Read East Ambae MAK 5 Bible Online

MAK 5 - East Ambae bible

MAK 5

¹Ko ram dadari lo tavului Wai ta Kalili lo loloi venue ta Kerasa.

²Ko siserigi i Jisas mo rovo dena aka, ingeie mo sakagi na a tangaloi gatagale mo bei mwelue dena malanga vatu ram tulegi na tarabesi tangaloi rau mate aiehi.

³A tangaloi hi a vui esi lune ko mo toga lolo malanga vatu. Rahe vau laie te taligu gena seni;

⁴vagasaosao rau veu bibi na karune ko a limana, nge gesegi mo roto na seni ngerehi lo karune ko lo limana. A tangaloi hatie nora huireana ve u tatarise ve rain tugoroe.

⁵Bongi ko rani mo dige lategi lolo malanga vatu ko lo vusi, mo ulo lategi ko mo teveie sibona gena vatu.

⁶Mo tino vagahao mo lehi Jisas; mo toa siaga, mo vano mo sisiqeu hivo lo nagona,

⁷mo ulo gena dilogi u lawua mo veve vena, “Jisas, i Netui God u Hahale garagara! ?Gom tarani na hava gineu meieu? Neu nam hariginigo lo henai God, gon mese vai garasieu!

⁸(Mo veve mwerehi huri Jisas mo veve lawea vena, “Vui esi, mwalue dena tangaloi hi!”)

⁹Ko i Jisas mo huie mo vena, “?A henamu hine?” Mo duvi goroe vena, “A henaku ‘A burigi’ a vevenagi gamai gau sao!”

¹⁰Ko mo hui siaga den Jisas huri ve na mese hora vohoginire dena ute tahi.

¹¹A buri boe sao aie ram huhue lo vusi.

¹²A vui esi hi ram hui siaga den Jisas vena, “Gon hora gamai lawe na boe, huri ve gan ahu lolo lolora.”

¹³Ko mo horara. Ko a vui esi hi ram mwalue dena tangaloi hi, ram ahu lolo boe. Ko a buri boe doluegi, u tatarise teri vagarue, ram toa ram hivo lo bahai wai, ram qale talolo wai, ram dono.

¹⁴A tangaloi hi rau leo goro na boe ram toa vano, ram veve lategi lo qatui venue lawua ko lo togagi venue dalie. Ko a sinobu rau vano ve ran lehi na hava gineu hi u vei.

¹⁵Ram vonai lobei Jisas ram lehi na tangaloi hi a vui esi u toga lune mo toga tau u luqeluqe garea ko a qatune u garea taligu, ko ingere ram matagu liu.

¹⁶A tangaloi lavasigi ingere rau lehe ram valu huri lawe na sinobu a hava gineu u vei lawe na tangaloi hi a vui esi rau toga lune, ko ingere ram laqagi huri na boe ngerehi.

¹⁷Siu ingere ram tauvuigi ram navu dein Jisas huri ve na vano dena vanuara.

¹⁸Lune i Jisas mo kalo sulolo aka, a tangaloi hi a vui esi rau toga lune mo hui Jisas vena, “?Gon siregi ve ineu nain vano meigo?!

¹⁹Jisas he sireginie tea, lawea nge mo veve lawea vena, “Gon mule lo valemu ko lobei re havamu, gon veve lawera huri na gineu lawua a Huqe u veie lawego, ko ve u hagavigo!”

²⁰Ko a tangaloi hi mo tudori mo vano mo veve lategi lo qatui venue hangavulu huri na gineu lawua i Jisas u veie lawea; ko a tangaloi doluegi ram awogi.

²¹Lune i Jisas u vano taligu lo tavului wai ta Kalili, a sinobu sao ram sone goroe lo mwararai wai.

²²I Jaerus, nge a tangaloi lawua gatagale goro na valei soneana, mo vonai mo lehi Jisas, mo soi hivo lolo karune,

²³ko mo navu garagara denie vena, “I netuku a maresu vavine mo sege u liu. Gon vonai gon tau na limemu lune huri na mwaso taligu!”

²⁴Siu i Jisas mo vano meie. Ko a sinobu sao ram hurie ram susuni dalideli ginie.

²⁵A vavine gatagale a dai qaravu u veie a higao hangavulu domwagi gairue.

²⁶A vavine hi mo rongo gagarasi u liu, mo vano lobei na dokta u sao. A nona homu mo rovo, nge a gana segeana he rovo tea, nge mo asi esi vage.

²⁷A vavine hi u rongo na roro huri Jisas beno, siu mo vonai meire sinobu lo tagui Jisas.

²⁸Nge ingeie mo lado vena, “Tare ve nai sikeli na luqana hogosie nai mwaso.

²⁹Mo sikeli na luqei Jisas, ko a dai qaravu hi mo mautu vagatagale, ko mo rongo lolo betune huri ve a gana segeana u rovo.

³⁰Ko siserigi i Jisas mo rongo huri ve a nona managi u vano denie, mo tudori goro na sinobu mo veve vena, “?Ihine u sikeli na luqeku?”

³¹Ko a nona rorongtagi ram duvi goroe vena, “Gom lehi na sinobu lawua ngaha ram vui susuni dalibulu gorogo. ?Huri hava gineu gom hui ve ihine mo sikeligo?”

³²Nge i Jisas mo leo dalibulu huri ve ihine hi u veie.

³³A vavine hi u ilo beno ve a hava gineu u vei lawea, mo matagu ko mo rurururu; mo vonai mo sisiqeu hivo goroe mo veve hogo doluegi lawea.

³⁴I Jisas mo veve lawea vena, “Netuku, a nom ladohogo mo vaigo gom mwaso, siu gon vano lo tamwata, a gam segeana u rovo.”

³⁵Lune i Jisas mo laqa mwerehi, a tangaloi lavasigi ram vonai dena valei Jaerus ram veve lawea vena, “I netumu u mate beno. ?Huri hava gineu gom vai taturegi na Huhui taligu?”

³⁶Nge i Jisas mo rongo na leora, mo veve lawe Jaerus vena, “Gon mese matagu, nge gon ladohogo hogosie.”

³⁷Siu nge he siregi ihine tea vena vano meie, nge hogosie Bita, Jemis mei tuana Jon.

³⁸Ram vano dadari lo valei tangaloi lawua hi i Jaerus; i Jisas mo lehi na sinobu ram vui rorogi, ram ngara ko ram tangi u liu.

³⁹I Jisas mo ahu vano lolo vale, mo huire vena, “?Huri hava gineu nem vui rorogi ko nem ngara? A maresu he mate tea, nge mo maturu.

⁴⁰Nge ram sovue. I Jisas mo hora na tangaloi doluegi suvarea, ko mo lai na tamai maresu hi mei retahine mena nona rorongtagi gaitolu, ram ahu vano lo mahogi a maresu vavine hi mo eno aie.

⁴¹Mo hako lo limana, mo veve lawea vena, Talita kum, vena, “Maresu vavine! Neu nam veve lawego, gon maraga!”

⁴²Ko siserigi a maresu hi mo maraga, mo tauvuigi mo dige lategi, huri a higaona hangavulu domwagi gairue. Ko a sinobu ram lehe ingere doluegi ram awogi u liu.

⁴³Nge i Jisas mo gato gorora garagara ve ran mese veve lawe hine tea. Siu mo veve lawera vena, “Nen bete gineu lawea na gani.”