Read East Ambae LUK 19 Bible Online

LUK 19 - East Ambae bible

LUK 19

¹I Jisas mo dadari Jeriko, ko mo vano tuturedu.

²Aiehi a tangaloi gatagale nge a muei tangaloi vilevile takis, ko ingeie a mwerai homu, a henana i Sakeus.

³Mo tarani garagara vena lehi Jisas, ve nge a hava tangaloi. Nge ingeie mo vai samwegi vena lehi Jisas huri a sinobu ram labe goroe ko vage huri nge a tangaloi qilodo.

⁴Siu mo toa tomue mo vano mo kalo lo gai gatagale a henagi sikamo, huri ve vin leo lai Jisas lune nge vin vano lo turegi hi.

⁵Lune i Jisas mo dadari aiehi, mo dada sueulu, mo veve lawe Sakeus vena, “Sakeus, gon hivo vuine siseri, huri nain toga lo valemu gaqarigi.”

⁶I Sakeus mo hivo siseri vuine, mo lai Jisas gina havuhevu rom vano lo valena.

⁷Lune a sinobu ram lehe mwerehi, ram tavuigi ram singotutubugi Jisas vena, “Nge mo vano ve vin toga lo valei tangaloi galegaleasi hi.”

⁸Siu i Sakeus mo maraga mo labe, mo veve lawe na Huqe vena, “Huqe, gom rongo. Nain bete na duvi noku hako gineu lawera tangaloi mahogi, ko tare ve nau keli nam balu na hako gineu noi hine tea, nain voli taliguginie lawea vagavesi lo ulugi.”

⁹I Jisas mo veve lawea vena, “Gaqarigi i God mo vagamwasoi na tangaloi doluegi lolo vale ngaha, huri a tangaloi naha vage nge talo duvi Ebraham.

¹⁰Huri ineu i Netui Tanaloi nau vomai ve nain hikesire tangaloi ngerehi rau sala ko nain vagamwasoire.

¹¹Lune a sinobu ram rorongtagi Jisas, nge mo laqa tuturedu na gato tavalu ngaha lawera. Siserigi ngaha nge mo kakarani lobei vanue Jerusalem, ko ram lado ve a mwasoana garaqa God mo ratahigi lolona vin serelue siserigi.

¹²Siu i Jisas mo veve vena, “A tangaloi lawua gatagale vin vano lo vanue vagahao ve vin voragi ratahigi talo vanuana. Siu vin mule taligu lo tanona.

¹³Gitomue siu vin vano, mo ware na nona tangaloi tabanagi ingere hangavulu ko mo bete na homu hi a kol vatavatahaginire ko mo veve lawera vena, ‘Nen tabana lo mane ngaha ko nein vai leo nge nein haqe na semsemegi lune, vin dadari lune nain mule taligu.’

¹⁴Nge a tangaloi talo vanuana ram lolo asiginie, siu ram hora na gaihora lo tagune huri ve ran veve vena, ‘Gamai gahe tarani na tangaloi ngaha tea ve vin voragi na nomai ratahigi.

¹⁵“A tangaloi lawua hi u voragi ratahigi ko u mule taligu. Siserigi mo warera na nona tangaloi tabanagi ve ran vomai lobena huri ve na haqe na semsemei homu hi rau tabana lune.

¹⁶A muegi mo vomai mo veve vena, ‘Huqe, nau haqe na homu hi a kol hangavulu tameie gatagale hi gu bete laweau.’

¹⁷A ratahigi hi mo veve vena, ‘U garea liu, iniko a tangaloi tabanagi a hui garea! Gu hui garea lo gineu biti, nge nain teugo goin leogoro na qatui venue hangavulu.’

¹⁸A tangaloi tabanagi tuegi mo vomai ko mo veve vena, ‘Huqe, nau haqe na homu hi a kol gailime tameie gatagale hi gu bete laweau.’

¹⁹Nge mo veve lawea vena, ‘Nain teugo goin leogoro na qatui venue gailime.’

²⁰“A tangaloi tabanagi vage mo vomai ko mo veve vena, ‘Huqe, a nomu homu hi a kol nge ngaha. Nau luqe vuniginie lolo mavusui galego.

²¹Nau matagu ginigo, huri a domimu u huire. Gom lai na hava gineu ngehi hate nomu, ko gom lai na mwasigi hi iniko go he rivu tea.’

²²Nge mo veve lawea vena, ‘Iniko a tangaloi tabanagi gu esi! Nain veveginigo gina nomu leo sibomu. Gu iloau huri a domiku u huire, nam lai na hava gineu ngehi hate noku ko nam lai na mwasigi hi na he rivu tea.

²³?Huri havagi go he tau na noku homu tea lolo bangki, huri nain leie mena semsemegi lune nain mule?’

²⁴“Siu mo veve lawera tangaloi ngerehi ram labe taie vena, ‘Nen lai vohogi na homu hi a kol denie ko nen bete lawe na tangaloi tabanagi hi a nona homu hangavulu.’

²⁵Nge ram veve lawea vena, ‘Huqe, ingeie a nona homu hangavulu beno!’

²⁶Mo duvi vena, ‘Nam veve lawe gimiu vena, ihine mo lai, vin bete lawea vage. Nge ihine he lai tea, vin lei vohogi nona lalaie denie.

²⁷Nge irahine hi a noku tavului vuro rahe taranieu tea ve nain voragi na nora ratahigi, nen laire vomai tangaha ko nen wehire lolo nagoku.’ ”

²⁸I Jisas mo veve ngaha, vunu mo vano tuturedu sulo vanue Jerusalem.

²⁹Mo vomai kakarani a Betvas ko a Betani sulo Vusi Oliv. Siu mo hora na nona rorongtagi gairue gitomue,

³⁰mo veve lawera vena, “Neri vano lo togagi venue vantahi, ko lune neri ehu lolona, neri haqe na natui as rau ligo bibie, a tangaloi he toga te tau lo ulune. Neri torosie, neri leie vomai.

³¹Tare ve ihine vin veve lawe gimiru vena, ‘?Huri hava gineu nero mo torosie?’ Neri veve lawea vena, ‘A Huqe mo taranie garagara ginie.’ ”

³²Rom vano rom haqe na gineu doluegi mwere i Jisas u veve lawera.

³³Lune rom toro na natui as hi, a tangaloi a bulara as hi ram veve vena, “?Ei, nerum toro na as hi huri havai?”

³⁴Siu rom duvi vena, “A Huqe mo taranie garagara ginie.”

³⁵Siu rom lai na natui as vomai lawe Jisas. Vunu ram vugeri na luqara loului gaiherena, ko ram bului Jisas vena toga lo ulune.

³⁶Lune mo dige, a tangaloi u sao ram vugeri na luqara lo turegi.

³⁷Lune nge mo vomai kakarani lo vanue Jerusalem, lo turegi mo hivo lo Vusi Oliv a buri nona rorongtagi ram havuhevu ko ram waregareagi God gina dilo siaga huri na vaigivui ngerehi rau lehire,

³⁸ram veve vena, “Waregareagi na Ratahigi mo vomai lo henai Huqe! A tamwata lo eulu ko a roroa lobei God!”

³⁹Siu ingere Varise lavasigi meire sinobu ram veve lawe Jisas vena, “Huhui, gon suri na nomu rorongtagi ran rorogo.”

⁴⁰Nge i Jisas mo duvi vena, “Nam veve lawe gimiu, tare ve ingere rain rorogo, mwerehi a vatu sibora rain teuvuigi ram ulo.”

⁴¹Lune i Jisas mo vomai kakarani lo vanue hi, nge mo leo vano lo ulugi, mo ngara hurie,

⁴²mo veve vena, “E, tare ve gaqarigi gu ilo vurugegi na turegi huri na tamwata! Nge siserigi ngaha goin he leo lai tea!

⁴³Nge a tarogi vin vomai, a nomiu tavului vuro rain labe ko rain hakovi na ara vatu dali bulu goro gimiu ko rain tugoro gimiu lo mahogi doluegi.

⁴⁴Rain toto gabureginigo meire netumu lolo lolomu. Rain he siregi tea na vatu gatagale ve vin toga lo ulugi tuegi, huri go he ilo tea na tarogi hi ve i God u vomai ve vin sirogo.”

⁴⁵Siu i Jisas mo ahu lolo Sara Gogona, ko mo tauvuigi mo vuro lue ingere hi ram sosogagi lolona,

⁴⁶mo veve lawera vena, “U reve beno lo Reve reve Gogona ve i God u veve vena, ‘A valeku vin waregi ve a valei tataro.’ Nge gimiu nem vaie mo voragi malangai belu.”

⁴⁷Vataha rani Jisas mo huhui lolo Sara Gogona. Ira muei rugurugu meire huhui talo Leo hora noi Mosis ko ira tomtomuegi nora sinobu ram tarani ve ran wehe.

⁴⁸Nge rahe haqe lai na turegi tea huri vataha tarogi ingere sinobu ram ragahui ve ran rorongtaginie, rahe tarani tea ve rain vagasalagi na nona leo te gatagale.