Read East Ambae LUK 13 Bible Online

LUK 13 - East Ambae bible

LUK 13

¹Lo tarogi hi a sinobu lavasigi ingere aiehi, ram veve lawe Jisas hurire ta Kalili hi i Baelat u wehire lune ingere rau hako hage na rugurugu lawe God.

²I Jisas mo duvi lawera vena, “?Wa nem lado huri ve ira ta Kalili hi rau galegaleasi liu denire ta Kalili lavasigi vage a vevenagi rau mate mwerehi?

³Nam veve lawe gimiu ve hatie. Nge tare ve gimiu ne he ladowenigi tea dena bugumiu, gimiu doluegi nein mate vage mwerehi.

⁴?Nge ngerehi hangavulu domwagi gaiwelu rau mate lune a vale hahale u soi talure a Saeloam, nem lado huri ve ngerehi rau galegaleasi liu denire tangaloi lavasigi vage ram toga a Jerusalem?

⁵Nam veve lawe gimiu ve hatie. Nge tare ve gimiu ne he ladowenigi tea dena bugumiu, gimiu doluegi nein mate vage mwereire.”

⁶Siu i Jisas mo veve lawera lo gato tavalu ngaha vena, “A tangaloi gatagale a bulana duledule lolo talune. Nge mo vano mo hikesi na mwasigi lune, nge he haqea tea.

⁷Siu nge mo veve lawe na tangaloi tabanagi lo talu vena, ‘Leo, a higao gaitoligi ngaha nau vomai nam hikesi na mwasigi lo vui duledule ngaha, nge nahe haqea te vohogi. Gon tai vohoginie. ?Huri havai mo labelabe vurogi lolo tano ngaha?

⁸Nge a tangaloi tabanagi lo talu mo duvi vena, ‘Huqe, gon sireginie na labe huri higao gatagale vage. Nain geli dalie, ko nain teu na vagalobu lo vuigi.

⁹Siu, tare ve vin teu mwasigi lo higao tuegi, garea. Tare ve hatie, gom tai vohoginie.’ ”

¹⁰Lo Rani Mangaana gatagale i Jisas mo huhui lo valei soneana.

¹¹Aiehi a vavine a vui esi u veie mo sege huri higao hangavulu domwagi gaiwelu. A gaherena u tagege, he vovohoi lai tea.

¹²Lune i Jisas mo lehe, mo warea vena, “Vavine, gon vano tabetabegi dena gamu segeana hi.”

¹³Nge mo tau na limana lune, ko siserigi a vavine hi mo vovohoi ginie sibona, mo waregareagi God.

¹⁴A tangaloi lawua goro na valei soneana mo mero huri Jisas mo vai vagamwasoi lo Rani Mangaana, ko mo laqa lawera sinobu vena, “A rani gaionogi huri ve dain tabana lolona, nge nen vomai lolo rani ngerehi vena vai vagamwasoi gimiu, nge hatie lo Rani Mangaana.”

¹⁵A Huqe mo duvie vena, “Gimiu ira kaligoro! Igimiu doluegi hi nem riqesi na bulemiu bulugi sige a bulemiu dongki dena arara ko nem laire vano nem bete wai lawera lo Rani Mangaana.

¹⁶?Nge a vavine hi, a duvi Ebraham, i Satan u veuhie huri na higao hangavulu domwagi gaiwelu, siu igimiu nehe lado tea ve u garea ve vin riqe vohogi na gana segeana lo rani mangaana?

¹⁷Lune mo veve mwerehi, ira nona tavului vuro ram maemae, ko a sinobu ram havuhevu huri vataha na lalakogi garea nge u veie.

¹⁸I Jisas mo hui vena, “?A mwasoana garaqa God mo ratahigi lolona u mwerehilogo? ?Nain mata-mwasaraginie lo hava gato tavalu?

¹⁹U mwere na toli baka, a tangaloi mo laie mo rivue hivo lolo talune. Mo mauri, mo voragi na gai lawua ko a manu ram tau na mwagunire lolo rangagi.”

²⁰I Jisas mo hui vage vena, “?Nai matamwasaragi na mwasoana garaqa God mo ratahigi lolona lo hava gato tavalu?

²¹U mwere na isi. A vavine mo laie ko mo kae bubuginie mena flaoa, vin dadari lune vin vuge doluegi.”

²²I Jisas mo dige turu na qatui venue ko a togagi venue ngerehi mo huhui na sinobu, ko mo dige huri na vanue Jerusalem.

²³A tangaloi gatagale mo huie vena, “?Huqe, wa a buri sinobu biti hogosie rain mwaso?” I Jisas mo duvi lawera vena,

²⁴“Nen vai leo ve nen ahu turu na matai ara biti, huri nam veve lawe gimiu ve a tangaloi sao rain vei leo ve ran ahu aie nge rain he vai lei tea.

²⁵A huqei vale vin maraga vin gorogoro na mataivale. Siu nein labe varea, nein teuvuigi ve nein dingdingi lo mataivale hi, nein veve vena, ‘Huqe, gon waga na mataivale lawe gamai.’ Ko nge vin duvi lawe gimiu vena, ‘Nahe ilo gimiu tea, ve nem vomai logo.’

²⁶Siu igimiu nein duvi taligu vena, ‘Dau gagani ko dau inuinu bubugi, gu huhui lolo togagi vanuemai.’

²⁷Nge ingeie vin veve taligu vena, ‘Nahe ilo gimiu tea, ve nem vomai logo. Gimiu doluegi ira galegaleasi. Nen vano denieu.’

²⁸Igimiu nein ngara, ko nein gasigesigi na livomiu, lune nein lehi Ebraham, Aesak ko i Jekob, ko ira tangaloi ligoligogi doluegi ram toga lo mwasoana garaqa God mo ratahigi lolona, nge I ingeie vin tuli vohogi gimiu tavarea.

²⁹A sinobu rain vomai den vanue a matainaho mo kalo aie ko den vanue a matainaho mo roro aie ko den tavului venue ko a tavului venue, ko rain toga hivo huri na gaganie lo mwasoana garaqa God mo ratahigi lolona.

³⁰Siu ingere ram tu tagu siseri ngaha rain tomue, ko ingere ram tomue siseri ngaha rain tu tagu.”

³¹Lo tarogi hi ira Varise lavasigi ram vomai lobei Jisas, ram veve lawea vena, “Gon mwalue den tangaha, ko gon vano te tahilogo, huri i Herot mo tarani vena wehigo.”

³²I Jisas mo duvi lawera vena: Nein vano nein veve lawe na wiriu turu he vena, “Ineu nam vuro lue na vui esi ko nam vagamwasoi ra segesege bagataha ko mavugo, nge lo rani gaitoligi nain vei rovonagi na noku lalakogi.”

³³Nge mo eno laweau ve nan dige bagataha ko mavugo ko waihe. He tatarise tea ve rain wehi na tangaloi ligoligogi lowoute, nge hogosie a Jerusalem.

³⁴“Jerusalem, Jerusalem! Gimiu nem wehire tangaloi ligoligogi ko nem buguri na tangaloi hora noi God u horara vomai! Nau tarani vagasaosao ve nain koko goro gimiu mwere na toa mo vagalugugi ra netune lo vavai bainhine, ko gimiu nehe tarani tea.

³⁵Nge siseri ngaha a vanuemiu vin eno vurogi. Nam veve lawe gimiu vena, gimiu nein he lehieu tea vin dadari lo tarogi nein veve vena, ‘Waregarea ihine mo vomai lo henai Huqe.’ ”