Read East Ambae MAK 2 Bible Online

MAK 2 - East Ambae bible

MAK 2

¹Lo tagui rani gaivihe tea goro, i Jisas mo vonai taligu a Kabeniam, a rorona mo dali huri ve ingeie lolo vale.

²A sinobu u sao ram vonai lobena mwere hatie mahogi lolo vale ko lo matai vale vage u horo gina sinobu. Ko i Jisas mo toretore lawera.

³A tangaloi lavasigi rau vonai lo tagugi mena tangaloi lukuluku, a tangaloi gaivesi ram walie,

⁴a vevenagi a sinobu u sao, rau vei samwegi huri ve rain ehu meie lobei Jisas, ram maraga ram kalo lo ului vale, ram langa vohogi na roroi vale vovohoi Jisas nge aie. Ram siregi na tangaloi lukuluku hi mo eno lo niana mo hivo.

⁵I Jisas mo lehi na nora ladohogo, mo veve lawe na tangaloi lukuluku hi vena, “Netuku, a bugumu u ladovohogi beno.”

⁶A huhui lavasigi talo Leo hora noi Mosis ram toga aiehi, ram lado hikehike lolo lolora, vena,

⁷“?Huri hava gineu ingeie mo laqa mwere ngaha? Ingeie mo veve hivohivogi God. I God hogosie mo u vei lei ve na lado vohogi na bugui galegaleasi.

⁸Siserigi i Jisas u ilo na nora domiana beno lolo lolona, mo veve lawera vena, “?Huri hava gineu gimiu nem lado hikehike mwerengaha lolo taqangimiu?

⁹?Nem lado ve u makemu mwerehilogo huri ve na veve lawe na tangaloi lukuluku vena, ‘A bugumu u ladovohogi beno’, sige na veve vena, ‘Gon maraga, gon wali na niemu, gon dige’?

¹⁰Ineu nai haharagi lawe gimiu, ve i Netui Tangaloi mo hako managi lo ure huri ve vin ladovohogi na galegaleasi.” Ko inge mo veve lawe na tangaloi lukuluku hi vena,

¹¹“Nam veve lawego vena, gon maraga, gon wali na niemu, ko gon mule taligu lo valemu!”

¹²Ko lune a sinobu doluegi ram lehe, nge mo maraga, mo wali na niena, mo mule siserigi. Ko ram awogi garagara, ko ram waregareagi God, ram veve vena, “Gahe lehi na gineu tea mwere ngaha mosigei!”

¹³I Jisas mo vano taligu lo mwararai wei ta Kalili. A sinobu doluegi ram vanai lobena, ko nge mo huhuire.

¹⁴Lune nge mo dige utu mo lehi na tangaloi vilevile homu a henana i Livae i netui Alvius mo toga lo tantanoi nona tabana. I Jisas mo veve lawea vena, “Gon hurieu”, ko nge mo maraga mo hurie.

¹⁵Lo tagugi i Jisas mo gagani lolo valei Livae. A tangaloi vilevile homu u sao mena tangaloi galegaleasi ram huri Jisas, ko u sao denire ram bulu meie ko ira nona rorongtagi lo tanoi gaganie.

¹⁶A huhui talo burigi nora Varise lavasigi, a burigi ngaha ram hako siagagi na Leo Hora noi Mosis, ram lehi Jisas ve mo gagani meire galegaleasi ko ira vilevile homu, ram hui na nona rorongtagi vena, “?Huri hava gineu i Jisas mo gagani bubugi meire tangaloi vilevile homu ko ira galegaleasi?”

¹⁷I Jisas mo rongora mo duvi vena, “Irahine ram mwaso rahe tarani tea dokta, nge irahine hogosie hi ram sege. Neu nahe vonai tea ve nain ware irahine hi rau vovohoi, nge irahine rau galegaleasi.”

¹⁸Lo taro gatagale ira rorongtagi noi Jon Garuhigogona meire Varise ram gologolo. Ko a tangaloi lavasigi ram vonai ram hui Jisas vena, “?Huri hava gineu ira rorongtagi noi Jon Garuhigogona ko ira rorongtagi nora Varise ram gologolo, nge ira nomu rorongtagi hatie?”

¹⁹I Jisas mo duvi lawera vena, ?Wa igimiu nem lado ve a sinobu ram vanai lolo hinagai legie rain he gagani tea?! Hatie vohogi! Lune i taglagi mo toga tau meire, rain he vai na gineu hi tea vohogi.

²⁰Nge a rani vin vanai rain lei vohogi i taglagi denire, ko lo taro hi ingere ram bei gologolo.

²¹“A tangaloi vin he lai na mavusui luqe garaqa tea vena taue talo luqe malea. Tare ve mo vai mwere hi, a mavusui luqe garaqa vin dare na luqe malea, vin mweduru vin lawua den tomue.

²²A tangaloi vin he saru na waen garaqa tea talolo vinui kakarue malea. Tare ve mo vai mwerehi, a waen vin vuge teteri na vinui kakarue, ko a waen vin esi mena vinui kakarue vage. Hatie! a waen garaqa mo tarani na vinui kakarue garaqa vage.”

²³Lo Rani Mangaana gatagale i Jisas u dige turu lolo talui kon meire nona rorongtagi, ram dige meie ram tauvuigi ram due na kon.

²⁴Siu ira Varise ram veve lawe Jisas vena, ?Huri hava gineu ira nomu rorongtagi ram vai na gineu he vovohoi tea lo Leo Hora noi Mosis lo Rani Mangaana?”

²⁵I Jisas mo duvi vena: “?Wa igimiu ne he value tea huri na gineu i Devet u veie lune nge mo tarani na hinaga? Ingeie mena nona tangaloi ram mwaruruhi,

²⁶Siu ingeie mo ahu lolo valei God mo gani na bereti hi u hogoginie lawe God beno. A gineu ngaha u vei lo tarogi i Abiata ingeie a muei rugurugu, mo huri na nomai leohora a tangaloi rugurugu hogosie rau geni na bereti ngaha, nge i Devet u geni ko u bete lawera nona tangaloi ram gani vage.?”

²⁷Ko i Jisas mo veve lawera vena, “God u vei na Rani Mangaana huri na gareana nona tangaloi, nge he tau na tangaloi tea huri na Rani Mangaana.

²⁸Siu vage i Netui Tangaloi ingeie a Huqegi goro na Rani Mangaana vage.