Read East Ambae LUK 8 Bible Online

LUK 8 - East Ambae bible

LUK 8

¹Lo tagui gineu ngerehi i Jisas mo dige turu na qatui venue ko lo loloi venue lavasigi vage, ko mo toretoregi na Roro Garea huri na Ute noi God mo Ratahigi goro na tangaloi doluegi. Ira nona rorongtagi hangavulu domwagi gairue ram vano meie,

²ko a vavine lavasigi vage ngerehi i Jisas u vagamwasoire dena vui esi ko dena lalangai segeana lavasigi vage: Meri hi ram warea ve ta Makdala, ingeie hi i Jisas u vuro lue na vui esi gaibitu denie;

³Joana, i gahorai Kusa, i Kusa hi ingeie a tangaloi leogoroi tabanagi noi Herot; Susana, ko a vavine u sao lavasigi vage ram bului Jisas mena nona rorongtagi gena nora vataha lalaie.

⁴A sinobu sao ram vomai tau lobei Jisas dena vataha togagi venue lalawua, ko lune a buri sinobu ram sone bulutegi, i Jisas u veve na gato tavalu ngaha,

⁵“A tangaloi gatagale mo vano mo gaburegi na toli. Ko lune nge mo gaburegi, lavasigi ram soi lo turegi, ko a manu ram vomai ram gani vohoginire.

⁶Lavasigi ram soi lo ului vetu, ko lune ram tubu hage, ram koru, a vevenagi a tano he lobu tea.

⁷A toli lavasigi ram soi talolo garo kau, ko a garo kau ram tubu hage mena toli hi, ko ram vivire.

⁸Nge a toli lavasigi ram soi lolo tano garea, ram tubu ram mauri hage, ram wai mwasigi lure, vudolue vatahaginire. Ko i Jisas mo veve vena, “Tare ihine qerona, na ronghuri vurugegi!”

⁹A nona rorongtagi ram hui Jisas vena a iloilogi ngehilogo huri na gato tavalu ngaha.

¹⁰I Jisas mo duvi vena, “U bete lawe gimiu ve nen ilo na gineu gona talo doridorigi ve i God vin voragi Ratahigi goro na nona tangaloi nge ingere lavasigi ram lai na gineu hi lo gato tavalu hogosie, huri ram leoleo rain he leo hogo tea, ram rongrongo, rahe ronghogo tea.

¹¹“Nge ngaha a iloiloi gato tavalu hi: a toli ngehi a leo noi God.

¹²A toli ngerehi ram soi lo turegi, a iloilogi huri ve ra hine he ram rogo na leo, nge a vui esi mo vomae mo lai vohogi na leo he dena lolo lolora hure ve rai mese ladohogo go ve rain mwaso.

¹³A toli ngerehi ram soi lo ului vetu, a iloilogi huri ve irahine ram rogo na leo ram laie gena havuhevu. Nge hatie goarigi lure, ram ladohogo qilodo, nge lune a kaliana mo vomai, ram soi.

¹⁴A toli ngerehi ram soi lolo garo kau, rau mwereire hi rau rongo na leo, nge a lado lawuagi huri na gineu talo ure ko a lalaie ko a rong garea talo ure ngaha ram vivi na leo, ko ra he mwaso lai tea.

¹⁵Nge a toli ngerehi ram soi lolo tano garea, rau mwereire hi rau rongo na leo, ram hako bibie lolo lolora gina lolo garea ko a ronghuri, vin dadari rain wai mwasigi.”

¹⁶“Ihine he lai na leleo tea vena kui goroe gena laha, sige vena taue lovavai qea, nge mo taue lo gaiturei leleo, huri ve a tangaloi rain lehi na leleo lune ram ahu vomai lolo vale.

¹⁷A hava gineu mo eno vunigi vin teue lo ute lawua, ko a hava gineu u toga vunigi, rain haqea ko vin mwalue sulo leleo.

¹⁸“Nen leogoro vurugegi huri ve nem rongo na leo ingere ngaha mwerehilogo! Huri ihine mo lai, vin bete lawea vage; ko ihine he lai tea, vin lei vohogi nona lalaie denie, hate hure tare ve nona gineu te biti.”

¹⁹Retahi Jisas mei retuana ram vomai lobena, nge ingere ra he ahu lai tea lolo vale a vevenagi a sinobu sao ram toga dalie.

²⁰Ko a tangaloi gatagale mo veve lawe i Jisas vena, “Ratahimu mei retuemu ram labe varea, ram tarani ve ran lehigo.”

²¹I Jisas mo veve lawera doluegi vena, “Retahiku mei retueku ngerehi ram rongo na leo noi God ko ram huri lune.”

²²Lo rani gatagale i Jisas meire nona rorongtagi ram kalo sulolo aka ko nge mo veve lawera vena, “Da vano lo tavului wei.” Ko ingere ram tauvuigi ram mwalue.

²³Lune ingere ram vano, i Jisas mo maturu. A langi lawua mo here talolo wai hi, a aka mo kakarani vena horo gena wai, ko mo kakarani ve ran dono.

²⁴A nona rorongtagi ram vomai lobei Jisas, ko ram ware radasie, ram veve vena, “Huqe, Huqe! Dam mate!” I Jisas mo maraga, mo gato goro na langi ko a rebu, ko ingere rom mautu, ko mo taro taligu.

²⁵Ko nge mo veve lawe na nona rorongtagi vena, “?A nomiu ladohogo ngehilogo?” Nge ingere ram matagu ko ram garigi, ko ram vui veve veveginire vena, “?Tangaloi naha ihine? Huri nge mo gato goro na langi ko a rebu, rom rongo hurie!

²⁶Ko ram vano tuturedu, ram hage varea lolo loloi venue ta Kerasa, ngehi tavala wai ta Kalili.

²⁷Lune i Jisas mo rovo hage varea, a tangaloi gatagale mo haqea, mo vomai dena qatui venue hi, a vui esi ram toga lune. A doridorine hi u veie tuei beno mo wali vurogi, he toga tea lo valena, nge ingeie mo toga lolo malanga vatu ram tau rahine rau mate aiehi.

²⁸Lune nge mo lehi Jisas, nge mo ulo, mo sisiqeu hivo lo nagona me mo veve gena dilogi lawua vena, “?Jisas, Netui God u Hahale garagara, gom tarani hava gineu meieu? Neu nam hariginigo, gon mese vai garasieu!

²⁹Mo veve mwerehi huri i Jisas mo veve lawe na vui esi vena mwalue dena tangaloi hi. Vagasaosao e ingere rao wiribibie, rau veu bibi na karune ko a limana gena garo vatu, nge gesegi u roto na garo vatu hi, ko a vui esi u susunie sulo vanue vurogi.

³⁰I Jisas mo huie vena, “?A henamu hine?” Mo duvi goroe vena, “A henaku a Burigi,” a vevenagi a vui esi u sao ram toga lune.

³¹Ko ingere ram navu siaga den Jisas vena mese hora vohoginire sulolo walu bue nora vui esi.

³²A buri boe sao aie ram huhue lo vusi. A vui esi hi ram navu siaga den Jisas vena, “Gon hora gamai huri ve gan ahu lolo buri boe ngerehi,” ko nge mo horara.

³³Ko a vui esi hi ram mwalue dena tangaloi hi ko ram ahu lolo buri boe ngerehi. Ko a buri boe doluegi ram toa ram hivo lo bahai, ram qale talolo wai lawua hi, ram dono.

³⁴A tangaloi hi rau leo goro na boe ram lehi na gineu hi, ram toa vano, ram veve lategi lo qatui venue lawua ko lo togagi venue dalie.

³⁵Ko a sinobu rau vano ve ran lehi na hava gineu hi u veie. Ram vomai lobei Jisas, ram lehi na tangaloi hi a vui esi rau mwelue denie mo toga kakarani lobei karui Jisas, u luqeluqe garea ko a domine u garea taligu; ko ram matagu liu.

³⁶A tangaloi lavasigi ingere rau lehe ram veve huri lawe na sinobu ve i Jisas u veie mo garea taligu mwerehilogo.

³⁷Ko a buri sinobu doluegi talolo loloi venue Kerasa ram navu den Jisas vena vano denire, a vevenagi ingere doluegi ram matagu liu. Siu i Jisas mo kalo lolo aka, mo vano denire.

³⁸A tangaloi hi a vui esi rau mwelue denie mo navu den Jisas vena, “Gon siregieu nain vano meigo.” Nge i Jisas mo hora muleginie vena,

³⁹“Gon mule lo valemu, ko gon veve lategi a hava gineu hi God u vei lawego.” Ko a tangaloi hi mo vano mo veve lategi vataha ute lo qatui venue hi huri na gineu lawua i Jisas u veie lawea.

⁴⁰Lune i Jisas u vano taligu lo tavului wai ta Kalili, a sinobu ram lai vurugeginie, a vevenagi rau toga rarai hurie.

⁴¹Ko a tangaloi gatagale a henana i Jaerus mo vomai, ingeie a tangaloi lawua goro na valei soneana. Nge mo sisiqeu hivo goro Jisas, ko mo navuhie ve ron vano bulu lo valena,

⁴²huri i netune vavine gatagale vohogi, a higaona hangavulu domwagi gairue, mo eno mo kakarani vena mate. Siu Jisas mo vano, a sinobu lawua ram susunie.

⁴³A vavine gatagale denire hi, a dai qaravu u veie a higao hangavulu domwagi gairue. Ingeie a nona vivilakogi u rovo lawe na dokta, nge hatie ve gatagale denire u vei lei ve na vagamwasoi.

⁴⁴A vavine hi mo vomai meire sinobu lo tagui Jisas ko mo sikeli na vuvulusi luqana, ko siserigi a dai qaravu hi mo mautu denie.

⁴⁵I Jisas mo hui na sinobu vena, “?Ihine u sikelieu?” Nge ingere doluegi ram haro, nge Bita mo vena, “Huqe, a sinobu ram sone dalibulu gorogo ram susunigo.”

⁴⁶Nge i Jisas mo veve vena, “A tangaloi gatagale u sikelieu, huri ineu nau iloe beno, lune a managi mo mwalue denieu.”

⁴⁷A vavine hi u leo huri ve i Jisas u ilo beno huri a hava gineu nge u veie, ko nge mo matagu liu, mo ruru ruru, mo vomai mo sisiqeu hivo goroe, mo serelue lo nagora sinobu, huri hava gineu nge u sikeli Jisas ko huri ve i Jisas u vagamwasoie siserigi.

⁴⁸I Jisas mo veve lawea vena, “Netuku, a nomu ladohogo mo vaigo gom mwaso. Siu gon mule lo tamwata.”

⁴⁹Lune i Jisas mo laqa mwerehi, a tangaloi mo vomai dena valei Jaerus a tangaloi lawua, mo veve lawea vena, “I netumu u mate beno. Gon mese vai taturegi na Huhui taligu.”

⁵⁰Nge i Jisas mo rongo na leona, ko mo veve lawe Jaerus vena, “Gon mese matagu, nge gon ladohogo hogosie, ko nge vin mwaso taligu.”

⁵¹Siu nge mo dadari lo valei Jaerus, nge he siregi ihine tea vena ahu meie, nge hogosie Bita, Jemis mei tuana Jon, ko tamai maresu mei retahine.

⁵²A sinobu doluegi taie ram ngara ko ram tangihi na maresu. I Jisas mo veve vena, “!Ne mese ngara. A maresu hi he mate tea, nge mo maturu hogosie!”

⁵³Nge ram sovue, huri ingere rau ilo huri ve u mate beno.

⁵⁴Nge i Jisas mo hako lo limana, ko mo warea siaga vena, “Maresu, gon maraga!”

⁵⁵Ko a mabuhine mo vomai taligu, ko siserigi mo maraga. Siu i Jisas mo veve lawera ve ran bete gineu lawea na gani.

⁵⁶Ko i tamana mei retahine rom awogi huri, nge i Jisas mo gato gorora ve ron mese veve lawe hine tea huri na hava gineu u vei.