Read East Ambae LUK 7 Bible Online

LUK 7 - East Ambae bible

LUK 7

¹Lo tagugi i Jisas u laqagi na gineu ingere ngaha lawera sinobu, vunu mo vano Kabeniam.

²Aiehi a leogoro soldia vudolue ta Rom a nona mwalakelo mo sege lawua kakarani ve na mate. A leogoro hi u tabea liu.

³Lune nge mo rongo ve i Jisas nge aie, mo horara tamaragai a duvi Israel lavasigi ram vano ram veve lawe Jisas vena vomai na vagamwasoi na mwalakelo hi.

⁴Lune ram dadari lobei Jisas ram veve garagaragi lawea vena, “A tangaloi hi u tatarise ve gon hako meie.

⁵Huri nge u bulubulu garea mei gide a duvi Israel ko nge u hakovi na nomai vale soneana lawe gamai vage.”

⁶Siu i Jisas mo hurire ram vano. Lune nge mo kakarani lobei vale i leogoro mo hora na nona buluana sulobei Jisas ve ran veve lawea vena, “Huqe, gon mese romasi lawagi lune. Ineu na he tatarise tea ve gon ahu lolo valeku.

⁷Ko vage nam lado ve na he tatarise tea ve nain vomai lobemu. Nge gon hora na leomu hogosie ko a noku mwalakelo vin mwaso ginie.

⁸Huri ineu vage, nam toga lo vavara tangaloi ram hako huireana goroau, ko ineu nam hako huireana gorora noku soldia. Nam horae gatagale denire vena, ‘!Gon vano!’ ko mo vano. Ko nam warea tuegi vena, ‘!Gon vomai!’ ko mo vomai. Ko nam hora na noku tangaloi tabanagi vena, ‘!Gon vaie ngaha!’ ko mo vaie.”

⁹Lune i Jisas mo rongo ngerehi, nge mo garigi huri. Siu mo talele dori mo veve lawera sinobu ngerehi ram tu tagu, mo veve vena, “Nam veve lawe gimiu vena, nahe haqe ihine tea a Israel mena ladohogo lawua mwere ngaha.”

¹⁰Ira nona buluana ram mule vano lo valei leogoro, ram lehi na mwalakelo hi u mwaso beno.

¹¹He ribi tea lo tagugi he, i Jisas mo vano lo togagi vanue mo waregi ve Nain. A nona rorongtagi mena buri sinobu ram hurie.

¹²Lune ram dadari lo matai arai venue hi, a buri tangaloi ram hau na luqeluqei mateana mo vomai. A mwalakelo hi u mate i retahine a vavine madue, i netune hi gatagale vohogi. A tangaloi u sao vage talo togagi venue hi ram huri na vavine madue hi.

¹³Lune a Huqe mo lehi na vavine hi nge mo hagavie liu. Siu nge mo veve lawea vena, “Gon mese ngara.”

¹⁴Siu a Huqe mo dige huri na luqeluqei mateana hi, mo tango lune. A tangaloi ngerehi ram haue ram labe rorongo. I Jisas mo veve vena, “Mwalakelo, nam veve lawego, gon maraga!”

¹⁵A tangaloi hi u mate mo maraga mo toga, mo tauvuigi mo gato. Siu i Jisas mo horaginie vano taligu lawe retahine.

¹⁶Ira sinobu doluegi ram vai vutugegi liu ginie, ram waregareagi God, ram veve vena, “A tangaloi ligoligogi lawua mo maraga lobeda!” ko, “I God u vomai vena siro na nona sinobu!”

¹⁷A roroi Jisas mo vano doluegi na vanuara ta Judia ko lo vataha vanue dalie vage.

¹⁸Ira rorongtagi noi Jon ram veve na gineu ingere ngaha doluegi lawea. Siu i Jon mo warera gairue denire,

¹⁹mo horara rom vano lobei Huqe ve roin huie vena, “!Ei! ?Iniko hi i Jon u veve vena goin vomai, sige gamai gain rarai hine te wagineu vage?”

²⁰Lune rom dadari lobei Jisas, ram veve lawea vena, “I Jon Garuhigogona mo hora gamaru ve gori huigo vena, ‘?Iniko hi nge u veve vena goin vomai, sige gamai gain rarai hine te wagineu vage?’ ”

²¹Lo tarogi ngehi, i Jisas mo bei vagamwasoi na tangaloi mo sao, hi rau sege, ngerehi a segeana asi u veire, ko ngerehi a vui esi lure, vage u veire matadodo rau sao ram leo taligu.

²²Nge mo duvi lawe na gaihora noi Jon mo veve lawera vena, “Nero vano taligu nero veve lawe Jon a hava gineu neru leo ko neru rongo: ira matadodo ram leo, ira lukuluku ram dige, ira vohavono ram mwasara, ira qerovono ram rongo, ira mate ram mwaso, ko nam laqagi na Roro Garea lawera mahogi.

²³Havuhevu mei hine he ladogairue tea hurieu!”

²⁴Siu ira gaihora noi Jon rom vano taligu, i Jisas mo tauvuigi mo veve lawera sinobu huri Jon vena, “?Lune gimiu neu vano lobei Jon lolo vanue vurogi, a hava gineu gimiu nem vano ve nein leo? ?A mavuro mo mwagilugilu gena langi?

²⁵Hatie! Teu a hava gineu nem vano ve nein leo? A tangaloi mo luqegi na luqe u raka? Hatie! Leo, ingere ram saru luqe u raka ko ram gagani garea gesegi ram toga lolo valera ratahigi!

²⁶?Nge igimiu veve laweau, nem vano huri ve nein lehi na havagineu? ?Ve nein lehi na tangaloi ligoligogi? Io, nam veve lawe gimiu vena, u liuhage dena tangaloi ligoligogi.

²⁷1 Jon hi a Reve reve Gogona veve hurie vena, ‘Leo, nam hora na noku gaihora tomuegi goro na nagomu ve vin vaga rarai na matahalamu raraigo.’

²⁸Nam veve lawe gimiu vena, i Jon Garuhigogona nge u lawua liu dena tangaloi doluegi ngerehi rau vora beno. Nge ihine mo ladomavagi God ve a nona Ratahigi, ihine tea u biti lolo Ute noi God, ingeie u lawua den Jon.

²⁹“Lune ira sinobu meire tangaloi vilevile homu ram rongo na leo noi Jon, ram gareagi huri ve a matahalai God u vovohoi, huri rau lei na garuhigogona lobei Jon.

³⁰Nge ira Varise ko ira huhui talo Leo hora noi Mosis ram rahagi na tauleo hi God u lado rarai tau hurire, huri rahe lai na garuhigogona tea lobei Jon.

³¹Jisas mo tare hougi mo veve vena, “?Siserigi ngaha ineu nain tatarisegi na sinobu ta gaqarigi mwerehilogo? ?Sige rau mwere na havai?

³²Rau mwere na maresu teri ram toga lo sarai volivoli, ram uloulo ginire vena, ‘Gamai gau uvi bue lawe gimiu, nge gimiu ne he wetu tea. Gamai gam huri ehi mateana, nge gimiu nehe ngara tea.’

³³I Jon Garuhigogona u vomai, nge u gologolo, he inu tea waen, nge gimiu nem veve vena, ‘A vui esi lune!’

³⁴I Netui Tangaloi u vomai, ko nge u gagani ko u inu, nge gimiu nem veve vena, ‘Leo, ingeie a tangaloi u geni lawua ko u inu garagara waen; ko ingeie a buluana nora vilevile homu meire galegaleasi!’

³⁵A mataisao noi God mo haharaginie lune hi rau masinge hurei”

³⁶A Varise gatagale mo ware Jisas ve roin gagani bulu lo valena. I Jisas mo ahu lolo vale, siu mo toga vena gagani.

³⁷A vavine gatagale talo vanue hi, nge a vavine galegaleasi, mo rongo ve i Jisas nge lo valena varise hi, mo wali na vurugi a vatu, a vurei bonbon lolona.

³⁸Lune i Jisas mo toga sarosaro huri vena gagani, a vavine hi mo vomai mo labe lobei karune, mo ngara, siu a nona tinengi mo tiri sulo karui Jisas. Siu mo olo hivo, mo mangi vohoginie gena vulune, mo sunguni na karui Jisas, mo lingi na vurei bonbon hi lune.

³⁹Lune a Varise hi u ware Jisas sulo valena mo lehi na gineu hi, mo veve lawea sibona vena, “Tare ve i nge a tangaloi ligoligogi hogo, nge vin ilo ve a hava vavine ngaha mo sikelie, huri ingeie a vavine galegaleasi!”

⁴⁰Siu i Jisas mo duvie mo veve vena, “Saemon, nam tarani ve nain veve na gineu gatagale lawego.” Siu i Saemon mo duvi vena, “Garea, Huhui, gon vevea laweau.”

⁴¹I Jisas mo veve vena, “A tangaloi gairue rom due bugu dena ratahigi gatagale. Tuegi a bugune vatu teri vaga ngavulu gailime, siu tuegi a bugune teri vatu vagalime.

⁴²Ngere vunu rom voli samwegi na bugure, siu a ratahigi hi mo tai vohogi na bugure. Siu denire tuegi ngehilogo hi vin tabea hageliu?

⁴³I Saemon mo duvi vena, “Nam lado ve a tangaloi ngehi a bugune u lawua liu, a ratahigi u tei vohoginie.” I Jisas mo veve vena, “Gu duvi vovohoi.”

⁴⁴Vunu i Jisas mo talele vano vovohoi na vavine hi, mo veve lawe Saemon vena, “?Gom lehi na vavine ngaha? Nau ehu lolo valemu, gohe bete na wai tea huri na karuku, nge u solo na karuku gena nona tinengi ko mo mangire gena vulune.

⁴⁵Iniko go he lai vurugegieu tea ve goin sungunieu, nge tavohe nau ehu vomai lolo valemu, nge mo sunguni na karuku mo dadari siserigi ngaha.

⁴⁶Iniko gohe vurei na qatuku tea, nge u lingi na vurei bonbon sulo karuku.

⁴⁷Nam veve lawego, nge u tabeau liu. Mo vosangie ve a nona galegaleasi teri nau lei vohoginire denie beno. A tangaloi ngehi nam lai vohogi na nona galegaleasi biti, a nona tabeana vin biti vage.”

⁴⁸Vunu i Jisas mo veve lawe na vavine hi vena, “Nau ladovohogi na nomu galegaleasi beno.”

⁴⁹Siu ira tangaloi lavasigi rau toga vuine lolo herei hinaga, ram veve veveginire vena, “?E, ihine ngaha, mo ladovohogi na bugui galegaleasi?”

⁵⁰Nge i Jisas mo veve lawe na vavine hi vena, “A nomu ladohogo u vagamwasoigo. Gon mule lo tamwata.”