Read East Ambae LUK 1 Bible Online

LUK 1 - East Ambae bible

LUK 1

¹Ngere rau sao rau vei lei huri ram reve na roro huri na gineu ngerehi rau vomai lolo livugada.

²Rau reve na roro ngaha, dau rongoe beno denire tangaloi ngerehi rau lehi na gineu ingere ngaha gitomue, siu ram ngasaginie.

³Siu, Tiovilas, iniko a tangaloi lawua, nau hikehike vurugegi huri na roro ngaha u teuvuigi lo vuigi redu. Siu nam lado ve u garea huri ve neu nan reve na gineu doluegi ngerehi nan tau vovohoi ginire.

⁴Siu nam tarani ve gon ilo vurugegi na halai gineu ngerehi rau huhuigo ginire beno.

⁵Lo taro hi i Herot u ratahigi lolo vanue Judia, a rugurugu gatagale a henana i Sekaraea, ingeie talo burigi noi Abia. A henai gahorana i Elisabet; ingeie vage talo duvire rugurugu, ngehi a duvi Eron.

⁶Ingere vunu ru toga vovohoi lo nagoi God, ko ru tabe vurugegi na Leo hora nona Huqe doluegi.

⁷Ingere rohe hako te maresu huri Elisabet he bavabava tea, ko ingere vunu ru sesea.

⁸Lo rani gatagale i Sekaraea mo vai na nona tabanagi mwere na tangaloi lalakogi lo Sara Gogona, mwerehi mo lalakogi vatahatarogi.

⁹Mo hure na lengagi nora rugurugu, ram tuli na tais ram haqea vin ingeie vin hure na gai buhoru lo tanoi rugurugu. Siu ingeie mo vano sulolo vale gogona nona Huqe,

¹⁰lune a sinobu ram toga varea ram tataro lo tarogi hi mo hure na gai buhoru.

¹¹A engsel nona Huqe mo vomai mo serelue lawea, mo labe lobe na tanoi hure na gai buhoru lo matue.

¹²Lo taro hi i Sekaraea mo lehe, mo vai vutugegi go mo matagu.

¹³Nge a engsel mo veve lawea vena, “Sekaraea, gon mese matagu! God u rongo na nomu tataro, ko i gahoramu Elisabet vin bava netumu a maresu mwera. Iniko goin suri na henana ve i Jon.

¹⁴Iniko goin rong garea ko nego goin hevuhevu liu, go a sinobu rain hevuhevu lune ingeie vin vora.

¹⁵Huri ingeie vin voragi na tangaloi lawua lo nagoi Huqe. Vin he inu na waen tea sige a wai mwamwavi. Lo tarogi hi nge mo toga tau mosigei lolo taqangi retahine e ingeie horo gena Vui Gogona.

¹⁶Ko nge vin lei na sinobu sao a duvi Israel taligu lawe na Huqe a nora God.

¹⁷Nge vin vano tomuegi na Huqe, u huire ko muremure mwere na tangaloi ligoligogi i Elaeja. Ingeie vin lei bubugi ira tama koi reneture taligu, nge ve dore na sinobu hi ram galogalo lo leo vanai taligu sulo matahala vovohoi; Ingeie vin ve vagatai na sinobu nona Huqe raraie.”

¹⁸I Sekaraea mo veve lawe na engsel vena, “?Nain iloe wuraha ve vin mwere ngaha? Huri ineu nau tamaragai beno ko i gahoraku u tubui vage.”

¹⁹A engsel mo duvi vena, “Ineu Kabriel. Nam labe lo nagoi God; nge mo horau ve nain laqa lawego ko nain veve na Roro Garea ngaha lawego.

²⁰Nge gohe ladohogo tea lo noku leo ngaha, nge vin vomai lo taro vovohoi hi. Huri gohe ladohogo tea, goin he gato lai tea, goin toga rorongo vin dadari lo rani ngehi a noku leo hi vin eno lune.”

²¹Lo tarogi hi a sinobu rau toga rarai Sekaraea, ram awogi huri u toga riribigi lolo vale gogona.

²²Lo taro hi mo mwalue Ingeie he gato lai tea lawera, siu ram ilo huri ve ingeie u hueri lolo vale gogona. He gato lai tea, nge mo gato gena limana.

²³Lo taro hi a nona taroi lalakogi lolo vale gogona u rovo, i Sekaraea mo mule taligu lo valena.

²⁴He ribi tea, lo tagugi hi, i gahorana Elisabet mo tino gina maresu, ko mo toga tamwere lo valena hure na vule gailime.

²⁵Me mo veve vena, “Lo taro ngaha a Huqe mo buluieu mwere ngaha. Ne mo lai vohogi na maemae denieu.”

²⁶Lune Elisabet a vulana gaionogi, God mo hora na engsel i Kabriel sulo togagi venue a Kalili a henagi Nasaret

²⁷lawe na matavono u mesinge beno mena tangaloi a henana Josev, dena duvi Devet a Ratahigi. A henai matavono hi i Meri.

²⁸A engsel hi mo himei lobena ko mo veve vena, “A tamwata na toga meigo! A Huqe nge meigo, ko u lologarea garagara ginigo!”

²⁹I Meri mo romasi garagara gena leo nona engsel, ko mo ladolado huri ve a nona leo a iloilogi mwerehilogo.

³⁰A engsel mo veve lawea vena, “Gon mese matagu, Meri, huri God u lolo garea ginigo.”

³¹Leo, goin tinogi na maresu ko goin bavae a maresu mwera, ko goin waregi na henana i Jisas.

³²Ingeie vin voragi na tangaloi lawua ko vin warea ve i Netui God u hahale garagara. A Huqe i God vin bete na tantanoi ratahigi noi tubune Devet lawea,

³³ko ingeie vin ratahigi goro na duvi Jekob vin tuei; a nona Ute vin he rovo lai tea!”

³⁴I Meri mo veve lawe na engsel vena, “Ineu a matavono. A gineu ngaha vin vei mwerehilogo?”

³⁵A engsel mo duvi lawea vena, “A Vui Gogona vin himei lumu, ko a managi noi God vin melumelu gorogo. Giniehi, rain ware na maresu ngaha u gogona, i Netui God.

³⁶Ko leo, i havamu Elisabet, nge u tubui beno, ve vin he bava na maresu tea; nge siseri ngaha nge mo tino, a vulana gaiono beno.

³⁷Huri hate gineu gatagale ve i God vin vei samwegi ginie.”

³⁸I Meri mo veve vena, “Ineu a tangaloi tabanagi nona Huqe; na eno laweau mwerehi gu veve.” Ko a engsel mo vano denie.

³⁹Siserigi lo tagugi i Meri mo maraga ko mo hage siseri lo vusi lo togagi venue gatagale a Judia.

⁴⁰Mo vano sulolo valei Sekaraea me mo garigerigi Elisabet.

⁴¹Lo taro hi Elisabet mo rongo Meri mo garigeriginie, a maresu mo gilu lolo taqangine. Elisabet u horo gena Vui Gogona,

⁴²mo gato gina dilogi u lawua vena, “God u veigareaginigo liu na vavine doluegi! Ko mo vaigareagi na maresu hi goin bavae!

⁴³?Huri hava gineu mo vai laweau mwere ngaha, huri a retahi noku Huqe mo vomai mo siroau?

⁴⁴Huri siseri hi nau rongogo gom garigerigieu, a maresu mo gilu mena havuhevu lolo taqangiku.

⁴⁵Havuhevu meigo gom ladohogo huri ve a leo nona Huqe vin vomai hogo lawego!”

⁴⁶I Meri mo veve vena, “A tarabesiku mo waregareagi na Huqe;

⁴⁷a domiku mo hevuhevu huri God i Vagamwasoieu,

⁴⁸huri nge u lehieu, a nona tangaloi tabanagi nau ladobitigieu. Mo tauvuigi bagataha a sinobu doluegi rain wareau ve ineu a vavine vaigarea,

⁴⁹huri na gineu lalawua i God managi u veire hurieu; Ko a henana u gogona;

⁵⁰ingeie mo hagavire ngerehi ram ladomavaginie lo vataha tarogi vin he rovo lai tea.

⁵¹Nge mo vei na managi gena limana ko mo livu vohogi na sinobu ngerehi rau sagesagera lolo domire.

⁵²Ingeie mo reve surire ratahigi dena tanora, ko mo tabe hagagi na tangaloi ngerehi rau ladobitiginire.

⁵³Mo vangani na tangaloi rau mweruruhi gena gineu garea, ko mo hora vohoginire mwerai homu.

⁵⁴Ingeie mo buluire Israel, a nona tangaloi tabanagi. Nge u ladobibi a nona hahagavi,

⁵⁵Ingeie u lado taligu ve vin hagavi Ebraham ko lawera duvine doluegi vin tueie.”

⁵⁶I Meri u toga vule gaitolu lobei Elisabet, siu mo mule taligu lo valena.

⁵⁷A tarogi mo vomai huri Elisabet ve vin bava netune, mo vora maresu mwera.

⁵⁸Ngere talo vanuana meire havana ram rongo huri ve a Huqe u veigarea garagara ginie, ko ingere doluegi ram havuhevu meie.

⁵⁹Lune a rani gaibitu u rovo ingere ram vomai huri ve ran teve gigileginie, ram suri na henana i Sekaraea, mo huri na henai tamana.

⁶⁰Nge i ratahine mo veve vena, “Hatie! Nge a henana i Jon.”

⁶¹Nere ram veve lawea vena, “Nge hate tangaloi gatagale den nomu havahava u lei na hea hi!”

⁶²Mo rovo ram vai na gigilegi lawe tamana, ram huie vena, “?Gom tarani na hava hea ve goin ware na maresu ginie?”

⁶³I Sekaraea mo huire huri na pepa ko mo reve vena, “A henana i Jon.” Ingere doluegi ram garigi garagara.

⁶⁴Siserigi hi i Sekaraea mo gato taligu, ko mo tauvuigi mo waregareagi God.

⁶⁵Ngere talo vanuana doluegi ram matagu garagara, ko a roro huri na gineu ingere ngaha mo vano lategi lolo togagi venue doluegi lo vusi Judia.

⁶⁶Ngere doluegi hi rau rongo huri na roro ngaha ran hakobibie lolo taqangire ko ram hui vena, “?A maresu ngaha vin vei na hava gineu?” Huri a limei God mo malumelu goroe.

⁶⁷I tamana Sekaraea u horo gena Vui Gogona ko u veve rarai vena,

⁶⁸“Igide da waregareagi na Huqe, i God nora Israel! U vomai vena siro na nona sinobu ko vena vaire rain mwelue den nora toga vau.

⁶⁹Ko mo ragasi na Vagamwasoi lawe gide, talo duvi Devet, nona tangaloi tabanagi.

⁷⁰Mwerehi u warataugi teu lure tangaloi ligoligogi ta tuei,

⁷¹Ingeie u waratau ve vin vagamwasoi gide dena noda tavului vuro, ko dena huireana noi rahine doluegi ram leomasi gide.

⁷²U veve vage ve vin haharagi na hahagavi lawe re tubude, ko ve vin ladobibi na nona waratau u gogona tau tuei.

⁷³Ngehi a waratau nge u veve tau lawe tubude Ebraham tuei,

⁷⁴ve vin lei gide dena noda tavului vuro. Nge u vei mwerehi ve dain tabanagi lei lawea, hatie gena matagute,

⁷⁵ve dain toga gogona, toga vovohoi lo nagona vataha bongide lo mwasoada.

⁷⁶“Iniko, netuku, rain warego ve iniko a tangaloi ligoligogi gogona noi God u hahale garagara. Iniko goin vano tomuegi na Huqe ve goin vei rarai na matahala hurie.

⁷⁷Goin veve lawe na nona sinobu ran ilo huri ve God vin vagamwasoire, giniehi, nge vin ladovohogi na nora galegaleasi.

⁷⁸A noda God u hahagavi ko u veigarea; nge vin vei na aho ta eulu vin kalo vin varavara lo ulude,

⁷⁹ko vena leleo haginire ram toga lolo dodogi ko lolo malumelu mateana, ko vena tomuegi gide sulo matahalai tamwata.”

⁸⁰A maresu mo sesea ko mo huire lo betune ko lo domine. U toga lolo vanue vurogi mo dadari lo tarogi nge vin labe lue sibona lawera sinobu a duvi Israel.