Read East Ambae LUK 5 Bible Online

LUK 5 - East Ambae bible

LUK 5

¹Lo taro gatagale i Jisas mo labe lo mwararai Wai Kenesaret lune a sinobu ram vuisusuni mo hage lobei Jisas huri ve ran rorongtagi na leo noi God.

²Mo lehi na aka gairue rau reveire hage lolo one; a tangaloi loli ige ram vano ram solo na nora gabe.

³I Jisas mo kalo lo aka hi gatagale, a akai Saemon, ko mo navu denie vena susunie na aka na tutuhivo dena one. I Jisas mo toga lo aka mo huhui na sinobu.

⁴Lune i ingeie u laqa rovo, mo veve lawe Saemon vena, “Nen lai na aka na tutuhivo lolo buei wai, ko nen siregi na nomiu gabe huri nein revei na ige.”

⁵I Saemon mo duvi vena, “Huhui, gau vei leo lolo bongi mo rani ko gahe wali na gineu te gatagale. Nge huri gom veve tau, gamai gain tuli na gabe taligu.”

⁶Ram tuli na nora gabe hivo ko a ige u sao ram hola lolo gabe mo kakarani vena maheve.

⁷Siu ram ware na nora buluana lolo aka tuegi ve ran vomai ko ran hako meire. Ram vomai ko ram hogoni na aka ingere vunu gina ige rom kakarani ve ron dono.

⁸Lune i Saemon Bita mo lehi na hava gineu u rovo vomai, mo sisiqeu hivo lobei qaui Jisas ko mo veve vena, “!Gon vano denieu, Huqe, huri neu a tangaloi galegaleasi!”

⁹I Saemon ko ira nona buluana doluegi ram awogi huri na ige u sao hi rau welire.

¹⁰Ira netui Sebedi, i Jemis ko i Jon, ingere a burigi tau mei Saemon, rom awogi huri vage. I Jisas mo veve lawe Saemon vena, “Gon mese matagu; den hibagataha goin loli na tangaloi.”

¹¹Ram reve na aka suhage varea lolo one, ram siregi na nora gineu doluegi ko ram huri Jisas.

¹²Lo taro gatagale i Jisas mo toga lolo mahoi venue lawua. A tangaloi gatagale aiehi a vohavono u vei na betune doluegi. Lune mo lehi Jisas, mo sisiqeu hivo mo hudu goroe, mo navu denie vena, “Huqe, tare ve gom tarani, goin vei leieu ve nan mwasara!”

¹³I Jisas mo horagi na limana mo tango vano lune, mo veve vena, “Nam tarani, gon mwasara!” Ko siserigi a vohavono hi mo rovo denie.

¹⁴I Jisas mo gatogoroe mo veve vena, “Go mese veve lategi lawe hine tea, nge gon vano tuturedu lobei rugurugu na lehigo tomue. Ko gon bete nomu hogogi mwere a Leo hora noi Mosis u veve, a gigilegi lawera ve gu mwasara.”

¹⁵Nge a roro huri Jisas mo vano liu den tomuegi, ko a sinobu sao rau vomai ve rain rongoe ko ve nge vin vagamwasoire dena nora segeana.

¹⁶Ingeie mo vano lo vanue vurogi, aiehi nge mo tataro.

¹⁷Lo rani gatagale i Jisas mo huhui, ko a Varise lavasigi ko a huhui lavasigi talo Leo hora noi Mosis rau vomai dena qatui venue doluegi ta Kalili ko ta Judia ko den Jerusalem, ram toga hivo aiehi. A managi noi Huqe mei Jisas ve vin vagamwasoire segeana.

¹⁸A tangaloi lavasigi ram vomai, ram wali na tangaloi lukuluku lo niana, ko ingere ram vai leo ve ran laie sulolo vale ve ran quroe lobei Jisas.

¹⁹Nge a vevenagi a sinobu u sao ra he haqe na mahogi tea ve rain leie sulolo vale. Siu ingere ram walie mo hage lo ului vale ko ram langa vohogi na roroi vale ko ram sireginie mo hivo me niana lolo livugei sinobu lobei Jisas.

²⁰I Jisas mo lehi na nora ladohogo mo veve lawe na tangaloi lukuluku hi vena, “Buluana, a bugumu u ladovohogi beno.”

²¹A huhui talo Leo hora noi Mosis ko ira Varise ram tauvuigi ram veve veveginire vena, “?Hava tangaloi ngaha mo veve asiesigi God mwere ngaha? Ihine vin he ladovohogi na bugu lai tea, nge i God hogosie.”

²²I Jisas u ilo na nora domiana beno ko mo veve lawera vena, “?Huri hava gineu gimiu nem lado hikehike mwerehi lolo taqangimiu?

²³?Nem lado ve u makemu mwerehilogo huri vena veve vena, ‘A bugumu u ladovohogi beno,’ sige na veve vena, ‘Gon maraga, gon dige’?

²⁴Ineu nain vei matamwasaragi lawe gimiu huri ve i Netui Tangaloi u hako managi lo ure ve vin ladovohogi na bugu.” Ko nge mo veve lawe na tangaloi lukuluku vena, “Nam veve lawego vena, gon maraga, gon wali na niemu, gon mule taligu lo valemu!”

²⁵Siserigi a tangaloi hi mo maraga lo nagora doluegi, mo wali na niana hi u eno lune ko mo mule mo waregareagi God.

²⁶Ngere doluegi ram awogi garagara ko ram matagu, ram waregareagi God, ram veve vena, “A gineu garigiana dam bei leo bagataha!”

²⁷Lo tagugi hi i Jisas mo mwalue vano ko mo lehi na tangaloi vilevile homu a henana Livae, mo toga lo tantanona. I Jisas mo veve lawea vena, “Gon hurieu.”

²⁸I Livae mo maraga mo siregi na nona gineu doluegi ko mo hurie.

²⁹Siu i Livae mo vai na hinaga lawua lo valena huri Jisas, ko ira tangaloi vilevile homu rau sao ko a sinobu lavasigi vage ram toga meire.

³⁰A Varise lavasigi meire huhui lavasigi talo nora burigi ram ngutu ram veve huri Jisas lawera nona rorongtagi vena, “?Huri hava gineu gimiu nem gagani ko nem inuinu bubugi meire tangaloi vilevile homu ko ira galegaleasi?”

³¹I Jisas mo duvi lawera mo veve vena, “Irahine ram mwaso ra he tarani na dokta tea, nge irahine hi ram sege hogosie.

³²Ineu nahe vomai tea ve nan ware irahine rau vovohoi, nge irahine rau galegaleasi.”

³³A sinobu lavasigi ram veve lawe Jisas vena, “Ira rorongtagi noi Jon Garuhigogona ram gologolo gesegi ko ram tataro, ko ira rorongtagi nora Varise ram vai mwereire vage, nge ira nomu rorongtagi ram gani ko ram inu.”

³⁴I Jisas mo duvi vena, “?Wa igimiu nem lado ve ira sinobu ram tino lolo hinaga lagiana, rain mese gagani lo tarogi he i taglagi mo toga meire tau mosigei?” Hatie vohogi!

³⁵Nge a tarogi vin vomai lune rain lei vohogi I taglagi denire, siu ingere ram bei gologolo.”

³⁶I Jisas mo veve na gato tavalu ngaha lawera vage, “A tangaloi vin he heve na mavusui luqe garaqa tea vena bulue lo luqe malea. Tare ve mo vai mwerehi, vin heve na luqe garaqa, ko a mavusui luqe garaqa vin he tatarise tea mena maleagi.

³⁷Sige a tangaloi rahe saru na waen garaqa tea talolo vinui kakarue malea. Tare ve mo vai mwerehi, a waen garaqa vin vuge teteri na vinui kakarue, ko a waen vin hale vohogi, ko a vinui kakarue vin esi.

³⁸Hatie! Ram saru na waen garaqa lolo vinui kakarue garaqa.

³⁹Ko ihine vin he tarani tea na waen garaqa lo tagui waen malea hi u inue, nge vin veve lai vena, ‘A waen malea u garea.’ ”