Read East Ambae MAK 7 Bible Online

MAK 7 - East Ambae bible

MAK 7

¹Ira Varise ko huhui lavasigi talo Leohora noi Mosis ram vonai den Jerusalem ram sone dalibulu goro Jisas.

²Ingere ram leo hage ve ira rorongtagi lavasigi ram gagani gina limara rahe mwasara tea, ngehi rahe qaqaga tea vena huri na lengagi mwerehi a Varise rau veve ve a sinobu rain huri lune.

³Huri ira Varise ko ira duvi Israel doluegi vage, ram huri na leohuhui rau lei dena duvire ta tuei ngehi rahe gani na hinaga tea, tare ve rahe solo na limara tea vena huri na matahala vovohoi.

⁴Vage rahe gani na hinaga tea hi mo vanai dena mageti tare rahe soloe tea gitomuegi, ko ram huri na lengagi hala saosao, ngehi rau lei hougi ngehi ram solo na kavu mo huri na matahalagi vovohoi, a disi kava susuveni ko a nie.

⁵Siu ira Varise ko ira huhui talo Leo Hora noi Mosis ram hui Jisas vena, “Huri hava gineu ira nomu rorongtagi rahe huri na leohuhui tea hi u leihougi mo himei den retubumai, ngehi ram gagani rahe qaqaga tea vena huri na matahala vovohoi?”

⁶I Jisas mo duvi lawera vena, “I Aesaea u laqagi huri gimiu ira kali goro, lo nona revereve: I God mo veve vena, ‘A sinobu ngaha ram ladomavagieu gena singora, nge a lolora u vagahao denieu.

⁷He garea tea ve rain hudu goroe, a vevenagi ram huhui na tauleo nora tangaloi mwere huri ve a noku Leo hora!’ ”

⁸Ko i Jisas mo veve vena, “Nem tau vohogi na Leo hora noi God ko nem hako ronghuri na leohuhui nora tangaloi.”

⁹Ko i Jisas mo laqa tau mo sigei: “Gimiu neu mataisao huri ve nem tau vohogi na Leo hora noi God, huri ve nein tabehagegi na nomiu leohuhui sibomiu!

¹⁰Huri i Mosis u veve vena, ‘Gon ladomavagi tamamu tona retahimu,’ ko, ‘Tare ve ihine tea mo veve asiesigi tamana sige retahine, nge vin mate.’

¹¹Nge igimiu nem huhui vena, tare ve ihine nona hako gineu lune nge vin bului lei tamana sige retahine ginie, nge ingeie mo veve vena, ‘Nge ngaha a Koban’ (a iloilogi huri ve, a hogogi lawe God),

¹²nge hi mo tabe goroe sibona ve vin mese bului tamana sige retahine.

¹³Lo matahala mwere hi a leo huhui hi nem bete lawe rahine wagineu mo hara vohogi na leoi God. Ko a gineu wagiwegineu u sao mwere ngaha hi nem vaire.”

¹⁴Siu i Jisas mo ware na sinobu vonai lobena taligu ko mo veve lawera vena: “Gimiu doluegi, nen rorongtagieu ko nen ronghogo.

¹⁵Hava gineu tavarea tea ve mo ahu lolo tarabesi tangaloi vin he vai soloragi laie tea. Nge a gineu mo mwalue dena tangaloi mo vai soloraginie.

¹⁶[Gimiu nein rorongtagi vurugegi, tare a qeromiu ve nein rongo ginie!]”

¹⁷Lune nge mo siregi na sinobu ko mo ahu lolo vale, ira nona rorongtagi ram huie huri na gaidumu ngaha.

¹⁸I Jisas mo veve lawera vena, “?Wa igimiu vage ne he iloe tea vurugegi? ?Nehe iloe tea ve a gineu ta varea mo ahu lolo tangaloi he vai soloraginie tea,

¹⁹a vevenagi he ahu tea lolo lolona nge lolo tinaena ko mo hivo mo avu turu?” (Mo veve mwere ngaha i Jisas mo haharagi ve a halai hinaga doluegi rau mwasara.)

²⁰Ko mo veve vena, “A gineu mo mwalue dena tangaloi ngehi mo vai soloraginie.

²¹Huri dena loloi taqangi tangaloi, a domiana rau esi ram mwalue ve na vai na gineu esi ingere ngaha: a vagasile lo vavine, a balubelu, a ue tangaloi,

²²a vaihuri, a galegaleasi, a kalikeli, a nago siaga, a matabari, a vevehuri, a sagesage ko a reraana:

²³a gineu esi teri ngaha ram mwalue dena loloi tangaloi ko ram vai soloraginie.”

²⁴Siu i Jisas mo siregi mo vano lo vanue kakarani Taea. Nge mo ahu lolo vale, nge he tarani tea ve a sinobu ran iloe; nge he hili lai tea denire.

²⁵Nge siserigi a vavine, i netune a maresu vavine a vui esi mo toga lune mo rongo na roroi Jisas, ko mo vonai mo soi hivo lolo karune.

²⁶A vavine ngaha nge ingeie hatie duvi Israel, ingeie a haroharo, nge u vora a Vonisia lo vanue Siria. Nge mo tiehi Jisas ve vin vuro lue na vui esi dein netune.

²⁷Nge i Jisas mo duvi goroe vena, “Ira maresu ran gagani tomue; huri he garea tea vena lai na hinaga gara maresu ko na tulie lawe ra wiriu.”

²⁸Nge ingeie mo duvi vena, “Io, huqe, nge a wiriu lovavai tebol ram gani na gasi utu utui hinaga gara maresu!”

²⁹Ko i Jisas mo veve lawea vena, “A vevenagi huri na nomiu gai duvi leo ngaha, iniko gon vano lo valemu; a vui esi u mwelue beno deni netumu!”

³⁰Siu nge mo vano taligu lo valena, ko mo haqe na maresu hi mo eno lolo niana; a vui esi hi u mwelue beno denie.

³¹Ko i Jisas mo siregi na vanue kakarani Taea ko mo dige turu na vanue Saedon sulo Wai ta Kalili, lo livugei qatui venue hangavulu.

³²Ko ram lai na tangaloi a qerona u vono ko a baogi, ko ram tiehi Jisas vena tango lune gina limana.

³³Siu i Jisas mo lai beragi na tangaloi hi gahea dena sinobu, mo tau na bisune lolo qerona, mo lodo ko mo sikeli na meana.

³⁴Ko i Jisas mo dada sueulu, mo mabu horagi ko mo veve lawe na tangaloi hi vena, Evata, a domianagi huri ve, “Gon waga!”

³⁵Ko a qerona mo waga taligu, ko a meana mo tavalanga, ko mo laqa vurugegi.

³⁶Ko i Jisas mo gato gorora ve ran mese laqagi lategi lawe hine tea; nge lune nge mo gato gorora, ingere ram laqagi lategi mo vagevage u liu den tomue.

³⁷Ko ingere doluegi ram rongo, ram garigi liu, ram veve vena, “Nge mo vai na gineu doluegi rau garea! Nge mo vaire qerovono ram rongo, ko ira baogi ram laqa lai!”