Read East Ambae MAK 8 Bible Online

MAK 8 - East Ambae bible

MAK 8

¹Lo tarogi ngehi a sinobu lawua ram sone bubugi taligu. Ko hatie hinaga ve rai geni, i Jisas mo warera ira nona rorongtagi, mo veve lawera vena:

²“Nam hahagavi huri na sinobu ngaha, a vevenagi rau toga meieu beno huri na rani gaitolu, ko siserigi ngaha hatie hinaga ve rain geni.

³Tare ve nain horara rain mule mwaruruhi lo tanora, rain mate huri gara lo turegi, huri lavasigi rau vonai vagahao.”

⁴Ira nona rorongtagi ram huie vena, “?Dain haqe na hinaga hi logo u tatarise huri na sinobu ngaha lo vanue vurogi?”

⁵Ko mo huire vena, “A bereti gaivihe mei gimiu?” Ko ram veve vena, “Gaibitu.”

⁶Ko nge mo hora na sinobu ve ran toga hivo lo tano. Siu nge mo lai na bereti gaibitu, mo vevegareagi God hurire, mo vise vurivurire, mo laire lawe na nona rorongtagi huri ve ran betera lawe na sinobu; ko ram vai mwerehi.

⁷Ko a ige wuwerigi gaivihe vage meire. I Jisas mo vevegarea hurire, ko mo veve lawe ra rorongtagi ve ran betera vage.

⁸Ngere doluegi rau geni rau guqe ingere u tatarise teri vagavesi.

⁹Siu ira rorongtagi rau vile bulutegi na maututugi, a gete gaibitu rau horo. I Jisas mo hora mulegi na sinobu,

¹⁰ko siserigi mo kalo lo aka meire nona rorongtagi ko ram vano lo loloi venue Dalmanuta.

¹¹Ira Varise lavasigi ram vonai ram tauvuigi ram vuigarogi mei Jisas. Ram tarani ve ran sine lehe, siu ram navu ve vin haharagi na vaigivui nge hi mo vanai dein God.

¹²I Jisas mo mabu horagi lolo lolona, mo veve vena, “?Huri havagineu a sinobu ta hibagataha ram hikesi na gigilegi? A hogo, nam veve lawe gimiu, nge hatie gigilegi ve vin haharagi lawe na sinobu ta hibagataha.”

¹³Nge mo sireginire, mo kalo lo aka taligu, mo vano utu lo tavalui wei.

¹⁴Ira rorongtagi rau geluvegi ve rain hako tea hinaga, nge rau hakovi na bereti gatagale hogosie meire lo aka.

¹⁵I Jisas mo veve na leo matagute lawera vena, “Nein leo huri na isi nora Varise ko a isi noi Herot.”

¹⁶Ingere ram veve veveginire vena: “Ingeie mo veve mwere ngaha a vevenagi a bereti hatie mei gide.”

¹⁷I Jisas u ilo huri na hava gineu ingere ram veve, ko nge mo huire vena: “?Huri hava gineu igimiu nem veve vevegi gimiu a vevenagi a bereti hatie mei gimiu? ?Gimiu ne he ilo vurugegi tea sige ne he rong hogo te tau? ?A domimiu mo lulu?

¹⁸A matamiu lumiu, ne he leo tea? ?A qeromiu lumiu, ne he rongo tea? ?Gimiu ne he lado haqe tea

¹⁹lune nau vise vurivuri na bereti gailime huri na sinobu teri vagalime? ?A gete gaivihe rau horo gena maututui bereti neu vile?” Ram duvi lawea vena, “Hangavulu domwagi gairue.”

²⁰“?Ko lune nau vise vurivuri na bereti gaibitu huri na sinobu teri vagavesi, a gete gaivihe rau horo gena maututui bereti neu vile?” Ram duvi vena, “Gaibitu.”

²¹Ko nge mo veve lawera vena, “?Ne he ilo vurugegi tea mosigei?”

²²Ko ingere ram vonai a Betsaeda, ko a tangaloi lavasigi ram lai na tangaloi matadodo vonai lobei Jisas, ram tiehie ve vin tango lune.

²³I Jisas mo dulei na matadodo, mo laie mo vano dena togagi venue. Nge mo lodo siu lo matana vunu, nge mo bei teu na limana lune, mo huie vena, “?Gom lehi na hava gineu tea?”

²⁴A matadodo mo dada mo veve vena, “Nam lehi na tangaloi, nge ram dali lategi mwere na gai.”

²⁵I Jisas mo tango vano lo matana taligu. Ko a tangaloi hi mo rada mo leo vurugegi, a matana mo leleo taligu, ko nge mo lehi na gineu doluegi.

²⁶I Jisas mo hora muleginie lo valena, mo veve vena, “Goin mese vano taligu lolo togagi venue hi.?”

²⁷Siu i Jisas meire nona rorongtagi ram vano utu lo togagi venue u sao kakarani lobei Sisaria Vilibae. Ko lune ingere ram dige mo vano, i Jisas mo huire vena “?A tangaloi ram veve ve ineu ihine?”

²⁸Ngere ram duvi goroe vena. “Lavasigi ram veve ve iniko i Jon Garuhigogona, ko lavasigi rave iniko i Elaeja, ko lavasigi rave iniko gatagale denire tangaloi ligoligogi.”

²⁹Ko nge mo huire vena, “?Nge igimiu, nem veve ve ineu ihine?” I Bita mo duvi goroe vena, “Iniko i Kraes.”

³⁰Ko i Jisas mo veve lawera vena, “Nein mese veve lawe hine tea hurieu.”

³¹Ko i Jisas mo tauvuigi mo huhui na nona rorongtagi ve mo veve vena, Netui Tangaloi vin rongogagarasi garagara, ko ve ira tamaragai ko ira muei rugurugu ko ira huhui talo Leo Hora noi Mosis rain tuli vohoginie ko rain vei vagamatea, ko ve nge vin maraga taligu lo tagui rani gaitolu.

³²Nge mo veve matamwasaragi lawera. Siu i Bita mo lai beraginie, mo tauvuigi mo gato goroe.

³³Nge i Jisas mo tu dori, mo lehi na nona rorongtagi, mo gato goro Bita, mo veve vena: “Goin vano denieu satan! A nomu ladolado he vanai tea dein God, nge mo vanai dena tangaloi hogosie.”

³⁴Ko i Jisas mo ware na sinobu meire nona rorongtagi vonai lobena, ko mo veve lawera vena: “Tare ve ihine mo tarani vena vanai na hurieu, ingeie vin geluveginie sibona ko vin weli na nona gai saroutu, vin hurieu.

³⁵Huri ihine tea mo tarani vena hako bibi na mwasoana vin vei salaginie, ko ihine mo vagasalagi na mwasoana hurieu ko huri na Roro Garea vin hako bibie.

³⁶?Huri a tangaloi vin lei na hava gineu u garea tare ve vin qoragi na ureure doluegi nge mo vagasalagi na mwasoana? ?Hatie vohogi?

³⁷?Hatie gineuhigi ve vin bete vena vai mule na mwasoana taligu?

³⁸A sinobu ram toga hi bagataha, ram toga lolo galegaleasi ko a taroi gineu esi. Tare ve ihine tea mo maemae meieu ko a noku leohuhui, i netui Tangaloi vin maemae meie lune ingeie vin vanai mena varavarai Tamana meire engsel gogona.”