Read East Ambae MAK 4 Bible Online

MAK 4 - East Ambae bible

MAK 4

¹I Jisas u teuvuigi mo huhui taligu lo mwararai Wai ta Kalili. A sinobu lawua ram sone lobena; giniehi Jisas mo kalo mo toga lolo aka, ko a sinobu ram toga lo tano lo mwararai wei.

²Mo huhuire gena gineu sao lo gato tavalu, ko lo nona leo huhui mo veve lawera vena:

³“Nen rongo! A tangaloi gatagale mo vano mo gaburegi na toli.

⁴Ko lune nge mo gaburegi, lavasigi ram soi lo turegi, ko a manu ram vonai ram gani vohoginire.

⁵Lavasigi ram soi lo ului vetu, a tano raraga aie; ko siserigi ram tubu hage, a vevenagi a tano he bue tea.

⁶Ko lune a aho mo kalo mo hure na rivurivu, ko ram koru huri a goarigi rahe hivo turebue tea hatie.

⁷A toli lavasigi ram soi talolo garo kau, ko a garo kau ram tubu hage, ram vivire ko rahe wai mwasigi tea.

⁸Nge a toli lavasigi ram soi lolo tano garea, ram tubu ram mauri hage, ram wai mwasigi lure, lavasigi ngavulu gaitolu, lavasigi ngavulu gaiono, ko lavasigi vudolue.”

⁹Ko i Jisas mo veve lawera vena, “Tare ihine a qerona lune na rorongtagi.?

¹⁰Lune i Jisas mo toga gahea, a tangaloi lavasigi hi rau rongoe ram vanai lobena meire hangavulu domwagi gairue, ram hui Jisas huri ve na matamwasaragi na gato tavalu lawera.

¹¹I Jisas mo veve lawera vena, ?Igimiu nein ilo lai na gineu hi mo toga hiligi huri na ute hi i God mo ratahigi lolona. Nge a sinobu wagineu ram rorongtagi lei na gineu doluegi lo gato tavalu.

¹²Huri ve, ?Ingere rain leo ko rain leo, ingere rain he leo lai tea. Ingere rain rongo ko rain rongo, nge rain he rongo hogo lai tea ve u ronghogo, bataha rain tudori sulobei God ko ingeie vin ladovohogi na bugure.

¹³Siu i Jisas mo huire vena, ?Wa igimiu nehe ronghogosi gato tavalu ngaha tea? ?Tare ve hatie, igimiu nein ronghogosi na gato tavalu wagineu mwerehilogo?

¹⁴A tangaloi gaburegi toli mo gaburegi na leo noi God.

¹⁵Tangaloi lavasigi ram mwere na toli hi rau soi lo turegi, lo taro ram rongo na leo garea siserigi i Satan mo vonai, mo lai vohogi na leo hi denire.

¹⁶A tangaloi lavasigi ram mwere na toli ngehi mo soi lo ului vetu. Ko siserigi ram rongo na leo ram laie gena havuhevu.

¹⁷Nge he hivo tea lolo buei tanqangire. Giniehi, lune a gineu esi sige a gagarasi mo vonai huri na leo, siserigi ram siregi vohogi.

¹⁸A tangaloi lavasigi ram mwere na toli ngehi mo soi lolo garo kau. Ngerehi ram rongo na leo,

¹⁹nge a mavanai gineu talo mwasoana ngaha, mwerena lalaie, ko a taratarani esi u sao mo wiribibi na leohuhui denie hi, vena mauri na tau mwasigi lo mwasoara.

²⁰Nge a tangaloi lavasigi ram mwere na toli ngehi mo soi hivo lolo tano garea. Ngere ram rongo na leo, ram laie ko ram wai mwasigi lure, lavasigi ngavulu gaitolu, lavasigi ngavulu gaiono, ko lavasigi vudolue.”

²¹I Jisas mo veve lawera vena: wa ihine tea vin lei na laeti vena taue lo vavai laha sige lo vavai qea? !Hatie! Ingeie vin teue lo gai ture leleo. A hava gineu tea mo toga hiligi vin leie ta varea su lo ute lawua, ko hava gineu tea vin luqe goroe, vin vuge talahalagi.

²²A hava gineu mo eno vunigi vin teue lo ute lawua, ko a hava gineu u luqegoro vin vuge talahaginie.

²³Ihine a qerona lune vena rongo, na ronghuri vurugegi!”

²⁴Ko ingeie mo veve vage lawera vena, ?!Igimiu nein lei vurugegi na hava gineu hi ram rongo! A hava leo nem vevegi na tangaloi wagineu ginie. I God vin vevegi gimiu vin huri na leo vevegi hi teu, nge ingeie vin vevegi gimiu vin huire garagara taligu.

²⁵Huri irahine a nora rongronghogo lure, i God vin bete lawera vin vagevage. Nge irahine hatie nora rongronghogo lure, vin lei vohogi doluegi denire, hatie huri tare ve a nora rongronghogo te biti mo eno. Ihine mo lai vin bete lawea vage; ko ihine he lai tea vin lei vohogi nona lalaie denie.

²⁶I Jisas mo veve vage vena: “A mwasoana garaqa i God mo ratahigi lolona u mwere na tangaloi mo gaburegi na toli lolo talu.

²⁷Lolo bongi mo maturu, mo rada sige mo maturu mo rani mo didige lategi, nge a toli ram tubu hage ram mauri, nge ingeie he ilo tea ve rau tubu mwerehilogo.

²⁸A tano sibona mo vai na toli ram wai mwasigi: tomue a tubugi, siu a vuhigi, viregi vagasigi a baegogi ko a mwasigi ram boro lune.

²⁹Lune a mwasigi ram matue a tangaloi hi mo tauvuigi mo taire, a vevenagi a taro matue mo vonai.”

³⁰I Jisas mo huire mo veve vena: “?Dai tovogi na mwasoana garaqa i God mo ratahigi lolona vei u mwere na hava gineu? ?Dai mata-mwasaraginie lo hava gato tavalu?

³¹U mwere na toli baka, u biti dena toli doluegi talo ure. A tangaloi mo laie mo rivue hivo lolo tano;

³²he ribi tea mo tubu mo mauri, u lawua dena gai doluegi. Mo vehagi na rangagi rau lawua, siu huri a manu ram vonai ram tau na mwagunire lo malumelune.”

³³Ko i Jisas mo laqagi na leo lawera sinobu gina gato tavalu u sao, huri ve rain rongo hogo lai lune.

³⁴He laqa tea lawera tavala varea dena gato tavalu; nge mo matamwasaragi na gineu doluegi lawe na nona rorongtagi lune ingere ram toga gahera. I Jisas u laqa lo gatotavalu u sao mwere ngaha vena huhui na sinobu gina roro huri God, lo matahala ve ingere rain ronghogo lai.

³⁵Lo ranigi hi teu lolo revirevi, i Jisas mo veve lawera nona rorongtagi vena, “Da vano lo tavului wei.”

³⁶Ram siregi na sinobu, a rorongtagi noi Jisas ram kalo sulolo aka ngehi Jisas nge lolona beno. Ko a aka lavasigi vage ram vano meire.

³⁷Ko a langi lawua mo mwalue ko a navo ram tuli sulolo aka, giniehi a aka mo kakarani vena horo gena wai.

³⁸Ko i Jisas nge lo boroi aka, mo maturu mo tau na qatune lo lunge. A nona rorongtagi ram ware radasie, ram veve vena, “?Huhui, wa gohe lado tea huri ve vai teu dam mate?”

³⁹I Jisas mo maraga mo gato goro na langi mo veve vena, “Gon hivo rorongo!” vunu mo laqa lawe na navo vena, “Gon tamwata!” Siu a langi mo mautu ko a taro lawua.

⁴⁰Siu i Jisas mo veve lawera vena, “?Huri hava gineu nem matagu? ?Wa hatie nomiu ladohogo tau mosigei?”

⁴¹Ko ingere ram matagu liu, ram tauvuigi ram vui veve veveginire vena, “?A tangaloi ngaha ihine? Huri a langi ko a rebu rom rongo hurie.”