taqangi ko hurire vavine i reneture ram memeaga.

¹⁸!Nen tataro ve a gineu ingere ngaha rain mese vai lolo rara!

¹⁹A vevenagi a rani ingere hi rain horo gina gineu rau esi, hatie gineu mwere hi mosigei lo tauvuigi lune i God u teu na ure mo dadari hibagataha, ko vin he mwere hi tea taligu tetagaha.

²⁰Nge a Huqe mo wiri utu na rani ingere ngaha; ve na mese vaie mwere hi, A tangaloi gatagale vin he mwaso lai tea. Nge i God u vei na taro mo qilodo huri vena bului na sinobu u leo wahera.

²¹“Lo tarogi hi, tare ve ihine vin veve lawe gimiu vena, “Leo, i Kraes nge ngaha!’ sige a tangaloi tuegi vin veve vena, ‘Leo, i Kraes ngehi!’ nein he ladohogo te ginie.

²²Huri ira Kraes kalikeli ko ira tangaloi ligoligogi kalikeli rain maraga. Rain vei na vaigivui saosao ko rain vei na gineu garigiana lalawua. Ingere rain veileo ve ran kali lehi na sinobu hi i God u leowahera tare ve mo lai.

²³!Igimiu nen leohuri! Ineu nau veve matagutegi lawe gimiu huri na gineu doluegi ingere ngaha siu ram bei vei.

²⁴“?Nge lolo ranigi ingere ngaha lo tagui gineu esi rau vanai, a aho vin dodo ko a vule vin he leleo tea,

²⁵ko a visiu rain soi dena eulu, ko a huireana talo mahava rain gilu lategi den tanora.

²⁶Ko lo tarogi ngehi rain lehi i Netui Tangaloi vin vonai lolo dodo mena managi ko a varavara lawua.

²⁷Siu nge vin hora ira engsel, ko ve rain vilegi na nona sinobu leowahe dena mahiqei ure doluegi, ko dena mahogi doluegi lo eulu

²⁸“Nen hikehike lo gato tavalu huri na vui duledule. Lune a rangana ram tauvuigi ram qaroqaroga, ko mo tavutevu, nem ilo ve a mwagoto mo kakarani.

²⁹Mwere hi vage, lune nem lehi na gineu ingere ngaha ram vonai, nein ilo ve a tarogi mo kakarani mo rarai vena vanai.

³⁰A hogo, nam veve lawe gimiu vena, a tangaloi ram mwaso siseri ngaha rain he mate tea doluegi vin dadari a gineu doluegi ngaha rain vanai.

³¹A eulu ko a tano ngaha roin salasala, nge a noku leo vin he sala lai tea.

³²“Ihine tea he ilo na ranigi tea sige a tarogi ve vin vei, ira engsel ta eulu hatie, i Netui hatie, nge i Mama hogosie.

³³Nen radagoro gimiu, nen rada nen rarai, huri nehe ilo na tarogi tea ve vin vanai.

³⁴Mwere na tangaloi mo vano den tanona, mo siregi na valena lawera nona tangaloi tabanagi, mo bete na nora tabanagi vatavataha ginire; ko mo veve lawe na leogoroi mataivale vena vin rada goroe.

³⁵Gimiu vage nein rada goro, huri ne he ilo tea ve i tagi vale vin vonai tagaha, lolo revirevi, sige lolo livugata, sige lolo toa tarere, sige lolo ului reni,

³⁶Vaiteu mo vanai siserigi ko vin haqe gimiu nem maturu.

³⁷Nge a hava gineu nam veve lawe gimiu, nam veve lawe na tangaloi doluegi: Nen rada goro!”