Read East Ambae LUK 20 Bible Online

LUK 20 - East Ambae bible

LUK 20

¹Lo rani gatagale i Jisas mo huhuire sinobu lolo Sara Gogona, ko mo toretore gina Roro Garea lawera. Ira muei rugurugu meire huhui talo Leo Hora noi Mosis meire tamaragai ram vomai lobena,

²ram huie vena, “?Gon veve lawe gamai, gom vai na gineu mwere ingere ngaha gina managi mo vomai logo? ?Ihine u bete na managi naha lawego ve gon vai na gineu ingere ngaha?”

³I Jisas mo duvi lawera vena, “Ineu vage nain hui gimiu gina leo huhui. Nen duvi laweau,

⁴?Wa i Jon u lei na managi vena garuhigogona den God sige dena tangaloi?”

⁵Ingere ram tauvuigi ram vuigarogi sibona vena, “Tare ve dam duvi goroe vena ‘Den God’, nge vin veve vena, ‘?Huri hava gineu gimiu ne he ladohogo tea ginie?’

⁶Nge tare ve dam veve vena ‘Dena tangaloi’, a sinobu doluegi rain buguri gide, a vevenagi ingere doluegi ram lado siaga ve i Jon ingeie a tangaloi veve rarai.”

⁷Giniehi ram duvi vena, “Gahe ilo tea ve mo vomai logo.”

⁸Ko i Jisas mo veve lawera vena, “Ko ineu vage nain he veve tea lawe gimiu ve nam vai na gineu ingere ngaha gina managi mo vomai logo.”

⁹I Jisas mo veve lawera sinobu lo gato tavalu ngaha vena: “A tangaloi gatagale mo rivu na talui vaen, ko ingeie mo siregi na talu ngehi lawera leogoro. Siu nge mo vano dena tanona hi huri na mahogi u qaravu.

¹⁰Lo taroi taro matue, nge mo hora na nona tangaloi tabanagi gatagale lawera leogoro ve vin lei denire na nona duvi masi vaen. Nge ira leogoro ram talie ko ram hora taliguginie vurogi.

¹¹Nge i tagi talu hi mo hora na nona tangaloi tabanagi gatagale vage. Ira leogoro ram talie vage, ko ram vai esiesiginie, ko ingere ram hora taliguginie vurogi vage.

¹²Siu nge mo hora na nona tangaloi tabanagi gaitoligi. Ira leogoro ram tai salosaloie ko ram tuli vohoginie.

¹³Siu i tagi talu hi mo veve vena, ‘?Nain vei wuraha? Nain hora netuku hi a mweratabe. Nam ladohogo ve rain ladomava ginie.’

¹⁴Lune ira leogoro ram lehe, ram veve veveginire vena, ‘I gineu hi vin hako hougi na talu. Da ue vagamatea, ko a talui vaen vin voragi na bulada!’

¹⁵Siu ram tuli vohoginie dena talui vaen ko ram ue vagamatea. I Jisas mo hui vena, “?Siu i tagi talu vin vei na havagineu lawera leogoro ngerehi?

¹⁶Nge vin vomai, vin ue vagamate ira leogoro ngerehi, ko vin siregi na talu lawera leogoro wagineu.” Lune a sinobu ram rongoe mwerehi, ram veve vena, “!Hatie vohogi!”

¹⁷I Jisas mo leo vano lure, ko mo huire vena, “Tau a iloiloi Reve reve Gogona ngaha wuraha? ‘A beru hi a tangaloi mwagu ram tuli vohoginie; tau hatie, mo voragi na beru hune.’

¹⁸Tare hine tea vin soi talo beru hi, vin tuli vurivurie. Sige ve a beru hi vin soi talui hine tea, vin bibi vurivurie.”

¹⁹Ira huhui talo Leo Hora noi Mosis ko ira muei rugurugu ram vai leo ve ran wiri bibi Jisas lo taro hi, a vevenagi rau ilo ve nge u veve na gato tavalu ngaha vovohoire, nge ram matagu ginire sinobu.

²⁰Tau ingere ram matagi na taro garea. Ngere ram voli na tangaloi lavasigi huri ve ingere rain vei mwere ingere a buluana. Ram hora na tangaloi ngerehi ram vomai lobei Jisas ve rain holie lo leona, huri ve rain sireginie talo leo ko a managi noi Kavman ta Rom.

²¹A tangaloi ngerehi ram veve lawe Jisas vena, “Huhui, igamai gau ilo vurugegi ve a gineu ngerehi gom vevera ko gom huhui a hogo. Go he lado na nagoi tangaloi tea, nge gom huhui na matahalai God hogo.

²²?Gon veve lawe gamai, u tatarise mena Leo Hora ve dain voli takis lawe na muei ratahigi ta Rom, sige hatie?”

²³Nge i Jisas mo ilo na nora holi, mo veve lawera vena,

²⁴“Nen haharagi na vatu laweau. A nunui hine ko a henai hine lo vatu ngaha?” Ram duvi goroe vena, “Noi muei ratahigi.”

²⁵Siu i Jisas mo veve lawera vena, “Garea, nen bete lawe i muei ratahigi a hava gineu noi muei ratahigi, ko lawe God a hava gineu noi God.”

²⁶Rahe holie lai tea lo leona lo nagora sinobu, tau ingere ram marorongo, ram awogi huri na nona duviduvi.

²⁷Ira Sadusi lavasigi ram vomai lobei Jisas (ingere hi ram veve vena a sinobu rain he maraga tea dena mateana), ram huie vena,

²⁸“Huhui, i Mosis u reve na Leo hora ngaha huri gide vena: ‘Tare ve a tangaloi vin mate dei gahorana, nge hatie neture, i tuana vin lei na maduana huri roin bava na maresu lawe i tuana hi u mate beno.’

²⁹Lo taro gatagale ira reretehigi ingere gaibitu. A togagi mo lagi na vavine, siu mo mate nge hatie neture.

³⁰Siu suhurie mo laie,

³¹ko gaitoligi vage. Ko ingere gaibitu doluegi ram lagi na vavine hi, ram mate, rahe bava na maresu tea.

³²Vagasigi a vavine hi mo mate vage.

³³?Tau lo taroi maraga taligu nge vin voragi gahorai hine vohogi? Huri ingere gaibitu rau legi meie.”

³⁴I Jisas mo duvi gorora vena, “A mwera ko a vavine lo taro ngaha ram lagi.

³⁵Nge a mwera ko a vavine hi rau tatarise ve rain maraga dena mateana ko rain toga lo taro vin vomai rain he lagi tea.

³⁶Rain mwere ira engsel rain he mate tea. Ngere ira netui God, huri rau maraga taligu dena mateana.

³⁷Ko i Mosis mo haharagi matamwasaragi huri ve ira mate rain maraga taligu sulo mwaso. Lo tavalugi huri na avi mo gao na labute mo laqagi huri na Huqe ve ingeie God noi Ebraham, God noi Aesak ko God noi Jekob.

³⁸Mwerehi nem ilo ve ingeie God nora mwaso, nge hatie nora mate, a vevenagi ne mo lado huri na tangaloi doluegi, ve ram mwaso.”

³⁹A huhui talo Leo Hora noi Mosis lavasigi ram veve vena, “Huhui, a duviduvi garea hi!”

⁴⁰Huri rau vei samwegi ve rain huie gina leo huihui te vage.

⁴¹I Jisas mo huire vena, “?Ram veve mwere hilogo ve i Kraes i duvi Devet?

⁴²Huri Devet sibona u veve lo bugu Sam vena: ‘A Huqe mo veve lawe na noku Huqe vena: Gon toga lo matueku

⁴³vin dadari nain teu na nomu tavului vuro teri lo vavai kerumu.’

⁴⁴I Devet u ware Kraes huri ve a nona Huqe. ?Nge vi voragi duvi Devet mwere hilogo?”

⁴⁵Lune a sinobu ram rong huri Jisas, nge mo veve lawera nona rorongtagi vena,

⁴⁶“Nen leohuri huri ira huhui talo Leo Hora noi Mosis, ram tarani ve rain dige lategi mena luqe qaqaravu, ko ve a tangaloi rain vevegarea ginire lo sarai volivoli, ram tarani na muei tanoi togatoga lolo valei soneana, ko a muei tanogi lo gaganie lawua.

⁴⁷Ram vagamaro na valera vavine madue, ko ram tataro kalikeli mo qaravu. Nge ingere hi vin veveginire hageliu tetagaha!”