Read East Ambae LUK 22 Bible Online

LUK 22 - East Ambae bible

LUK 22

¹A tarogi mo kakarani huri na hinagai bereti siaga, ngehi u ware ve a Hinagai Halegagaliu.

²Ira muei rugurugu ko ira huhui talo Leo hora noi Mosis ram hike huri ve ran ue rorongogi Jisas, huri ingere ram matagugi na sinobu.

³I Setan mo ahu lolo loloi Judas u warea ve i Iskariot, ingeie gatagale denire hangavulu domwagi gairue.

⁴I Judas mo mwalue mo vano mo laqalaqa meire muei rugurugu ko meire leogoro soldia talo Sara Gogona, huri ve vin siregi Jisas wuraha lawera.

⁵Ingere ram rong garea huri ko ram waratau ve rain bete na homu lawea.

⁶I Judas mo masinge mwerehi ko mo hikesi na mahogi u garea vena rongo na leoi gai Jisas lune a sinobu rahe ilo tea.

⁷A ranigi hi mo vomai lo taroi hinagai bereti siaga ram wehi na natui sibsib huri na Halegagaliu lolona.

⁸I Jisas mo hora Bita tona Jon mo veve lawera vena, “Neri vano, neri vai vagatai na Halegagaliu huri ve dai geni.”

⁹Rom huie vena, “?Gom lado ve gori vei vagataie logo?”

¹⁰Mo veve vena, “Neri vano lo togagi venue, ko neri haqe na tangaloi mo wali na vurugi wei, neri hurie ko vin ehu lolo hava vale,

¹¹neri veve lawe na tagi vale vena, ‘A Huhui mo veve lawego vena, ?A mahoi vale hurieu nge hilogo, ve gain geni na Halegagaliu meire noku rorongtagi aie?

¹²Ko nge vin haharagi lawe gimiu na mahoi vale lawua namawe, u vei vagatai beno na tanoi gaganie aie. Neri vei vagatai huri gide aie.”

¹³Ingere rom vano rom haqe na gineu doluegi mwerehi i Jisas u veve lawera, ko ingere rom vai vagatai na hinagai Halegagaliu aiehi.

¹⁴Lo taro u vomai, i Jisas mo toga lo tanona meire nona gaihora lo tanoi gaganie,

¹⁵ko mo veve lawera vena, “Nam tarani garagara ve nain geni na Hinagai Halegagaliu ngaha mei gimiu siu nai gagarasi.

¹⁶Nam veve lawe gimiu vena, nain he gani na hinaga ngaha tea taligu vin dadari vin vagahorongi na iloiloi hinaga hi lo mwasoana garaqa God mo ratahigi lolona.”

¹⁷Siu i Jisas mo lai na laha, mo vevegareagi God, siu mo veve vena, “Nen lai ngaha, nen bete vatavatahagi gimiu.

¹⁸Nam veve lawe gimiu vena den hibagataha nain he inu te taligu dena waen ngaha vin dadari a mwasoana garaqa God mo Ratahigi lolona vin vomai.”

¹⁹Siu mo lai na bereti, mo vevegareagi God hurie, mo vise vurivurie, mo bete lawera, mo veve vena, “Nge ngaha a betuku [mo lai huri gimiu. Nen vai mwere ngaha gina ladotaligu hurieu ginie.”

²⁰Mwerehi vage lo tagui gaganie mo bete na laha lawera, mo veve vena, “A laha ngaha a varatau garaqa noi God a daiku mo vai siagaginie, a daiku hi vin hale huri gimiu.]

²¹“Nge nen leo, gatagale den gimiu mo toga meieu lo tanoi gaganie vin rongo na leoi geku.

²²Huri ineu i Netui Tangaloi nain mate mwere i God u lado vagatai, nge a hahagavi huri na tangaloi hi vin siregieu!”

²³Siu ingere ram tauvuigi ram vui huiginire vena ihine hi vin vei mwerehi.

²⁴Ira rorongtagi ram tauvuigi ram vui garogi huri ve ihine vin lei na tanoi lawua garagara denire.

²⁵I Jisas mo veve lawera vena, “A ratahigi talolo ure ngaha ram huqegi goro na nora sinobu, ko ira tomtomuegi ram lai na henagi ve ‘A Buluana nora Sinobu.’

²⁶Nge ngaha vin he mwerehi tea mei gimiu. Ne ihine hi den gimiu u lawua garagara vin mwere na mwalakelo, ko a tomtomuegi vin mwere na tangaloi tabanagi.

²⁷?Ihine hi u lawua liu, ngehi mo toga mo gagani hogosie sige ngehi mo bete na hinaga lawea? Nen ilo ve a tangaloi hi mo toga mo gagani u lawua u liu. Nge ineu ngaha mei gimiu mwere ihine hi mo bete na hinaga.

²⁸“Gimiu neu toga meieu lo tarogi ingere rau vagaromasigieu;

²⁹ko mwere i Tamaku u bete na tanoi ratahigi laweau, mwerehi vage ineu nain bete na tanoi ratahigi lawe gimiu.

³⁰Siu nein geni ko nein inu meieu lo tarogi vin vomai ngehi nain ratahigi aie, ko nein toga lo tanoi togatoga ratahigi huri nein vevegi na garogi a duvi Israel hangavulu domwagi gairue.

³¹“Saemon, Saemon! Gon rongo! I Setan u nevu ko i God u siregi lawea ve vin vei lehi gimiu ve vin vilewahera rau esi den gimiu, mwere mo vilewahe na tagurui hinaga dena hinagagi.

³²Tau ineu nau tataro beno hurigo ve a nomu ladohogo na mese soi. Ko lune goin tudori vomai meieu, gon vai siagagi retuemu taligu.”

³³I Bita mo duvi vena, “Huqe, ineu nam rarai ve nai vano lo valei vauveu meigo ko nai mate meigo.”

³⁴I Jisas mo duvi vena, “Bita, nam veve lawego vena, gaqarigi lolo bongi ngaha a toa vin he tarere te tau, nge iniko goin tahau vagatolu.”

³⁵Siu i Jisas mo veve lawera vena, “?Lune nau hora gimiu neu vano ve nein toretore nehe hako te tangai mane sige a gete ko a butu, tau igimiu neu mahogi lo hava gineu tea?” Ngere ram duvi vena, “Hatie.”

³⁶I Jisas mo veve vena, “Nge siserigi ngaha tare ve hine tea a nona tangai mane sige a nona gete vin hakovie. Tare ve hine tea hatie nona buei vuro garea vin sogagi na luqana ko vin voli na nona gena manei luqe hi.

³⁷Huri nam veve lawe gimiu vena, mo eno ve vin vagahorongi na Reve reve Gogona luku, u veve vena, ‘Ingere rau velu bubuginie meire ue balu.’ Huri a tarogi u vomai beno ve vin vagahorongi na havai u reve hurieu.”

³⁸Ira rorongtagi ram veve vena, “Leo, Huqe! Nge ngaha a buei vuro gairue!” I Jisas mo veve vena, “U tatarise beno!”

³⁹I Jisas mo mwalue dena qatui venue hi ko mo vano mwerehi mo vai gesegi lo Vusi Oliv. Ko ira nona rorongtagi ram hurie.

⁴⁰Lune mo vomai lo ute hi mo veve lawera vena, “Nen tataro vate vai nem soi lo kalikeli.”

⁴¹Siu mo dige beragi mala vagahao denire, mo sisiqeu ko mo tataro,

⁴²mo veve vena, “Mama, tare ve a nomu tarani, gon lai vohogi na laha ngaha denieu. Nge hatie noku tarani nge a nomu tarani na eno lune.”

⁴³A engsel ta eulu mo sereluae lawea ko mo vai siagagi na domine.

⁴⁴Mo lolovono liu huri na rongogagarasi lolo domine, siu mo tataro siaga taligu, a raratongine mo hale sulo tano mwere na dai mo hale.

⁴⁵Lune nge u tataro u rovo, nge mo labe, mo vano taligu lobera nona rorongtagi, mo haqera ram maturu, a vevenagi ingere ram hahagavi.

⁴⁶Mo veve lawera vena, “?Huri havai gimiu nem maturu? Gimiu nen maraga, nen tataro vate vai nem soi lo kalikeli.”

⁴⁷Lune i Jisas mo laqa mosigei, a sinobu ram dadari, i “?Judas, wa gom rongo na leoi gaku, i Netui Tangaloi, gina vano tuturedu lobei Jisas, mo sungunie,

⁴⁸Jisas mo veve vena, “Judas, wa gom rongo na leoi gaku, i Netui Tangaloi, gina sunguni?”

⁴⁹A rorongtagi hi ingere mei Jisas ram lehi na gineu hi vin vei, ram veve vena, “?Huqe, wa gain gilu gina nomai buei vuro ingere ngaha?”

⁵⁰Ko gatagale denire mo tai vano lo tangaloi tabanagi noi rugurugu lawua ko mo tai sue na qerona lo matuana.

⁵¹Nge i Jisas mo veve vena, “!Mese, u rovo hi!” ko mo tango vano lo qeroi tangaloi hi ko mo garea taligu.

⁵²Siu i Jisas mo veve lawera muei rugurugu ko ira leogoro soldia talo Sara Gogona ko ira tam tamaragai ngerehi rau vomai ve ran laie, mo vena, “?Gimiu nem vomai mena buei vuro ko a ruqi ve nein wiri bibieu, mwere huri ve ineu i uebalu?

⁵³Vataha bongi nau toga mei gimiu lo Sara Gogona, nge ne he vai leo tea ve nen wiri bibieu. Nge ngaha a tarogi lawe gimiu ve nein vei mwere ngaha, lune a managi nona dodogi mo ratahigi.”

⁵⁴Ram wiri bibi Jisas, ram vano meie sulo valei rugurugu lawua, nge i Bita mo hurire mala vagahao denire.

⁵⁵Rau huru na avi lolo livugei ara, ko i Bita mo bulu meire ram madinugi na avi hi.

⁵⁶Lune a taqalugu gatagale a tangaloi tabanagi mo lehe hi mo toga lobei avi, mo leo bibie, mo veve vena, “A tangaloi ngaha vage nge mei Jisas.”

⁵⁷Nge i Bita mo tahae, mo veve vena, “Vavine, na he iloe tea.”

⁵⁸He ribi tea a tangaloi dolue vage mo lehi Bita, mo veve vena, “Iniko gatagale vage meire.” Nge i Bita mo duvi vena, “Tuana, ineu hatie!”

⁵⁹Siu a mahoi aho gatagale goro a tangaloi dolue vage mo veve siaga vena, “A hogo, a tangaloi ngaha ingeie mei Jisas, huri ingeie vage ta Kalili.”

⁶⁰Nge i Bita mo duvi vena, “Tuana, nahe ilo na havai tea hi gom veve.” Siserigi hi, lune mo laqa mosigei, a toa mo tarere.

⁶¹A Huqe mo tu dori mo leo bibi Bita, ko i Bita mo lado haqe na leoi Huqe hi u veve beno lawea vena, “A toa vin he tarere te tau lolo bongi ngaha, nge iniko goin tahau vagatolu.

⁶²I Bita mo mwalue mo ngara.

⁶³A tangaloi ram leogoro Jisas ram sovue ko ram talie.

⁶⁴Ram vivi goro na matana, ram huie vena, “Gon tige ve ihine mo tutuhigo!”

⁶⁵Ko ram veve asiesiginie gena leo u sao.

⁶⁶Lolo robongi siaga ira tam tamaragai ko ira muei rugurugu ko ira huhui talo Leo hora noi Mosis ram sone bubugi, ko ram lai Jisas mo vomai lo nora Kansel ve rain veveginie.

⁶⁷Ram veve vena, “Gon veve huri lawe gamai ve iniko i Kraes sige hatie.” Mo duvi lawera vena, “Tare ve nam veve lawe gimiu, nein he ladohogogieu tea.

⁶⁸Ko tare ve nain hui gimiu gina huihui, nein he duvieu tea.

⁶⁹Nge den hibagataha ineu i Netui Tangaloi nain toga lo matuei God managi.”

⁷⁰Ingere doluegi ram veve vena, “?Wa iniko hi i Netui God?” Inge mo duvi lawera vena, “Igimiu nem veve ve ineu hi.”

⁷¹Ko ram veve vena, Da he tarani tea ira tangaloi ve rain veve hurie, nge igide siboda dam rongo na nona leo.