Read East Ambae LUK 24 Bible Online

LUK 24 - East Ambae bible

LUK 24

¹Lolo robongi siaga lo Sande, a muei rani talo wik, a vavine ram vano lo malanga, ram wali na gineu buhoru ngerehi rau vei rarai.

²Ram haqea ve a vatu u telulu beno dena malanga,

³siu ingere ram vano ram ahu lolona, nge rahe haqe na betui Huqe Jisas tea.

⁴Ram labe aie ko rahe ilo te vurugegi. Siserigi a tangaloi gairue rom labe lobera, a luqara u varavara u liu.

⁵Ram matagu garagara ko ram hudu sulo tano. Siu a tangaloi gairue hi rom veve lawera vena, “?Huri havai nem hikesi na tangaloi mwaso lolo livugara tangaloi mate?

⁶Ingeie u maraga. Inge hatie tangaha. Nen ladohaqe a hava gineu ngehi u veve lawe gimiu lune ingeie u toga lolo venue Kalili

⁷ve vi eno ve rain siregi i Netui Tangaloi lawera galegaleasi, rain toto vehavehaginie lo gai saroutu ko ve nge vin maraga taligu lo tagui rani gaitolu.”

⁸Ko a vavine ngerehi ram ladohaqe na nona leo,

⁹ram tudori dena malanga, ko ram veve na gineu doluegi hi lawera hangavulu domwagi gatagale ko lawera doluegi vage.

¹⁰A vavine ngerehi i Meri ta Makdala, Joana, ko i Meri retahi Jemis; ingere ko a vavine lavasigi meire ram veve na gineu ingere ngaha lawera gaihora.

¹¹Nge ira gaihora ram lado ve a hava gineu a vavine rau veve a kalikeli, ko ingere rahe ladohogo tea ginire.

¹²Nge i Bita mo maraga ko mo toa mo vano sulo malanga, mo ate su lolona ko mo lehi na luqe ko hate gineu vage. Mo rovo mo mule lo tanona, mo awogi huri na hava gineu u vei.

¹³Lo rani hi tau a rorongtagi gairue rom dige huri na togagi venue a henagi Emaus, a kilomita hangavulu domwagi gatagale den Jerusalem,

¹⁴ko ingere rom laqalaqa ginire huri na gineu doluegi ngerehi ve rau vei.

¹⁵Lune rom laqa ko ram vui garogi huri, i Jisas mo vomai ko mo dige meire.

¹⁶Rom lehe, nge rohe leo te vurugeginie.

¹⁷I Jisas mo veve lawera vena, “?A hava gineu ngehi nerom vui garogi huri, lune nerom dige?” Ingere rom labe rorongo mena nago asi.

¹⁸Gatagale denire, a henana i Kleobas, mo huie vena, “?Wa iniko a tangaloi gatagale hogosie gom toga a Jerusalem, go he ilo na hava gineu tea ngerehi rau vei aie lo rani gaivihe rau vano beno?”

¹⁹Ingeie mo hui vena, “?A hava gineu ingere?” Rom duvi vena, “A gineu rau vei lawe i Jisas ta Nasaret. A tangaloi ngaha nge a tangaloi veve rarai, u huire lo nona lalakogi ko lo leona lo nagoi God ko lo nagora sinobu.

²⁰Ira nomai muei rugurugu meire tomtomuegi rau sireginie vano ve vin vevegi vagamatea, ko rau toto vehavehaginie lo gai saroutu

²¹Nge igamai gau lado ve ingeie hi vin voli tuguhire a duvi Israel! Lo ului gineu ngerehi a rani gaitoligi ngaha lune a gineu hi u vei.

²²Ko a vavine lavasigi dena nomai burigi rau vei gamai gam garigi, huri rau vano sulo malanga lolo robongi siaga,

²³nge rahe haqe na betune tea. Rau vomai taligu ram veve ve rau hueri rau lehi na engsel. A engsel ngerehi rau veve lawera huri ve ingeie mo mwaso.

²⁴A tangaloi lavasigi dena nomai burigi rau vano sulo malanga ko rau haqe vurugegi mwerehi a vavine rau veve, nge ra he lehe tea.”

²⁵Mo rovo i Jisas mo veve lawera vena, “Gimiru a reragi, neru sagaribi lawagi lo nomiru ladohogo lo gineu doluegi ngerehi a tangaloi veve rarai rau veve!

²⁶?Wa he eno tea huri ve i Kraes vin gagarasi lo gineu ingere ngaha, siu vin ehu lolo nona gareana?”

²⁷Ko i Jisas mo veve matamwasaragi lawera a hava gineu u veve huri sibona lolo Reve reve Gogona doluegi, mo tauvuigi mena bugu ngerehi noi Mosis ko a revereve nora tangaloi veve rarai doluegi.

²⁸Ram vomai kakarani lobei na togagi venue ngehi ram vano hurie, ko i Jisas mo vai mwere huri ve ingeie vin tutuvano,

²⁹nge ingere rom hako bibie, rom veve vena, “Gon toga mei gamaru; a rani mo kakarani mo rovo ko mo tauvuigi mo dodo.” Siu mo vano ve vin toga meire.

³⁰Lune mo toga meire lo tantanoi hinaga, mo lai na bereti ko mo veve gareagi God ko mo vise na bereti hi mo bete lawera.

³¹A matara mo tawaga ko rom ilo vurugeginie. Ne ingeie mo salasala dena matara.

³²Rom veve veve ginire vena, “?Wa he mwere na avi tea mo gao lolo lolodaru lune mo gato mei gideru lo turegi ko mo veve matamwasaragi na Reve reve Gogona ngerehi lawe gideru?”

³³Rom maraga siserigi ko rom vano taligu a Jerusalem, rom haqe ra hangavulu domwagi gatagale rau toga bubugi meire rorongtagi lavasigi vage,

³⁴ko ingere ram veve vena, “A Huqe u maraga hogo! I Saemon u lehe!”

³⁵Siu ingere gairue hi rom veve matamwasaragi lawera a hava gineu u vei lo turegi, ko huri ve ru leo vurugegi na Huqe lune ingeie mo vise vurivuri na bereti.

³⁶Lune ingere rom veve lawera, siserigi a Huqe mo labe lolo livugara ko mo veve lawera vena, “A tamwata lobemiu.”

³⁷Ram vutugegi ko ram matagu liu, ram lado huri ve rau lehi na tamate.

³⁸Nge ingeie mo veve lawera vena, “?Nem romasi huri havai? ?A lado gairue mo vomai lolo domimiu huri havai?

³⁹Nen lehi na limeku ko a karuku ko nen leo ve ineu ngaha. Nen tango vomai luku ko nen lehieu vage, huri a tamate hate vihigona ko hate huine, mwerehi nem lehieu.”

⁴⁰Mo veve ngaha ko mo haharagi na limana ko a karune lawera.

⁴¹Ingere rahe ladohogo tea lai mosigei huri ingere ram horo gina havuhevu ko ram awogi hurie. Siu ingeie mo huire vena, “?Tau igimiu neu hako te gineu ve nein geni tangaha?”

⁴²Ram bete na mavusui ige manoga lawea,

⁴³nge mo laie ko mo ganie lo nagora.

⁴⁴Mo rovo mo veve lawera vena, “A gineu ingere ngaha nau veve lawe gimiu lune nau toga mei gimiu ve mo eno huri ve vin vagahorongi na gineu doluegi rau reve hurieu lo Leo Hora noi Mosis, lo revereve nora tangaloi veve rarai, ko lolo Sam.”

⁴⁵Mo rovo mo tawaga lolo domire ve rain ilo vurugegi na Reve reve Gogona,

⁴⁶ko mo veve lawera vena, “Nge ngaha a hava gineu u reve: huri ve i Kraes vin gagarasi ko vin maraga dena mateana lo rani gaitoligi,

⁴⁷ko ve rain toretore lo henana huri na ladowenigi ko a ladovohogi bugu lawe na ureure doluegi, vin teuvuigi a Jerusalem.

⁴⁸Igimiu a tangaloi nein haharagi na gineu ngere ngaha.

⁴⁹Ko ineu siboku nain hora sulumiu a hava gineu i Tamaku u warataugi teu. Nge nen toga rarai lolo qatui venue vin dadari lune a huireana den eulu vin himei sulumiu.”

⁵⁰Siu mo tomueginire dena qatui venue ram vano kakarani Betani, aiehi mo horagi na limana ko mo vaigareaginire.

⁵¹Lune mo vaigareaginire, ingeie mo sireginire ko mo laie hage lo eulu.

⁵²Ngere ram huduhudu goroe, ko ram mule taligu a Jerusalem gena havuhevu lawua,

⁵³ko ram toga vataha bongi lolo Sara Gogona ko ram waregareagi God.