Read East Ambae LUK 18 Bible Online

LUK 18 - East Ambae bible

LUK 18

¹Siu i Jisas mo veve na gato tavalu ngaha lawera, mo huhuire ve rain tataro gesegi ko rain mese wiriwiri.

²“Lolo togagi venue gatagale a tangaloi vevegi mo toga aiehi he matagu tea gi God ko he ladomava ginire tangaloi tea.

³A vavine madue gatagale mo toga lolo vanue hi. Gesegi mo vomai lobena tangaloi vevegi hi, mo navuhie vena vovohoigi na nona romasi mena nona tavului vuro.

⁴Vagasaosao a tangaloi vevegi hi he masinge tea, nge vagasigi mo domigi lolo domine vena, ‘A hogo, nahe matagu tea gi God sige na he ladomava ginire tangaloi tea,

⁵tau nain vovohoigi na romasi nona vavine madue hi, huri gesegi mo vomai mo serieu gina leona. Tare ve hatie, a vavine hi vin vanai ta mwere ko lo vagasigi vin ve wiriwirigieu.’ ”

⁶Ko a Huqe mo veve vena, “Nen lado na leoi tangaloi vevegi hi he vovohoi tea.

⁷?Nge wuraha huri God? ?Tare ve ira nona sinobu hi u leo wahera ram warea lolo rani ko lolo bongi, nem lado huri ve vin he vovohoigi na nora romasi tea? ?Sige nem lado huri ve vin ribi lawagi?

⁸Nam veve lawe gimiu vena i God vin vovohoigi na nora romasi, ko vin veie siseri. ?Nge ve ineu i Netui Tangaloi nain vomai taligu lo ure, nain haqe na tangaloi lavasigi ram lado hogogieu sige hatie?”

⁹I Jisas mo veve na gato tavalu vage lawera tangaloi hi rau ladohogo u siaga ve a doridorire rau vovohoi, ko ram leoleo hivoginire tangaloi wagineu.

¹⁰Mo veve vena, “A tangaloi gairue rom vano lolo valei tataro ve ron tataro. Tuegi nge a Varise ko tuegi nge a tangaloi vilevile takis.

¹¹“A Varise hi mo labe ko mo tataro rorongo lolo domine, mo veve vena, ‘God, nam waregareaginigo, huri ineu nahe mwere ire tangaloi wagineu tea. Nahe vai huri tea vai gineu nora tangaloi wagineu. Nahe vai na gineu esi tea ko na he galegaleasi tea lo vavine. Ko vage nam waregareaginigo huri ineu na he mwere na tangaloi vilevile takis ngaha tea.

¹²Neu nam gologolo vagarue lo wik gatagale, ko nam bete lawego a hangavulugi den noku hako gineu doluegi.’

¹³“Nge a tangaloi vilevile takis mo labe vagahao, he leo te hage eulu, nge mo vosa na mabune ko mo veve vena, ‘E, God, gon hagavieu, huri ineu a tangaloi galegaleasi!’ ”

¹⁴Siu i Jisas mo veve vena, “Nam veve lawe gimiu vena, a tangaloi hi mo mule taligu lo valena nge u vovohoi lo nagoi God, nge a tangaloi tuegi he vovohoi tea lo nagoi God. Huri ihine mo lado hageginie sibona God vin vei wuweuginie, ko ihine mo lado wuweuginie sibona God vin vei hageginie.”

¹⁵A tangaloi lavasigi ram lai na maresu wuwerigi lawe Jisas vena tango lure. Lune nona rorongtagi ram leo mwerehi, ram tara gorora.

¹⁶Nge i Jisas mo warera maresu wuwerigi hi vomai lobena, ko mo veve vena, “Nen siregi ira maresu ve ran vomai lobeku, ko nge mese vai gorora, huri a tangaloi a doridorire u mwere na maresu biti God mo voragi nora Ratahigi beno.

¹⁷A hogo, nam veve lawe gimiu vena, ihine he lai tea na mwasoana garaqa God mo ratahigi lolona mwere na maresu biti vin he ahu lai tea lolona.”

¹⁸A tangaloi lawua nora a duvi Israel gatagale mo hui Jisas vena, “?Huhui garea, nain vei vahavagi huri ve nain lei na mwasoana radu?”

¹⁹I Jisas mo veve lawea vena, “?Huri havai gom wareau ve nau garea? Ihine tea he garea tea, nge i God hogosie.

²⁰Gu ilo na Leo hora: ‘Gon mese vagasile lo vavine, gon mese ue tangaloi, gon mese balubelu, gon mese tawei vurogi, gon ladomavagi tamamu ko i ratahimu.’ ”

²¹Nge mo duvi lawea vena, “Nau tabe na Leo hora ingere ngaha doluegi lo mahogi nau maresu mo dadari siseri ngaha.”

²²Lune Jisas mo rongoe, mo veve lawea vena, “Gom qilodo lo gineu gatagale mosigei. Gon sogagi vohogi na nomu lalaie teri, gon bete na mane lawera mahogi, ko goin haqe na lalaie lo eulu. Siu gon vomai gon hurieu.”

²³Lune nge mo rongo na leo hi, mo tauvuigi mo hahagavi, huri nona lalaie u sao.

²⁴I Jisas mo lehe mo veve vena, “Ei, u gona garagara hurire tagi hako gineu ve rain ehu lolo mwasoana garaqa God mo ratahigi lolona.

²⁵U matamwasara huri ve a bulugi vin ehu turu na matai nitil dena tagi hako gineu vin ehu lolo mwasoana garaqa God mo ratahigi lolona.”

²⁶Irahine rau rongo na leo ngaha ram veve vena, “?Nge siu ihine vin mwaso lai?”

²⁷I Jisas mo duvi vena, “A hava gineu u gona meire tangaloi, nge he gona tea mei God.”

²⁸Vunu Bita mo veve vena, “Leo, gamai gau siregi na tanomai ko gam hurigo.”

²⁹I Jisas mo veve lawera vena, “A hogo, nam veve lawe gimiu vena, ihine tea vin siregi na valena sige i gahorana sige ire tuana sige i ratahine mei tamana sige ire netune huri ve God vin voragi Ratahigi goro na tangaloi doluegi,

³⁰ngehi vin lei vagasaosao lolo taro ngaha ko a mwasoana radu lolo taro vin vomai.”

³¹I Jisas mo lai beraginire rorongtagi hangavulu domwagi gairue ko mo veve lawera vena, Leo, dam hage Jerusalem. Aiehi vin vagahorongi na gineu doluegi a tangaloi ligoligogi rau reve hurieu i Netui Tangaloi.

³²Rain siregieu lawera haroharo ko ingere rain sovueu, rain veve asiesigieu, rain lodosieu,

³³rain taligu ko rain vei vagamateau, nge lo rani gaitoligi nain maraga taligu sulo mwasoana.”

³⁴Ira rorongtagi rahe ilo vurugegi na gineu ingere ngaha tea, a iloiloi leo mo hili denire, ko ra he ilo tea vurugegi huri na hava gineu hi i Jisas mo laqaginire.

³⁵I Jisas mo vomai kakarani lobei na vanue Jeriko, ko a tangaloi matadodo gatagale mo toga lo mwararai turegi mo navunevu.

³⁶Lune mo rongo na tangaloi sao ram dige kakarani lobena, mo huire vena, “?A hava gineu ngaha?”

³⁷Ram veve lawea vena, “I Jisas ta Nasaret mo dige.”

³⁸Nge mo ulo siaga vena, “Jisas! Netui Devet! Gon hagavieu!”

³⁹A sinobu lavasigi ram labe lo nagona ram gato goroe vena toga rorongo. Nge mo ulo siaga den tomue vena, “Netui Devet! Gon hagavieu!”

⁴⁰Siu i Jisas mo labe, mo veve lawera huri ve ran lai na matadodo hi na vomai lobena. Lune mo vomai kakarani, i Jisas mo huie vena,

⁴¹“?Gom taranieu ve nain vei na hava gineu lawego?” Mo duvi vena, “Huqe, nam tarani ve nain leo taligu.”

⁴²Siu i Jisas mo veve lawea vena, “Gon leo taligu! Nomu ladohogo mo vagamwasoigo.”

⁴³Ko siserigi nge mo leo taligu, mo huri Jisas, ko mo vevegareagi God. Lune a sinobu hi ram lehe, ingere doluegi ram waregareagi God.