Read East Ambae MAK 16 Bible Online

MAK 16 - East Ambae bible

MAK 16

¹Lune a Rani Mangaana u rovo, i Meri ta Makdala mei Meri ratahi Jemis ko i Salome ram voli na vurei bonbon huri ve ran vano ram vurei na betui Jisas ginie.

²Lolo robongi siaga lo Sande, a muei rani talo wik, lune a aho mo tawaga, ram vano lo malanga.

³Lune ram vano lo turegi, ram veve veveginire vena, “?Ihine vin lulugi vohogi na vatu dena matai malanga lawe gide?”

⁴(Huri a vatu hi u lawua.) Siu ram rada hage, ram leo ve a vatu hi u telulu beno.

⁵Siu ingere ram ahu lolo malanga, ram lehi na mwalakelo mo toga hivo lo matue, mo saru na luqe mavute. Ko ingere ram vutugegiesi ginie.

⁶Nge mo veve lawera vena, “Nen mese vai vutugegi. Igimiu nem hikesi Jisas ta Nasaret, ngehi rau toto vehavehaginie. Nge u maraga ingeie hatie tangaha! Leo, a tanogi nge ngaha rau teue aie.

⁷Nge nen vano nen waregi sere lawe ira nona rorongtagi mei Bita vena, ‘Nge mo vano tomuegi gimiu a Kalili, nein lehe aiehi, mwere u veve lawe gimiu.’ ”

⁸Siu ram mwalue ram toa dena malanga, a vevenagi ram vai vutugegi ko a huire mo ruru. Ko rahe veve tea lawe hine tea hurie, huri ram matagu.

⁹Lune i Jisas u maraga beno lolo robongi siaga lo Sande, a muei rani talo wik, nge mo vagaweteginie sibona tomuegi lawe Meri ta Makdala, ngehi u vuro lue na vui esi gaibitu denie.

¹⁰I Meri mo vano lobei retuana ram tatavigi ko ram tangi, ko mo veve sere lawera hurie.

¹¹Lune ingere ram rongo ve i Jisas u mwaso taligu ko ve i Meri u lehe, rahe ladohogoginie tea.

¹²Lo tagugi ngaha, i Jisas u vaga weteginie sibona gina nago dolue lawera nona rorongtagi gairue lune ingere rom dige mo vano lo turegi.

¹³Ingere rom tudori, rom veve sere lawera lavasigi, nge ingere rahe lado hogoginire tea.

¹⁴Vagasigi i Jisas u vagaweteginie sibona lawera hangavulu domwagi gatagale lune ram gagani. Nge mo gato siaga meire hatie nora ladohogo lure ko a qature u siaga, huri rahe lado hogoginire tea hi rau lehe ve u mwaso taligu.

¹⁵Nge mo veve lawera vena: “Nen vano lolo ure doluegi, nen ahagi na Roro Garea lawera tangaloi doluegi.

¹⁶Ihine tea mo ladohogo ko mo lai na garuhigogona vin mwaso; nge ihine he ladohogo tea vin veveginie.

¹⁷Irahine ram ladohogo vin bete na huireana lawera ve rain vei na vaigivui saosao, rain vuro vohogi na vui esi lo henaku, ko rain gato lo leo wagiwegineu.

¹⁸Rain hakovi na mwata, sige rain inu na wai matemate, nge ran he mate tea; rain tango gina limara lo segesege, ko ingere rain mwaso.”

¹⁹A Huqe Jisas u laqa u rovo meire, ko mo bei leie hage eulu, ko nge mo toga hivo lo matuei God.

²⁰Ira rorongtagi ram mwalue ram ahagi na leo garea vataha vanue, ko a Huqe mo lalakogi meire, mo turebibi na nora toretore gina vaigivui teri hi rau vei.