Read East Ambae MAK 14 Bible Online

MAK 14 - East Ambae bible

MAK 14

¹A rani garue goro tomue siu a Hinagai Halegagaliu ko a bereti siaga mo vai. Ira muei rugurugu meire huhui talo Leo hora noi Mosis ram vai leo ve ran haqe na matahala ve ran wiribibi hiligi Jisas ko ran vai vagamatea.

²Nge ingere ram veve vena, “Igide dain mese vaie lo taroi gaganie vaiteu a sinobu ram vai na vuro.

³I Jisas mo toga Betani lo valei Saemon a vohavono mo eno lune: lune i Jisas mo gagani aiehi, a vavine mo ahu vonai mena vurei bonbon lolo vurugi vatu, a gaivoligi u lawua garagara. Nge mo dange na sosoi vurugi, ko mo lingi na vurei bonbon hi loului qatune.

⁴Nge a tangaloi lavasigi aie ram lologagasi ram veve veveginire vena, “?Huri hava gineu mo linglingi vurogi na vurei bonbon ngaha?

⁵Vin sogagi leie huri na mane silva a mavanagi u liu den gineu teri vagatolu, ko vin bete lai na homu lawera mahogi.” Ko ram butu gina vavine hi.

⁶Nge i Jisas mo veve vena, “Nen sireginie! ?Huri hava gineu nem vai tatureginie? Nge u vei na gineu garea garagara laweau.

⁷Huri ira mahogi ram toga gesegi mei gimiu, ko nein bului laire lo tarogi haro mwere hi nem tarani. Nge ineu nain he toga tea gesegi mei gimiu.

⁸A vavine u veilei na hava gineu ve ingeie vin veie: Huri u vurei na betuku gitomue mo vai rarai huri rain tulegi.

⁹A hogo, nam veve lawe gimiu vena, logologo lune vin waregisere na Roro Garea lolo ure doluegi, vin laqagi huri na gineu a vavine hi u veie huri ve a sinobu rain ladohaqea lune.”

¹⁰Siu Judas Iskariot, gatagale denire domwagi gairue hi, mo vano lobera muei rugurugu vena lai Jisas talo limara.

¹¹Lune ram rong na leona, ram havuhevu hurie, ko ram varatau ve rain bete na homu lawea. Siu i Judas mo hikesi na mahogi u garea vin bete Jisas lawera vano.

¹²Ko lo muei bongi gaganie huri na bereti siaga, ko ram wehi na natui sibsib huri na Hinagai Halegagaliu lolona, ira rorongtagi noi Jisas ram veve lawea vena, “?Gom tarani ve gain vano logo ve gain vei vagatai na gamu Halegagaliu?”

¹³Siu i Jisas mo hora na nona rorongtagi gairue, mo veve lawera vena, “Neri vano lo togagi venue, ko neri haqe na tangaloi mo wali na vurugi wei. Neri hurie,

¹⁴ko vin ehu lolo hava vale, neri veve lawe na tagi vale hi vena, ‘A Huhui mo veve vena, ?A mahoi vale nge hilogo, ineu meire noku rorongtagi gain geni na Hinagai Halegagaliu aie?’

¹⁵Ko nge vin haharagi na mahoi vale lawua namawe lawe gimiru, u vei vagatai na tanoi gaganie aie beno. Neri vei vagatai huri gide aie.”

¹⁶A rorongtagi rom vano, rom ahu lolo togagi venue, rom bei haqe na gineu doluegi mwere i Jisas u veve lawera; ko rom vai vagatai na Hinagai Halegagaliu aie.

¹⁷Lolo revirevi i Jisas mo vonai meire rorongtagi hangavulu domwagi gairue.

¹⁸Lune ram toga ram gagani, i Jisas mo veve vena, “A hogo, nam veve lawe gimiu vena, gatagale den gimiu vin rongo na leoi geku, ingeie hi mo gagani meieu.”

¹⁹Ira rorongtagi ram tauvuigi ram romasi ko a mabure mo duleasi, ram huihui gagataleginie vena, “Sige ineu?”

²⁰I Jisas mo duvi lawera vena, “Nge gatagale den gimiu ira hangavulu domwagi gairue, gatagale hi mo diri na bereti meieu lolo disi.

²¹Huri i Netui Tangaloi vin mate, mwere u reve lolo Revereve gogona hurie; nge hahagavi huri na tangaloi hi mo siregi i Netui Tangaloi! U garea lawe na tangaloi hi huri ve he vora tea vohogi!”

²²Lune ingere ram gagani, i Jisas mo lai na bereti, mo tataro vevegarea goroe, mo vise vurivurie, mo bete lawera, mo veve vena, “Nen laie, hingaha a betuku.”

²³Siu nge mo lai na laha, mo vevegareagi God, mo bete lawera, ko ingere doluegi ram inu denie.

²⁴I Jisas mo veve vena, “Nge ngaha a daiku, mo hale huri na tangaloi doluegi, vena vai siagagi na varatau noi God.

²⁵A hogo, nam veve lawe gimiu vena, ineu nain he inu na waen ngaha tea taligu, vin dadari a bongi ngehi nain inu na waen garaqa lolo mwasoana garaqa God mo ratahigi lolona.”

²⁶Siu ingere ram huri na ahi, ram mwalue ram vano sulo Vusi Oliv.

²⁷Ko i Jisas mo veve lawera vena, “Igimiu doluegi nein toa vohogi ko nein siregieu nain tino gaheau, mwere u reve tau lo Reve reve Gogona vena: ‘Ineu nain wehi na leogoro i sibsib ko a sibsib rain vano tereteregi.’

²⁸Nge lune nain maraga taligu dena mateana, nain vano gitomuegi gimiu a Kalili.”

²⁹Nge i Bita mo duvi vena, “Ineu nain he dige tea vohogi denigo, hatie huri ve ingere doluegi ram dige!”

³⁰Ko i Jisas mo veve lawea vena, “A hogo, nam veve lawego vena, gaqarigi lolo bongi ngaha, a toa vin he tarere te tau vagarue, nge iniko goin tahau vagatolu.”

³¹I Bita mo duvi siagagi den tomue vena, “Ineu nain he veve tea vohogi ve nau horago, nge hatie huri tare ve nain mate meigo?” Ko ingere doluegi ram veve mwere hi teu.

³²Ko ingere ram vonai lolo ute mo waregi ve Ketsemeni, ko i Jisas mo veve lawera nona rorongtagi vena, “Nen toga tangaha, lune ineu nain tataro.”

³³Nge mo lai Bita, Jemis ko i Jon meie. Nge mo tauvuigi mo vonosie gina hahagavi ko a rongesi,

³⁴ko mo veve lawera vena, “A tamateku mo kuieu tau hivo mo kakarani ve nain mate ginie. Gimiu gaitolu nen toga tangaha, nen rada goro.”

³⁵Nge mo dige beragi, mo soi hivo lo tano ko mo tataro huri ve vin lei vohogi na taroi rongogagarasi denie, tare mo lai.

³⁶Ne mo veve vena, “Aba, Mama! Iniko gu veilei na gineu doluegi. Gon lai vohogi na laha ngaha denieu. Nge hatie noku tarani, nge a nomu tarani na lai.”

³⁷Siu nge mo tudori, mo haqera ram maturu, ko mo veve lawe Bita vena, “?Saemon, gom maturu? ?Goin he rada goro lai tea huri na aho gatagale?

³⁸Nen rada goro, nen tataro, vate vai nem soi lolo kalikeli. A tamategi mo tarani, nge a vihigogi mo wiriwiri.”

³⁹Ko nge mo vano, mo tataro taligu ko mo veve na leo ngerehi teu mwere hi.

⁴⁰Siu nge mo tudori taligu lobera rorongtagi, mo haqera ram maturu, huri a matara mo huegi. Ko rahe ilo tea ve rain veve mwerehilgo lawea.

⁴¹Siu nge mo vonai vagatoligi mo veve lawera vena, “?Wa ne maturu tau ko nem manga mangasurigi mosigei? U tatarise beno! A tarogi mo vonai! Leo, i Netui Tangaloi vi sireginie vano lo limara galegaleasi.

⁴²!Nen maraga da vano. Leo, a tangaloi hi u rongo na leoi gaku mo kakarani!”

⁴³Lune i Jisas mo laqa tau mosigei, i Judas, gatagale denire hangavulu domwagi gairue, mo dadari mena sinobu, ram hako bue ko a ruqi, ram vonai denire muei rugurugu meire huhui talo Leo Hora noi Mosis ko ire tamaragai.

⁴⁴A tangaloi hi u rongo na leoi gana u bete na gigilegi lawera sinobu, mo veve vena, “A tangaloi nain sungunie, ingeie hi nen taranie. Nen wiri bibie, nem leogoro, ko nem laie vohoginie.”

⁴⁵Lune ram dadari, i Judas mo vano tuturedu lobei Jisas, mo veve vena, “!Huhui!” ko mo sungunie.

⁴⁶Siu a sinobu ram hagalaie, ko ram wiri bibi siagaginie.

⁴⁷Nge gatagale denire ram labe kakarani mo dange na nona bue, mo tai vano lo tangaloi tabanagi noi rugurugu lawua, ko mo tai sue na qerona.

⁴⁸Ko i Jisas mo duvi lawera vena, “?Gimiu nem vonai mena bue ko a ruqi ve nein wiri bibieu, mwere huri ve ineu i uebalu?

⁴⁹Vataha bongi nau toga mei gimiu lo Sara Gogona, nau huhui, nge nehe wiri bibieu tea. Nge mo vai mwere ngaha ve a Reve reve Gogona vin eno lune.

⁵⁰Siu ira nona rorongtagi doluegi ram sireginie, ram toa vohogi.

⁵¹A mwalakelo gatagale, u gagavugi na luqe hogosie, mo huri Jisas. Ram vai leo ve ran wiri bibie.

⁵²Nge inge mo siregi vohogi na luqana, mo toa mwasigi vurogi.

⁵³Siu ingere ram lai Jisas ram vano meie sulo valei rugurugu lawua, ko ingere doluegi, ira muei rugurugu ko ira tamaragai ko ira huhui talo Leo Hora noi Mosis, ram sonebubugi aie.

⁵⁴I Bita mo huri atagu mala vagahao denire ko mo ahu lolo ara noi rugurugu lawua, ko nge mo toga hivo meire tangaloi tabanagi, mo madinugi na avi.

⁵⁵Ira muei rugurugu ko ira Kansel doluegi ram hikesi na vai vagasile noi Jisas huri ve rain vei vagamatea, nge rahe haqea tea.

⁵⁶Huri ingere rau sao ram tawei Jisas, nge a nora leo he toga te gatagale.

⁵⁷Siu a tangaloi lavasigi ram maraga, ram labe ram veve leo kalikeli vovohoi Jisas vena:

⁵⁸“Igamai gau rongoe u veve vena, ‘Nain tala vohogi na vale gogona ngaha a tanoi limei tangaloi, ko lo rani gaitolu nain vutue wagineu, ngehi hatie tanoi limei tangaloi.’ ”

⁵⁹Nge ingere vage a nora leo he toga te gatagale.

⁶⁰I rugurugu lawua mo maraga lo livugara, mo hui Jisas vena, “?Go he duvi tea? ?A hava gineu ingere ram veve vovohoigo ginie?”

⁶¹Nge i Jisas mo toga rorongo, he duvi goro tea. I rugurugu lawua mo huie taligu vena: “?Iniko ngaha i Kraes, i Netui God hava na gineu garea?”

⁶²I Jisas mo duvi vena, “Io, hogo, ko nein lehi i Netui Tangaloi vin toga lo matuei Gineu managi, vin vonai mena dodo lo eulu.”

⁶³I rugurugu lawua mo dare na luqana, mo veve vena, “Dahe tarani tea ve ihine tea vin laqa taligu.

⁶⁴Neu rongo na nona leo asi vovohoi God. ?Nem lado wuraha?” Ngere doluegi ram tau bubugi na nora leo vevegi huri ve u tatarise ve vin mate.

⁶⁵Siu lavasigi ram tauvuigi ram lodosi Jisas, ram vivi goro na matana, ram tutugie, ram veve lawea vena, “Gon tige ve ihine hi mo tutugigo!” Ko ira tangaloi tabanagi ram laie, ram rabae.

⁶⁶Lune i Bita nge tau vuine lolo ara, gatagale denire taqalugu a tangaloi tabanagi noi rugurugu lawua mo vonai.

⁶⁷Lune mo lehi Bita mo madinu, mo leo garagaraginie, mo veve vena, “Iniko vage me i Jisas ta Nasaret.”

⁶⁸Nge i Bita mo tahae, mo veve vena, “Nahe iloe tea, he matamwasara tea laweau huri ve gom laqagi na havagineu?” Siu nge mo mwalue mo vano lo matai ara; ko a toa mo tarere.

⁶⁹A taqalugu mo lehe, mo tauvuigi mo veve taligu lawera ram labe kakarani vena, “Ingeie hi gatagale meire!”

⁷⁰Nge i Bita mo tahae taligu. He ribi tea ingere ram labe kakarani ram veve lawe Bita vena, “A hogo, iniko gatagale meire, a vevenagi iniko vage ta Kalili.”

⁷¹Siu i Bita mo tauvuigi mo haharigi, mo veve vena, “Nahe ilo na tangaloi hi tea nem vevea.”

⁷²Ko siserigi a toa mo tarere vagatuegi, ko i Bita mo lado haqe na leoi Jisas u veve tau lawea vena, “A toa vin he tarere te tau vagarue, nge iniko goin tahau vagatolu.” Ko ingeie mo soi tavuine mo ngara.