Read East Ambae LUK 16 Bible Online

LUK 16 - East Ambae bible

LUK 16

¹Jisas mo veve lawe na nona rorongtagi vena, “A tangaloi ratahigi gatagale a nona tangaloi lune mo leogoro na nona tabana, ko a leo mo vomai lawe na ratahigi hi vena a tangaloi leogoro tabanagi hi mo hako vurogi na homu noi nona ratahigi.

²Siu a ratahigi hi mo warea talolo vale ko mo veve lawea vena, ‘?A hava leo ngaha nam rongoe hurigo? Goin haharagi na reve revei gineu doluegi ngehi gu veire lo noku hako gineu, huri goin he hakovi na tabana ngaha tea taligu, ngehi gom leogoro na noku hako gineu.’

³Lolo domine i leogoro tabanagi mo domigi vena, ‘A noku ratahigi vin tulieu dena noku tabana. ?Nai vei mwerehilogo? Na he tatarise tea ve nai vano nai geli na tano, ko nam maemae ve nai vano nai nevu na homu dena tangaloi.

⁴A, nau lado na turegigi ve nai vei mwerehilogo. Nai vei buluana meire tangaloi lavasigi. Siu lune a noku tabanagi vin rovo, rai leieu talolo valera.’

⁵“Mo ware rahine rau bugue dena nona ratahigi ve rau vomai lobena. Mo veve lawe na muegi hi vena, ‘?A havai hi gu bugue dena noku ratahigi?’

⁶A tangaloi hi mo duvi vena, ‘Ineu nau bugue lo oelei hinaga kalon vudolue vagawelu.’ A tangaloi leogoro tabanagi hi mo veve lawea vena, ‘A reve reve bugumu hi nge ngaha. Gon toga gon uli hivo vena a kalon ngavulu gailime hogosie.’

⁷I leogoro tabanagi mo huie tuegi vena, ‘?Iniko gu bugue lo havai?’ A tangaloi hi mo duvi vena, ‘Ineu nau bugue lo bagi wit teri vagatagale.’ I leogoro tabanagi hi mo bete na reve reve bugune lawea, mo veve vena, ‘Gon uli vena a bagi vudolue vagawelu hogosie.’

⁸Ko a ratahigi hi mo vevegareagi na nona tangaloi leogoro tabanagi hi huri u mataisao lo nona tabana he vovohoi tea. Huri a tangaloi tabanagi talo ure ram vai na tabanagi lo ure rau mataisao liu dena tangaloi talo leleo.”

⁹Ineu nam veve lawe gimiu vena, “nen vai buluana lawe gimiu sibomiu lo vivilakogi talo ure, huri tare nem vagasile, rain lei vurugegi gimiu sulolo togagi venue hi vin eno vagi tuei

¹⁰Ihine hi a nona tanoi leogoro u garea lo tabanagi u biti, a nona tanoi leogoro vin garea vage lo tabanagi u lawua. Ko ihine hi a nona tanoi leogoro he vovohoi tea lo tabanagi u biti, a nona tanoi leogoro vin he vovohoi tea lo tabanagi u lawua.

¹¹Tare ve a nomiu tanoi leogoro ra he garea tea lo hako gineu neu leire lo matahala rahe vovohoi tea, rain he siregi lei tea lawe gimiu ve nein leogoro na hako gineu hogo.

¹²Tare ve nehe vovohoi tea lune neu leogoro na hako gineu noi hine wagineu, rain he bete tea lawe gimiu ngehi a nomiu sibomiu.

¹³“Ihine tea vin he tabana lai tea lawe na ratahigi gairue. Huri ve vin ve asiesiginie tuegi ko vin tabea tuegi, vin leilei hage ginie tuegi ko vin vei hivohivo ginie tuegi. Nein he tabana lai tea lawe God ko a mane vagatagale.”

¹⁴Lune ira Varise lavasigi ram rongo na leo huhui hi noi Jisas, ko ram mavaginie, a vevenagi rau tabe na mane.

¹⁵I Jisas mo veve lawera vena, “Gimiu hi nem vai gimiu ve neu vovohoi lo nagora tangaloi, nge i God u ilo na lolo lolomiu. Huri a gineu ngerehi a tangaloi ram lado huri ve rau mava lo nagoi tangaloi, nge lo nagoi God rai mava tea.

¹⁶“A Leo hora noi Mosis ko a revereve nora tangaloi ligoligogi rau eno mo dadari lo taroi Jon Garuhigogona. Nge siseri ngaha lo tagugi hi u veve sere na Roro Garea huri ve God mo ratahigi ko vataha tangaloi ram vui tuitui ve rain ahu lolo ute God mo ratahigi aie.

¹⁷“Nge u huire ve a mahava ko a tano ve roin sala, nge u huire liu ve a leo gatagale dena Leo hora ve vin sala.

¹⁸“Tare ve a mwera gatagale mo hora vohogi gahorana, siu mo vano mo lagi mena vavine wagineu, nge mo vai na galegaleasi lo bakabaka. Vage tare ve a mwera mo vano mo lagi na vavine ngehi i tamai netune u sireginie beno, a mwera hi mo vai na galegaleasi lo bakabaka.

¹⁹“A tangaloi ratahigi gatagale mo luqegi na luqana rau garea liu, ko a gana hinaga rau garea liu vage.

²⁰A tangaloi mahogi gatagale a henana i Lasarus a betune u tugi voha, ram laie vataha bongi vomai lo matai valei ratahigi hi,

²¹huri ve vin geni na mavusuvusui hinaga hi ram soi dena tanoi gaganie nona ratahigi. Ko vage a wiriu ram vomai ram meloi na vohana.

²²Siu a tangaloi mahogi hi mo mate ko a engsel ram walie hage ram taue lo mwarasai Ebraham lo eulu. A tangaloi ratahigi hi mo mate vage ko ram tuleginie.

²³Ko ingeie mo vano lo tanora tamate mo rongo gagarasi aie, ko mo leo hage lobei Ebraham vagahao tona Lasarus lo mwarasana.

²⁴Ko mo ware vena, ‘Mama Ebraham! Gon leo hagavieu ko gon hora Lasarus na diri na bisune lolo wai ko na vui na meaku, huri ineu nam rongo gagarasi lolo avi ngaha.

²⁵“Nge i Ebraham mo veve vena, ‘Netuku, goin ladohaqe ve gu hakovi na gineu gagarea u sao lo mwasoamu, nge i Lasarus u toga lo gagarasi. Nge siseri ngaha nge mo rong garea tangaha, nge iniko gom rongo gagarasi.

²⁶Ko vage, a walu bue beno lolo livugada, siu, den gamai gatagale mo tarani ve vin vanatu lobemiu, vin he vai lei tea, sige den gimiu gatagale mo tarani ve vin vomai lobemai, vin he vai lei tea.’

²⁷A tangaloi ratahigi mo veve vena, ‘U garea, mama Ebraham, nge nam veve lawego, gon hora Lasarus sulo valei tamaku.

²⁸Aiehi i retueku ingere gailime. Gon sireginie na vano ko na veve siaga lawera, ve ingere vage rain mese vomai tangaha lo tanoi gagarasi ngaha.

²⁹“I Ebraham mo duvi vena, ‘I retuemu rau hakovi na revereve noi Mosis ko ira tangaloi ligoligogi. U garea ve rain rorongtagi na leora.’

³⁰A tangaloi ratahigi mo veve vena, ‘Ngehi he tatarise tea, mama Ebraham! Nge tare ve ihine te gatagale vin maraga dena mateana ko vin vano taligu lobera, aiehi rain ladowenigi dena nora galegaleasi.’

³¹Nge i Ebraham mo veve vena, ‘Tare ve rahe rorongtagi Mosis ko ira tangaloi ligoligogi tea, rain he ladohogo tea vage gina tangaloi hi vin maraga taligu dena mateana.’ ”