Read East Ambae MAK 15 Bible Online

MAK 15 - East Ambae bible

MAK 15

¹Lolo robongi siaga ira muei rugurugu meire tamaragai ko ira huhui talo Leo Hora noi Mosis ko ira Kansel doluegi ram vai rarai na nora domvagatai! Ram vauhi Jisas, ram vano meie, ram laie lawe Baelat.

²I Baelat mo huie vena, “?Iniko i ratahigi nora ta Judia?” I Jisas mo duvi lawea vena, “Iniko gom vevea mwerehi.”

³Ko ira muei rugurugu ram veve asiesigi Jisas lo gineu u sao.

⁴Siu i Baelat mo huie taligu vena: “?Wa ve he goin duvi goro na gineu ingere ngaha? Leo, ram veve gineu rau esi vovohoigo huri na gineu u sao!”

⁵Nge i Jisas he duvi goro te vohogi, ko i Baelat mo awogi huri.

⁶Lo vataha taroi Hinagai Halegagaliu i Baelat mo siregi na tangaloi toga vau gatagale lawera sinobu mwere ram navu huri.

⁷Lo taro hi a tangaloi gatagale, a henana Barabas, mo toga vau meire sinobu rau qalo mei Kavman ko rau ue vagamate tangaloi lolo vuigarogi.

⁸A sinobu ram sonebubugi, ram tauvuigi ram navuhi Baelat ve vin vei lawera mwere hi mo vai lawera gesegi.

⁹Baelat mo huire vena, “?Wa nem tarani ve nain siregi tabetabegi na ratahigi nora ta Judia lawe gimiu?”

¹⁰Huri nge u ilo vurugegi ve ira muei rugurugu rau lei Jisas lawea a vevenagi mo garasire ginie.

¹¹Nge ira muei rugurugu ram dori na domire sinobu ve rain navuhi Baelat ve vin siregi Barabas lawera leahi Jisas.

¹²Siu i Baelat mo huire taligu vena, “?Nge nem tarani ve nain vei na hava gineu lawe na tangaloi hi nem warea ve i ratahigi nora ta Judia?”

¹³Nge ingere ram ulo vena, “Toto vehavehaginie!”

¹⁴Nge i Baelat mo huire vena, “?Huri hava gineu, u vei na hava gineu esi?” Ngere ram ulo siaga den tomue vena, “Toto vehavehaginie!”

¹⁵I Baelat mo tarani vena vai surigi na domire sinobu, siu nge mo siregi Barabas lawera, ko mo lai Jisas ve ran talie huri ve rain toto vehavehaginie.

¹⁶Ira soldia ram vano mei Jisas lolo ara mo waregi vena Braitorium, huri ve a valei Kavman, ko ram ware bubugi na buri soldia doluegi.

¹⁷Ram saru goro Jisas gina luqe memea dodoga huri ve a luqara ratahigi, ko ram virigi na garo kau mo voragi na qatulibo, ko ram tarie lo qatune.

¹⁸Siu ram tauvuigi ram waregareaginie vena, “Io, garea, i ratahigi nora ta Juda!”

¹⁹Ko ram wehi na qatune gina mavuro, ram lodosie, ram sisiqeu ko ram huduhudu goroe.

²⁰Lune rau vei sovu sovuginie u ilo beno, ram lai vohogi na luqe memea dodoga denie, ko ram saru goroe taligu gina luqana sibona. Siu ram laie vano ve ran toto vehavehaginie.

²¹Ram lai na tangaloi gatagale mo vonai dena labute sulo togagi venue, a henana i Saemon ta Saerini, tamai Aleksanda ko i Ruvus, ko ira soldia ram garoginie ve na weli na gai saroutu noi Jisas.

²²Ram lai Jisas sulo ute u waregi ve Kolkota, lo noda leo ve a, ‘Tanoi Vurugi Qetu.’

²³Ram bete na waen lawe Jisas rau rogea mena roboi betu gagarasi u waregi ve a mir, ingeie he inue tea.

²⁴Siu ram toto vehavehaginie lo gai saroutu, ko ram wahegi na luqana, ko ram tuli na taisi ve ran leo ve ihine vin lei na hava mavusui luqe hi tea.

²⁵Ingere rau toto vehavehagi Jisas lo aho gaisiwo lolo robongi.

²⁶A gai gigilegi ko a leo vevegi gai Jisas u uli lune vena, “?I Ratahigi nora ta Judia?”

²⁷Ko rau toto vehavehagi na tangaloi uebalu gairue vage, gatagale lo matuana ko tuegi lo mawirine.

²⁸Giniehi, a Reve reve Gogona mo eno lune hogo ngehi mo veve vena, “Ingeie mo valu bubuginie meire galegaleasi.”

²⁹A sinobu ram dige utu, ram bulegi na qature, ram veve asiesigi Jisas vena, “!Iso! iniko hi goin tala vohogi na vale gogona ko goin vutue lo rani gaitolu,

³⁰gon hivo dena gai saroutu, gon vagamwasoigo sibomu!”

³¹Mwerehi vage, ira muei rugurugu meire huhui talo Leo hora noi Mosis ram sovu Jisas ram, veve veveginire vena: “Ingeie u vagamwasoire tangaloi wagineu, nge he vagamwasoi laie tea sibona!

³²Tare ve ingeie i Kraes hogo, i ratahigi nora a duvi Israel, na hivo dena gai saroutu siserigi hi, huri ve gide da lehe da ladohogo ginie.” Ko ingere hi rau toto vehavehaginire mei Jisas rom sawirie vage.

³³Lo matainaho tu vovohoi a dodo mo tango goro na vanue doluegi mo dadari lo aho gaitolu.

³⁴Lo aho gaitolu i Jisas mo ulo gina dilogi lawua vena, Eloi, Eloi, lema sabaktani? Lo noda leo ve, “?Noku God, noku God, huri hava gineu gom siregi vohogi eu?”

³⁵A sinobu lavasigi rau labe kakarani taie hi, ram rongoe, ram veve vena, “Nen rongo, nge mo ware Elaeja!”

³⁶Siu a tangaloi gatagale mo toa, mo duduni na qasa lolo waen gagasi, mo turuginie lo mavuro, mo sogaginie lawe Jisas ve vin sumue, mo veve vena, “Mese be, da leo tare ve i Elaeja vin vonai huri ve vin lai surie dena gai saroutu.”

³⁷Siu i Jisas mo ulo gina dilogi u lawua, ko mo mabusurigi.

³⁸Ko a turegi huri na mataivale lo Sara Gogona mo madare lo vuhungegi mo dadari vuine.

³⁹I leogoro soldia vudolue mo labe kakarani lobei gai saroutu, lune ko mo lehi Jisas mo mabusurigi, mo veve vena, “A hogo, a tangaloi ngaha i Netui God.”

⁴⁰A vavine lavasigi ingere taiehi vage ram labe vagahao ram leo. Meire hi i Meri ta Makdala ko i Meri ratahi Jemis biti ko Joses, ko i Salome.

⁴¹Ngere hi rau huri Jisas lo mahogi nge u toga a Kalili ko rau buluie. A vavine wagineu vage u sao ingere aiehi, rau vonai meie a Jerusalem.

⁴²Mo kakarani revirevi lo bongi vai vagatai, ngehi a rani gitomue dena bongi mangaana,

⁴³i Josev ta Arimatia mo vonai, ingeie a tangaloi ladomava, a meba talo Kansel, ingeie vage mo toga rarai huri na mwasoana garaqa God mo ratahigi lolona; nge mo vano he matagu tea mo ahu lobei Baelat, mo navuhie huri na betui Jisas.

⁴⁴I Baelat mo awogi huri ve i Jisas u mate beno. Nge mo ware i leogoro soldia vudolue vonai, mo huie huri ve i Jisas u mate hogo.

⁴⁵Lune nge mo rongo mwerehi den i leogoro soldia vudolue, nge mo siregi na betune lawe Josev.

⁴⁶I Josev mo voli na gavu mavute, mo lai suri na betune, mo luqesie gina gavu hi, mo mabue lolo malangai mateana ram bei tei durue lolo vatu. Siu nge mo lulugi na vatu lawua goro na matai malanga hi.

⁴⁷Ko i Meri ta Makdala ko i Meri ratahi Joses ru lehi na tanogi rau mebu na Tarabesi Jisas aie.